ދިވެހިރާއްޖޭގައި ޖަޕާނުގެ އެމްބަސީ ޤާއިމުކުރިތާ 10 އަހަރު ފުރުން މިއަދު ފާހަގަކޮށްފިއެވެ.
ހޮޓެލް ޖެންގައި ބޭއްވި މި ޚާއްސަ ހަފުލާ ޝަރަފުވެރިކޮށްދެއްވީ ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމްއެވެ.
މި ހަފުލާގައި ކެބިނެޓުގެ ބައެއް ވަޒީރުންނާއި، ރާއްޖޭގައި ތިއްބަވާ ބޭރު ޤައުމުތަކުގެ ސަފީރުންނާއި ޑިޕްލޮމެޓުން ބައިވެރިވެވަޑައިގެންނެވިއެވެ. އެ ހަފުލާގައި، މި މުނާސަބަތާ ގުޅިގެން ޚާއްސަ ކޭކެއް ފެޅުމާއި، ދެ ގައުމުގެ ގުޅުން ރަމްޒުކޮށްދޭ ވީޑިއޯ ކްލިޕްތަކެއް ދެއްކުންވެސް ކުރިއަށްދިޔައެވެ.
މި ހަފުލާގައި ވާހަކަދައްކަވަމުން ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވިދާޅުވީ، 2016 ވަނަ އަހަރު މާލޭގައި ޖަޕާނުގެ އެމްބަސީ ހުޅުވުމަކީ ދެ ގައުމުގެ ދެމެދުގައި އޮތް ޒަމާންވީ އެކުވެރިކަމަށް ލިބުނު އައު ދިރުމެއް ކަމަށެވެ. އަދި އޭގެ ސަބަބުން ދެ ގައުމުގެ ގުޅުން އިތުރަށް ބަދަހިވެ، ވިސާއާއި ކޮންސިއުލާ ޚިދުމަތްތައް ދިނުމުގައި ލުއިފަސޭހަތަކެއް ލިބިގެންދިޔަކަން އެކަމަނާ ފާހަގަކުރެއްވިއެވެ.
އެމްބަސީ ހުޅުވުމަށްފަހު ފުރަތަމަ ސަފީރު ކަޒުމީ އެންޑޯއަށްފަހު، މިހާތަނަށް ޖަޕާނުން ރާއްޖެއަށް ކަނޑައެޅި އަންހެން ތިން ސަފީރުންގެ ތެރޭގައި ހިމެނިވަޑައިގަތުމަކީ ލިބިވަޑައިގެންނެވި ޝަރަފެއް ކަމަށްވެސް ވިދާޅުވިއެވެ.
ރާއްޖޭގައި ޖަޕާންގެ އެމްބަސީ ހުޅުވިތާ 10 އަހަރު ފުރުން ފާހަގަކުރުމަށް ބޭއްވި ހަފުލާގެ ތެރެއިން -- ފޮޓޯ/ ފޮރިން މިނިސްޓްރީސަފީރުގެ ވާހަކަފުޅުގައި، ރާއްޖޭގެ ތަރައްޤީއަށް ޖަޕާނުން ވެދީފައިވާ އެހީތައް ފާހަގަކުރައްވަމުން، މި ރަސްމިއްޔާތުގައި ދެއްކި ހަތަރު ވީޑިއޯ ކްލިޕަކީ އިމާރާތްކުރުމުގެ ދާއިރާއާއި، މޫސުމަށް އަންނަ ބަދަލުތަކާއި ކާރިސާތަކުން ރައްކާތެރިވުމާއި، ހިންގުމުގެ ދާއިރާ ހަރުދަނާކުރުމުގެ އިތުރުން އިންސާނީ ވަސީލަތް ތަރައްޤީކުރުމަށް ޖަޕާނުން ވެދީފައިވާ އެހީތަކުގެ މައްޗަށް އެކުލެވޭ ވީޑިއޯތަކެއްކަން ފާހަގަކުރެއްވިއެވެ. އަދި އިންސާނީ ވަސީލަތް ތަރައްގީކުރުމުގައި ޖަޕާނުގެ ދައުރާ ގުޅޭގޮތުން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ދެއްވި ޚާއްޞަ މެސެޖަށް ސަފީރު ޝުކުރު އަދާކުރެއްވިއެވެ.
މީގެއިތުރުން، ވިޔަފާރީގެ ގޮތުން ޔަންމާ އިންޖީނާއި، މަކީޓާ އަދި ހިޓާޗީ ފަދަ ޖަޕާނުގެ އުފެއްދުންތަކުން ދިވެހިންގެ ދިރިއުޅުމަށް ގެނެސްދިން ފަސޭހަތަކާއި، އައްޑޫ ސިޓީގައި ހިންގާ ޔަމަކީ ކުންފުންޏާއި، ރާއްޖޭގައި ޖަޕާން ކާބޯތަކެތި ތަޢާރަފުކުރާ ސާރާ އިންޓަނޭޝަނަލް ފަދަ ވިޔަފާރިތަކުގެ ދައުރު ސަފީރު ފާހަގަކުރެއްވިއެވެ.
ތަޢުލީމީ އަދި ސަގާފީ ގުޅުންތަކަށް އަލިއަޅުއްވާލައްވަމުން، އެމްއެންޔޫގައި ޖަޕާން ބަސް ކުރިއެރުވުމަށް އަގުހުރި ޚިދުމަތްތަކެއް ކޮށްދެއްވި ފެކަލްޓީ އޮފު އާޓްސްގެ ކުރީގެ ޑީން ޢާޞިމް ޢަބްދުއްސައްތާރަށް ސަފީރު ވަނީ "ޖަޕަނީސް އެމްބެސެޑާސް ކޮމެންޑޭޝަން" އެވޯޑު އަރުވާފައެވެ. އަދި ރާއްޖޭގައި އަލަށް އުފެއްދި 'ކެންޑޯ ކްލަބް' އަށް މި ރަސްމިއްޔާތުގައި ސެޓްފިކެޓް ހަވާލުކުރެވުނެވެ.
ދެ ގައުމުގެ ދެމެދުގައި އޮތް ގާތްގުޅުމަށް 60 އަހަރު ފުރެން ކައިރިވެފައިވާއިރު، ރާއްޖެއާއި ޖަޕާނަކީ ޖަޒީރާ ދެ ޤައުމަށް ވުމުން ކުރިމަތިވާ ގޮންޖެހުންތައް އެއްގޮތްކަން ފާހަގަކުރައްވައި، ކުރިއަށް އޮތް ތަނުގައިވެސް ބައިނަލްއަޤްވާމީ މައިދާނުގައާއި ދެ ގައުމުގެ ދެމެދުގައިވާ ގުޅުން އިތުރަށް ބަދަހިކުރުމުގައި ޖަޕާނުން ދެމިއޮންނާނެ ކަމުގެ ޔަގީންކަން ސަފީރު ދެއްވިއެވެ. އަދި ވޭތުވެދިޔަ 10 އަހަރު ދެއްވި އެއްބާރުލުމަށްޓަކައި ދިވެހި ސަރުކާރަށާއި ޚާރިޖީ ވުޒާރާއަށް އެކަމަނާ ޝުކުރު އަދާކުރެއްވިއެވެ.