އިދިކޮޅު އެމްޑީޕީގެ ކޮންގްރެސް އިފުތިތާހުކުރުމަށް މިރޭ ބާއްވާ ޖަލްސާއަށް ވެރިކަންކުރާ ޕާޓީ ޕީއެންސީގެ ފަރާތުން އެ ޕާޓީގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމް ވަޑައިގެންފިއެވެ.
އެމްޑީޕީގެ ކޮންގްރެސް އިފުތިތާހުކުރާ ޖަލްސާގައި ޝިޔާމް ޕީއެންސީގެ ފަރާތުން ބައިވެރިވެވަޑައިގަންނަވާއިރު، ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި އެމްޑީޕީގެ ފަރާތުން ބައިވެރިވެވަޑައިގަތީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.
މިރޭ އޮންނާނީ އެމްޑީޕީގެ ކޮންގްރެސް އިފުތިތާހުކުރުމުގެ ޖަލްސާއެވެ. އެ ޖަލްސާގައި ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހީމް މުޙައްމަދު ޞާލިޙް ވާހަކަފުޅު ދައްކަވާނެއެވެ.
އެއަށްފަހު މާދަމާ އޮންނާނީ އިންވެސްޓްމަންޓް ފޯރަމެވެ. ރަސްމީ މަސައްކަތްތައް ފެށޭނީ ހޮނިހިރު ދުވަހެވެ.
އެމްޑީޕީގެ އަސާސީ ގަވައިދު އިސްލާހުކުރުމާއި ބޮޑު ބަދަލާ ގުޅޭ ގަރާރާއި ލާމަރުކަޒީ ނިޒާމާ ގުޅޭ ގަރާރަށް ބަހުސްކޮށް ގޮތް ނިންމުން އޮންނާނެއެވެ.
އެމްޑީޕީން މީގެކުރިން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، އެ ޕާޓީގެ ކޮންގްރެސްއަށް ވަރަށް ބޮޑު ތަރުހީބެއް ލިބެމުން އަންނަ ކަމަށާއި މިހާތަނަށް 980 އަށް ވުރެ ގިނަ ބައިވެރިން ރަޖިސްޓްރީވެފައިވާ ކަމަށެވެ.
އެމްޑީޕީއަކީ މިވަގުތު ރާއްޖޭގައި އޮތް ދެވަނައަށް އެންމެ މެންބަރުން ގިނަ ޕާޓީއެވެ. އެގޮތުން މިހާތަނަށް އެ ޕާޓީގައި 55،399 މެންބަރުން ތިބިކަން އިލެކްޝަންސް ކޮމިޝަންގެ ދަފްތަރުން އެނގެއެވެ.