މަހާތުމާ ގާންދީގެ އުފަންދުވަސް ނުވަތަ "ގާންދީ ޖަޔަންތީ" އަދި އިންޑިއާގެ ކުރީގެ ބޮޑުވަޒީރު ލާލް ބަހާދޫރު ޝާސްތުރީގެ ޚިދުމަތްތައް ފާހަގަކުރުމުގެ ގޮތުން، ރާއްޖޭގައި ހުންނަ އިންޑިއާ ހައިކޮމިޝަނުން އިސްނަގައިގެން މިއަދު ހުޅުމާލޭގައި ޚާއްސަ ދުވުމެއް ބާއްވައިފިއެވެ.
"އިންޑިއާ ރަންސް ފޯ ވިކްސިތު ބާރަތު" މި ޝިއާރުގެ ދަށުން ބޭއްވި މި ދުވުމުގައި ރާއްޖޭގައި ދިރިއުޅޭ އިންޑިއާގެ 350 އަށް ވުރެ ގިނަ ރައްޔިތުންނާއެކު، އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ޖީ ބަލަސުބްރަމާނިއަން ވެސް ވަނީ ބައިވެރިވެވަޑައިގެންފައެވެ.
މަހާތުމާ ގާންދީގެ އުފަންދުވަހާ ގުޅުވައި ރާއްޖޭގައި ހުންނަ އިންޑިއާ ހައިކޮމިޝަނުން އިންތިޒާމްކުރި ހަރަކާތުގެ ތެރެއިން -- ފޮޓޯ: އިންޑިއަން ހައި ކޮމިޝަންރާއްޖޭގައި ހުންނަ އިންޑިއާ ހައިކޮމިޝަނުން ބުނީ، މި ދުވުމުގެ ތެރެއިން އިންޑިއާގެ ޑައަސްޕޯރާ ނުވަތަ ރާއްޖޭގައި މަސައްކަތްކުރާ އެ ގައުމުގެ ރައްޔިތުން ގައުމާއެކު ބާއްވާ ގާތް ގުޅުމަށް ސަފީރު ޝުކުރު އަދާކުރެއްވި ކަމަށެވެ. އަދި 2047 ވަނަ އަހަރު އަންނަންވާއިރަށް އިންޑިއާއަކީ ތަރައްގީވެފައިވާ ގައުމަކަށް ހެދުމަށް އެ ގައުމުން ކުރަމުންދާ މަސައްކަތުގައި، ބޭރު ގައުމުތަކުގައި ދިރިއުޅޭ އިންޑިއާގެ ރައްޔިތުންގެ ދައުރު ވަރަށް ބޮޑުކަން ސަފީރު ފާހަގަކުރެއްވިއެވެ.
މީގެއިތުރުން، މަހާތުމާ ގާންދީ އާއި ލާލް ބަހާދޫރު ޝާސްތުރީގެ ޒިކުރާ އާކުރައްވަމުން ހައިކޮމިޝަނުން ބުނީ، ސުލްހަޔާއި އެންމެންގެ ކުރިއެރުމަށް ގާންދީ ގެންގުޅުއްވި ފަލްސަފާއަކީ އެންމެން ޝާމިލުވާ ތަރައްގީގެ ދަތުރެއް ކުރިއަށް ގެންދިއުމަށް މިހާރު ވެސް މަގުދައްކައިދޭ މުހިންމު އަސާސްތަކެއް ކަމަށެވެ.
މަހާތުމާ ގާންދީގެ އުފަންދުވަހާ ގުޅުވައި ރާއްޖޭގައި ހުންނަ އިންޑިއާ ހައިކޮމިޝަނުން އިންތިޒާމްކުރި ހަރަކާތުގެ ތެރެއިން -- ފޮޓޯ: އިންޑިއަން ހައި ކޮމިޝަންކޮންމެ އަހަރެއްގެ ވެސް އޮކްޓޫބަރު މަހުގެ 2 ވަނަ ދުވަހަކީ އިންޑިއާގެ މިނިވަންކަމުގެ ބާނީ މަހާތުމާ ގާންދީގެ އުފަންދުވަހެވެ. މި ދުވަސް ބައިނަލްއަގުވާމީ ގޮތުން "އިންޓަނޭޝަނަލް ޑޭ އޮފް ނޮން-ވައިލެންސް" ނުވަތަ އަނިޔާވެރިކަމާ ދެކޮޅު ދުވަހުގެ ގޮތުގައި ފާހަގަކުރާއިރު، އިންޑިއާގެ ޚާރިޖީ މިޝަންތަކުން ދުނިޔޭގެ އެކި ކަންކޮޅުތަކުގައި މިފަދަ ހަރަކާތްތައް ކޮންމެ އަހަރަކު ވެސް އަންނަނީ ބާއްވަމުންނެވެ.