ޖުމްލަ ހަތް މީހުންނާއެކު ރާއްޖޭގެ އިގްތިސޯދީ ސަރަހައްދުން މަސްވެރިކަންކުރި ބޭރުގެ ބޯޓެއް އެމްއެންޑީއެފްއިން މިއަދު އަތުލައިގަނެފިއެވެ.
އެމްއެންޑީއެފްއިން މިރޭ ކޮށްފައިވާ ޕޯސްޓެއްގައި ވަނީ، އެމްއެންޑީއެފް ކޯސްޓްގާޑުން ހިންގި ޚާއްސަ އޮޕަރޭޝަނެއްގައި ރާއްޖޭގެ އިގްތިސޯދީ ސަރަހައްދުގައި ގާނޫނާއި ޚިލާފަށް ހަރަކާތްތެރިވަމުންދިޔަ ބޭރުގެ މަސްބޯޓެއް ކޯސްޓްގާޑް ޝިޕް އިމާދުއްދީންގެ ބެލުމުގެ ދަށަށް ގެންގޮސްފައިވާ ކަމަށް ބުނެފައެވެ.
ނަމަވެސް އެއީ ކޮން ގައުމެއްގެ މަސްބޯޓެއް ކަމެއް އެމްއެންޑީއެފްއިން ހާމަކޮށްފައެއް ނުވެއެވެ.
https://x.com/MNDF_Official/status/2105348400585781678
އެމްއެންޑީއެފްއިން ބުނީ ޖުމްލަ ހަތް މީހުންނާއެކު ހަރަކާތްތެރިވި އެ މަސްބޯޓު ކޯސްޓްގާޑް ޝިޕްގެ ބެލުމުގެ ދަށަށް ގެންދިޔައީ ހއ. ތުރާކުނުގެ ހުޅަނގުއުތުރުން 46 ނޯޓިކަލް މޭލު ބޭރުގައި ހަރަކާތްތެރިވަމުން ދަނިކޮށް މިއަދުގެ އިރުއޮއްސި 18:34 ހާއިރު ކަމަށެވެ. އަދި އެ ބޯޓު ހދ. ކުޅުދުއްފުއްޓަށް ގެންދިއުމުގެ މަސައްކަތް މިހާރު ކުރަމުންދާ ކަމަށް އެމްއެމްޑިއެފްއިން ވަނީ މައުލޫމާތު ދީފައެވެ.
މީގެ ދެ ހަފުތާ ކުރިން މި މަހުގެ 16 ވަނަ ދުވަހު ވެސް ގާނޫނާ ޚިލާފަށް މަސްވެރިކަން ކުރަނިކޮށް ބޭރުގެ މަސްބޯޓެއް އެމްއެންޑީއެފްއިން ވަނީ އަތުލައިގަނެފައެވެ.
އެމްއެންޑީއެފްއިން އެ ބޯޓު އަތުލައިގަތީ ކ. ދިއްފުށީގެ އިރުން 123 ނޯޓިކަލް މޭލު ބޭރުންނެވެ.
ފާހަގަކުރެވޭ ގޮތުގައި، މީގެ ކުރިން ވެސް އެކި ފަހަރު މަތިން، ބޭރު ގައުމުތަކުގެ މަސްބޯޓުތައް ރާއްޖޭގެ ކަނޑުގެ ސަރަހައްދަށް ވަދެ، މަސްވެރިކަން ކުރަމުން ދަނިކޮށް ކޯސްޓްގާޑުން ހިފަހައްޓާފައިވެއެވެ. އެ ފަދަ ބޯޓުތައް ބޮޑެތި އަދަދުތައް ޖޫރިމަނާ ވެސް ކޮށްފައި އެބަހުއްޓެވެ.