ބޮޑުތަކުރުފާނު މަގު ފުޅާކޮށް ޒަމާނީ ފެންވަރަށް ތަރައްގީ ކުރުމުގެ މަސައްކަތަށް ސުނާމީ ބިނާ ސަރަހައްދުން ފެށިގެން އެމްޕީއެލްއާ ހަމައަށް މަގުމަތީގައި ހުރި އުޅަނދުތަކާއި އެހެނިހެން ތަކެތި ނެގުމަށް ހައުސިން މިނިސްޓްރީން އަންގައިފިއެވެ.
ހައުސިން މިނިސްޓްރީން ކުރި އިއުލާނެއްގައި ބުނީ، ބޮޑުތަކުރުފާނު މަގު ތަރައްގީކުރުމުގެ މަޝްރޫޢުގެ ދަށުން ސުނާމީ ބިނާއިން ފެށިގެން އެމްޕީއެލްއާ ހަމައަށް މަގު ހެދުމުގެ އަމަލީ މަސައްކަތް ފެށުމަށް ހަމަޖެހިފައިވާ ކަމަށެވެ.
އެހެންކަމުން އެ ސަރަހައްދުގެ މަގުމަތީގައި ބަހައްޓާފައިވާ އުޅަނދުތަކާއި އެހެނިހެން ތަކެއްޗާއި، އަދި ސުނާމީ ބިނާ ސަރަހައްދުގައި އަޅާފައިވާ އުޅަނދުފަހަރު އަންނަ ހޮނިހިރު ދުވަހުގެ ނިޔަލަށް ނެގުމަށް ވަނީ އަންގާފައެވެ. އަދި އެ ތާރީޚުގެ ފަހުން ނުނަގައި ހުންނަ ތަކެއްޗާއި އުޅަނދުފަހަރު މިނިސްޓްރީން ނަގާނެ ކަމަށް ވެސް ވަނީ ބަޔާންކޮށްފައެވެ.
މާލޭގެ ބޮޑުތަކުރުފާނު މަގު ފުޅާކޮށް، ތާރުއަޅައިގެން ތަރައްގީކުރުމުގެ މަޝްރޫއުގެ ތިން ވަނަ ފިޔަވަހި ފެށުމަށްޓަކައި އެ މަގުގެ ވެސްޓް ޕާކު ސަރަހައްދު ވެސް މިހާރު ވަނީ ބަންދުކޮށްފައެވެ.
https://x.com/MIHUDmv/status/2105314996871970961
މިދިޔަ އަހަރުގެ އޮގަސްޓް މަހު ފެށި މި މަޝްރޫއުގެ ފުރަތަމަ ފިޔަވަހީގައި މަސްމާރުކޭޓުން ފެށިގެން ޖުމްހޫރީ މައިދާނާ ހަމައަށް އެއްގަމުތޮށި ބޭރަށް ޖައްސައި، ހަތަރު ލޭނަށް މަގު ފުޅާކޮށް ތާރު އަޅާފައިވާއިރު، ދެވަނަ ފިޔަވަހީގައި ވަނީ ޖުމްހޫރީ މައިދާނުން ފެށިގެން ހެންވޭރު ފެރީ ޓާމިނަލާ ހަމައަށް މަގު ފުޅާކޮށްފައެވެ.
އެމްޕީއެލްއާ ހަމައަށް މަގު ތަރައްގީ ކުރުމުގެ މަސައްކަތް ފަށަން ތައްޔާރުވެފައިވާއިރު، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ވެސް ދަނީ ކުރިއަށެވެ. އެގޮތުން ބޮޑުތަކުރުފާނު މަގުގައި ދެން ތަރައްގީ ނުކުރެވި އޮންނާނީ ނޯތު ހާބަރުން ފެށިގެން އެމްޕީއެލްއާ ހަމައަށް އޮތް ބައެވެ.
އެ ބައި ތަރައްގީ ކުރުމުގެ މަސައްކަތް ފެށުމަށް ހަމަޖެހިފައިވަނީ ޕޯޓު ތިލަފުއްޓަށް ބަދަލުކުރުމަށް ފަހުގައެވެ. މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ހައްލެއް ހޯދުމަށް ކުރިއަށް ގެންދާ މަޝްރޫއުގެ ދަށުން، އަންނަ އަހަރުގެ ނޮވެމްބަރު މަހުގެ ނިޔަލަށް އެތަން ތިލަފުއްޓަށް ބަދަލުކުރެވޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
ސަރުކާރުން އެންމެ ބޮޑު އިސްކަމެއް ދީގެން ކުރިއަށް ގެންދާ މަޝްރޫޢުތަކުގެ ތެރޭގައި މާލޭގެ ހުރިހާ މަގުތަކެއް ޒަމާނީ ފެންވަރަށް ތަރައްގީކުރުން ހިމެނެއެވެ. މި މަޝްރޫޢުގެ ދަށުން މަގުތައް ހެދިގެން ދާނީ ފެނާއި ނަރުދަމާގެ ނިޒާމާއި ކަރަންޓު އަޕްގްރޭޑް ކުރުން ހިމެނޭ ގޮތަށް ކަމަށާއި، އެއާ އެކީގައި ސްޓޯމް ވޯޓާ ނިޒާމާއި ފަޔާ ހައިޑްރަންޓްގެ ނިޒާމު ވެސް ގާއިމު ކުރުމަށް ވަނީ ހަމަޖެހިފައެވެ.
ސަރުކާރުން ބުނާގޮތުގައި މާލޭގައި ފެންބޮޑުވުމާއި ކާރޫބާރު ބޮޑުވުމަށް ހައްލެއް ލިބިގެން އަންނާނީ ހުރިހާ މަގުތަކެއް ޒަމާނީ ފެންވަރަށް ތަރައްގީކުރެވިގެންނެވެ.
ހައުސިން މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެފައިވާ ގޮތުގައި މާލޭގެ މަގުތައް ހެދުމުގެ ބިޔަ މަޝްރޫއަށް ޖުމްލަ 100 މިލިއަން ޑޮލަރު ހޭދަވާނެއެވެ.