އަމީނީ މަގުގައި އަލުން ތާރުޅި ސަރަހައްދުން ބައެއް އަންނަ އާދިއްތަ ދުވަހު ހުޅުވާލުމަށް ނިންމައިފިއެވެ.
ހައުސިން މިނިސްޓްރީން މިއަދު 'ސަން'އަށް ބުނީ، އާދިއްތަ ދުވަހު ހުޅުވާލަނީ އަލުން އެ މަގުގައި ތާރުޅި ސެގުމަންޓު އެކެއް ކަމަށެވެ. އެއީ، ދިވެހިއްރާޖޭގެ އަޑުން ފަށަައިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ.
ސެގުމަންޓު ދެއެއްގެ ގޮތުގައި ހިމެނޭ ސަރަހައްދު ކަމަށްވާ، ދިވެހި ރާއްޖޭގެ އަޑު ކުރިމަތިން އޮންނަ ހަތަރު އަނގޮޅި ކަންމަތީގައި ވެސް މިހާރު ވަނީ ތާރު އަޅާ ނިންމާފައެވެ. އެކަމަކު، އެ ސަރަހައްދު ހުޅުވާނެ ތާރީޚެއް އަދި ހާމައެއް ނުކުރެއެވެ.
އަމީނީ މަގުގައި އަލުން ތާރު އެޅި ސަރަހައްދު -- ފޮޓޯ/ ހައުސިން މިނިސްޓްރީއެ މަގު މަރާމާތު ކުރަނީ އެމްޓީސީސީން ކަމަށްވާއިރު، އެ މަސައްކަތް ކުރުމަށް ދަރުމަވަންތަ ހޮސްޕިޓަލާ ހަމައަށް ބަންދުކުރީ، މިދިޔަ ޖޫން މަހުގެ ފަހުކޮށެވެ. އެހެންވެ، އެ މަގުން ދަތުރުކުރާ ބައެއް ބަސް ރޫޓުތަކަށް ވެސް ވަނީ ބަދަލު ގެނެސްފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ޕްލޭނިން މިނިސްޓްރީން އާރުޑީސީއާ އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.
މީގެ ދެ އަހަރު ކުރިން މި ސަރުކާރުން ވެރިކަމާ ހަވާލުވުމަށްފަހު އަމީނީ މަގުގެ އެންމެ ފަހު ސެގްމަންޓުގައި ތާރު އަޅައި ނިންމައިލިއެވެ. އެކަމަކު، ހާބަރު ފުޑްކޯޓު ސަރަހައްދުގައި "މުލިހި"ތަކެއްހެން ތާރުގަނޑު އުފުލި، އެ މަގުން ދަތުރުކުރާ ފަރާތްތަކަށް ބޮޑެތި ތަކުލީފުތަކަކާ ކުރިމަތިލާންޖެހުނެވެ.
އެހެންވެ، އެ ކަމުގެ ޝަކުވާ ބޮޑުވެ، ސަރުކާރަށް ފާޑުކިޔުން ވެސް އަމާޒުވިއެވެ.