މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން "މޯލްޑިވްސް ގެސްޓް އިންފޮމޭޝަން ސިސްޓަމް" (އެމްޖީއައިއެސް) މިއަދު އިފުތިތާހުކޮށްފިއެވެ.
މި ސިސްޓަމް އިފުތިތާހުކޮށްދެއްވީ މިއަދު ބޭއްވި ޚާއްސަ ރަސްމިއްޔާތެއްގައި، މިނިސްޓާ އޮފް ފިނޭންސް އެންޑް ޕަބްލިކް އެންޓަޕްރައިސެސް ހަސަން ޒަރީރެވެ. މީރާއިން ބުނި ގޮތުގައި، މި އައު ސިސްޓަމް ތައާރަފުކުރީ ޓެކްސް ދައްކާ ފަރާތްތަކަށް ލުއިފަސޭހަ ހިދުމަތްތަކެއް ފޯރުކޮށްދިނުމަށް އެ އޮތޯރިޓީން ކުރަމުންދާ މަސައްކަތްތަކުގެ ތެރެއިންނެވެ.
މި ސިސްޓަމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ޓޫރިސްޓް އެސްޓެބްލިޝްމަންޓްތަކަށް އަންނަ ފަތުރުވެރިންގެ މައުލޫމާތު މި ސިސްޓަމް މެދުވެރިކޮށް ހުށަހެޅޭނެއެވެ. މީރާއިން ފާހަގަކުރި ގޮތުގައި، މި ސިސްޓަމުން މައުލޫމާތު ހުށަހެޅުމުން، މިނިސްޓްރީ އޮފް ޓޫރިޒަމަށް ހުށަހަޅަންޖެހޭ މައުލޫމާތު އެ މިނިސްޓްރީއަށް ވެސް ހުށަހެޅުނީ ކަމުގައި ބެލެވޭނެއެވެ. މި އައު އިންތިޒާމުގެ ސަބަބުން ޓޫރިސްޓް އެސްޓެބްލިޝްމަންޓްތަކުން މައުލޫމާތު ހުށަހެޅުމުގެ އިލްތިޒާމު ފުރިހަމަކުރުމަށް ވަރަށް ބޮޑު ލުއިފަސޭހަކަމެއް ލިބިގެންދާނެ ކަމަށް އެ އޮތޯރިޓީން ބުނެއެވެ. މީގެ އިތުރުން، މި ސިސްޓަމް ޓޫރިސްޓް އެސްޓެބްލިޝްމަންޓްތަކުގެ ސިސްޓަމާ އިންޓަގްރޭޓްކުރުމުން، މައުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތްތައް އެއްކޮށް ނިމުމަކަށް އަންނާނެއެވެ.
މި ސިސްޓަމަކީ ހުރިހާ ފަރާތްތަކަށް ހުޅުވާލެވިފައިވާ ސިސްޓަމެއް ނަމަވެސް، ޓެކްސް ދައްކާ ފަރާތްތައް އޮންބޯޑް ކުރުމުގައި މީރާއިން އިސްކަންދޭނީ ދެ ބަޔަކަށް ބަހާލައިގެން ކަމަށް އެ އޮތޯރިޓީން މައުލޫމާތުދެއެވެ. އެގޮތުން، ރިސޯޓްތަކާއި، ހޮޓާތަކާއި، އަދި 50 އެނދަށް ވުރެ މަތީގެ ގެސްޓްހައުސްތަކުން ނޮވެމްބަރުން ފެށިގެން މި ސިސްޓަމް މެދުވެރިކޮށް ރިޕޯޓްކުރަން ފަށަން ޖެހޭނެއެވެ. އަދި ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން އަންނަ ޖެނުއަރީއިން ފެށިގެން ހިނގާ މުއްދަތުތަކުގެ މައުލޫމާތު މި ސިސްޓަމް މެދުވެރިކޮށް ރިޕޯޓްކުރަން ޖެހޭނެ ކަމަށް މީރާއިން އަންގައެވެ.
އައު ސިސްޓަމް ތައާރަފުކުރި ނަމަވެސް، ގްރީން ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް އެއްވެސް ބަދަލެއް ނާންނާނެ ކަމަށް މީރާއިން ބުނެއެވެ. ކުރިއެކޭ އެއްފަދައިން ގްރީން ޓެކްސް ރިޓާން ހުށަހެޅުމާއި ފައިސާ ދެއްކުން ކުރިއަށް ދާނީ "މީރާކަނެކްޓް" މެދުވެރިކޮށެވެ. ނަމަވެސް، މި ސިސްޓަމަށް މައުލޫމާތު ރިޕޯޓްކުރުމުން، އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރަން ނުޖެހޭނެއެވެ. އޭގެ ބަދަލުގައި، ބަޔާން ހުށަހަޅާއިރު އެ މައުލޫމާތު ގްރީން ޓެކްސް ބަޔާނަށް ޕްރީފިލް ކޮށްދޭނެ ކަމަށް މީރާއިން މައުލޫމާތުދެއެވެ.
މީރާއިން މި ސިސްޓަމް ތައާރަފުކުރިއިރު، އޮފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގާ ގޮތަށް ޖީއެސްޓީ ގާނޫނަށް މި ފަހުން ވަނީ ބަދަލު ގެނެސްފައެވެ. މިއާއެކު އެ ވިޔަފާރިކުރާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.