ސިހުރު ހަދާކަމުގެ ތުހުމަތުގައި ތ. ވަންދޫން ހައްޔަރުކުރި، އެ ރަށުގެ ވަގުތީ މުދިމުގެ ބަންދަށް ކޯޓުން ރޭ ހަތް ދުވަހުގެ މުއްދަތެއް ޖަހައިފިއެވެ.
ފުލުހުން ރޭ މީޑިއާތަކާ ހިއްސާކުރި މެސެއްގައި ވަނީ، ތ. ވަންދޫގައި ސިހުރު ހަދާކަމަށް ތުހުމަތު ކުރެވޭ މައްސަލައެއް އިއްޔެ ހަވީރު 18:05 އެހައިކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
އެ މައްސަލައިގައި 61 އަހަރު ދިވެހި ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް އެ މުއައްސަސާއިން ބުންޏެވެ.
'ސަން' އަށް މައުލޫމާތު ދެމުން މިއަދު ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަތް ދުވަހުގެ މުއްދަތަށް އޭނާ ބަންދުކޮށްފައިވާ ކަމަށެެވެ.
އެހެންކަމުން އޭނާގެ ބަންދުގެ މުއްދަތު ހަމަވާނީ މި މަހުގެ ހަތެއްވާ ދުވަސް ކަމަށްވާ، އަންނަ ހަފުތާގެ ބުދަ ދުވަހަށެވެ.
'ސަން'އަށް މައުލޫމާތު ދިން މީހަކު ބުނި ގޮތުގައި އެ ފިރިހެން މީހާއަކީ އެ ރަށުގައި ވަގުތީ މުދިމެއްގެ މަގާމުގައި ހުރި މީހެކެވެ.
ވަންދޫ ކައުންސިލުން ބުނީ އެ މީހާއަކީ މިސްކިތް ބެލުމަށް ހަވާލުކޮށްފައި ހުންނަ މީހެކެވެ. ނަމަވެސް އެއީ މިސްކިތުގެ ރަސްމީ މުދިމު ނޫންކަން ކައުންސިލުން ވަނީ ފާހަގަކޮށްފައެވެ.
ސިހުރުގެ މައްސަލައަކީ ރާއްޖޭގައި ދޭތެރެދޭތެރެއިން ފެންމަތިވާ މައްސަލައެކެވެ. ވަކިން ޚާއްސަކޮށް އަތޮޅުތެރޭގެ ބައެއް ރަށްތަކުގައި ސިހުރު ހެދުމުގެ މައްސަލަތައް ރިޕޯޓުކުރެއެވެ.
ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.