މިއަދުގެ ފަތުރުވެރިން ރާއްޖެއަށް ޒިޔާރަތްކުރަނީ ހަމައެކަނި ގުދުރަތީ ރީތިކަން ތަޖުރިބާކުރާކަށެއް ނޫނެވެ. ދަތުރު ރޭވުމާ ހިސާބުން ފެށިގެން އެނބުރި ގައުމަށް ދިއުމާ ހަމައަށް، މެދުކެނޑުމެއްނެތި އިންޓަނެޓާ ގުޅިފައި ހުރުމަކީ މިހާރު ފަތުރުވެރިންގެ އެންމެ ބޮޑު އެއް އުންމީދެވެ.
ބުކިން ހެދުމާއި ފައިސާ ދެއްކުމުން ފެށިގެން، އެއާޕޯޓަށް ފޭބުމާއި، ރިސޯޓުތަކުގެ އޮޕަރޭޝަންތަކާއި، މެހެމާނުންނާ މުވާސަލާތުކުރުމުގެ އިތުރުން، ސޯޝަލް މީޑިއާގައި މަންޒަރުތައް ހިއްސާކުރުމާއި ކުއްލި ހާލަތްތަކުގައި މުއާމަލާތްކުރުމަށް ވެސް ބަރޯސާވަނީ ޑިޖިޓަލް ވިއުގައަށެވެ.
މި މުހިންމު ދަތުރުގައި ރާއްޖޭގެ ފަތުރުވެރިކަމުގެ ސިނާއަތަށް އެންމެ ބޮޑު އެހީތެރިކަމެއް ފޯރުކޮށްދޭ އެއް ބައިވެރިޔަކީ، ޚިދުމަތް ފޯރުކޮށްދިނުމުގައި ފަހުރުވެރި 38 އަހަރު ފުރުން މިއަދު ފާހަގަކުރަމުންދާ ދިރާގެވެ.
މުޅި ރާއްޖެ ގުޅާލަދޭ ވަރުގަދަ ޑިޖިޓަލް އުމްރާނީ ތަރައްގީ
ރާއްޖެ ފަދަ ޖަޒީރާ ގައުމެއްގައި، އެކި ކަންކޮޅުތަކުގައި ފެތުރިފައިވާ ފަތުރުވެރިކަމުގެ މަންޒިލްތައް އެއް ވިއުގައަކުން ގުޅާލުމަކީ އާދައިގެ ކަމެއް ނޫނެވެ. ނަމަވެސް، ދިރާގުން ވަނީ މުޅި ރާއްޖެއަށް 100 އިންސައްތަ މޮބައިލް ކަވަރޭޖް އަދި 100 އިންސައްތަ ފައިބާ ޓު ދަ ހޯމް (އެފްޓީޓީއެޗް) ކަވަރޭޖް ފޯރުކޮށްދީފައެވެ.
މީގެ އިތުރުން، އެ ކުންފުނިން ތައާރަފުކޮށްފައިވާ 5ޖީގެ ހިދުމަތާއެކު، ފަތުރުވެރިކަމުގެ ސިނާއަތަށް ބޭނުންވާ ހަލުވި އަދި އިތުބާރު ހިފޭ ކަނެކްޓިވިޓީ ވަނީ ކަށަވަރުވެފައެވެ.
ރާއްޖޭގައި ގާއިމުކުރި ފުރަތަމަ "ޓިއާ 4 ސެޓިފައިޑް ޑޭޓާ ސެންޓަރަކީ" ވެސް ދިރާގުގެ އިންވެސްޓްމަންޓެކެވެ. މި ވަރުގަދަ އުމްރާނީ ތަރައްގީގެ ސަބަބުން، ރިސޯޓުތަކާއި ހޮޓާތަކުގެ ޑޭޓާ ރައްކާތެރިކަމާއެކު ބެލެހެއްޓުމަށް މަގުފަހިވެއެވެ. މިއީ ޑިޖިޓަލް އޮޕަރޭޝަންތަކަށް ބަރޯސާވާ މިންވަރު އިތުރުވަމުންދާ މި ދަނޑިވަޅުގައި، ވިޔަފާރިތަކަށް ލިބޭ ވަރަށް ބޮޑު ޔަގީންކަމެކެވެ.
ދިރާގުގެ ކުރީގެ ސީއީއޯ އިސްމާއީލް ރަޝީދު އެ ކުންފުންޏަށް ލިބުނު އެވޯޑްތަކަކާއެކު-- ފޮޓޯ: ދިރާގުފަތުރުވެރިންނާއި ވިޔަފާރިތަކަށް ފަސޭހަ ޑިޖިޓަލް ހައްލުތައް
ރާއްޖެއަށް އަންނަ ފަތުރުވެރިންނަށް އެންމެ ފުރަތަމަ ބޭނުންވާނެ އެއް ކަމަކީ ފަސޭހައިން އިންޓަނެޓާ ގުޅާލުމެވެ. ދިރާގުގެ ޓޫރިސްޓް ސިމް އަދި އީ ސިމްގެ ހިދުމަތް މެދުވެރިކޮށް، ރާއްޖެއަށް އައުމުގެ ކުރިން ވެސް ޑިޖިޓަލްކޮށް ކަނެކްޝަން ހޯދުމުގެ މަގު ވަނީ ފަހިކޮށްދީފައެވެ. މިއީ ފަތުރުވެރިންނަށް ލިބޭ ވަރަށް ބޮޑު ލުޔެކެވެ.
ވިޔަފާރިތަކަށް ބަލާއިރު، ދިރާގުން ދަނީ ރިސޯޓުތަކާއި، ހޮޓާތަކާއި، ގެސްޓްހައުސްތަކުގެ އިތުރުން ޓްރެވަލް އޮޕަރޭޓަރުންނަށް ހާއްސަ ބީޓޫބީ ހައްލުތައް ފޯރުކޮށްދެމުންނެވެ. ސެކިއުއާ ކަނެކްޓިވިޓީއާއި ކްލައުޑް ސޮލިއުޝަންތަކުގެ އެހީގައި، ފަތުރުވެރިކަމުގެ ވިޔަފާރިތަކުގެ ދުވަހީ އޮޕަރޭޝަންތައް ޑިޖިޓަލްކޮށް، ފަސޭހަކަމާއެކު މެނޭޖުކުރުމުގެ ގާބިލުކަން ދިރާގުން ހޯދައިދެއެވެ.
ދިރާގުގެ ފުޅާ ވިއުގަޔާއެކު، މީހުން ދިރިއުޅޭ ރަށްރަށުގައި ހިންގާ ގެސްޓްހައުސް ވިޔަފާރިތަކަށް ވެސް ފަތުރުވެރިކަމުގެ އިގުތިސާދުގައި ފުރިހަމަޔަށް ބައިވެރިވުމުގެ ފުރުސަތު ވަނީ ހުޅުވިފައެވެ. ވަރުގަދަ އިންޓަނެޓް ކަނެކްޝަނެއް އޮތުމުން، ރަށު ފަތުރުވެރިކަން ކުރިއަރުވައި، މުޅި ދުނިޔެއަށް އެ ރަށްރަށުގެ އިޝްތިހާރުތައް ފޯރުކޮށްދިނުމަށް ފަސޭހަވެއެވެ.
މީގެ އިތުރުން، ދިރާގުން ދަނީ ފަތުރުވެރިކަމާއި ހޮސްޕިޓާލިޓީ ދާއިރާގެ މުހިންމު އެގްޒިބިޝަންތަކާއި، ކޮންފަރެންސްތަކާއި، އެވޯޑުތަކުގައި އަމަލީ ގޮތުން ބައިވެރިވެ، އެހީތެރިކަން ފޯރުކޮށްދެމުންނެވެ. އަދި ރާއްޖެއަށް ގިނަ އަދަދެއްގެ މީހުން ޒިޔާރަތްކުރާ ބައިނަލްއަގުވާމީ ކުޅިވަރު މުބާރާތްތަކާއި ލައިފްސްޓައިލް އިވެންޓްތައް ސްޕޮންސާކޮށް، ރާއްޖެއަކީ ހަމައެކަނި ސަގާފީ ފަތުރުވެރިކަމުގެ މަންޒިލެއް ނޫންކަން މުޅި ދުނިޔެއަށް ދައްކުވައިދިނުމުގައި ދިރާގުން މުހިންމު ދައުރެއް އަދާކުރެއެވެ.
މުސްތަގުބަލުގެ ޑިޖިޓަލް ފަތުރުވެރިކަން
ކުރިމަގުގައި ފަތުރުވެރިކަން ވެގެންދާނީ އިތުރަށް ޑިޖިޓަލްކުރެވިފައިވާ، އިންޓެލިޖެންޓް އަދި ޒަމާނީ ޓެކްނޮލޮޖީގެ މައްޗަށް ބިނާވެފައިވާ ސިނާއަތަކަށެވެ. ކޮންމެ ފަތުރުވެރިޔަކަށް ހާއްސަ، ޕާސަނަލައިޒްޑް ހިދުމަތްތަކެއް ފޯރުކޮށްދިނުމަށް އިންޑަސްޓްރީން ތައްޔާރުވަމުން އަންނައިރު، ދިރާގުން ދަނީ މި ބަދަލުތަކާ އެއްވަރަށް އުމްރާނީ ތަރައްގީއާއި ހިދުމަތްތައް ފުޅާކުރަމުންނެވެ.
ދުނިޔޭގެ ފެންވަރުގައި ވާދަވެރި މަންޒިލެއްގެ ގޮތުގައި ރާއްޖެ ދެމިއޮތުމަށް ބޭނުންވާ ޑިޖިޓަލް ބާރުވެރިކަން ފޯރުކޮށްދީ، ފަތުރުވެރިންނަށް ފުރިހަމަ ތަޖުރިބާއެއް ހޯދައިދިނުމުގައި ދިރާގު ދެމިއޮންނާނެ ކަމަށް އެ ކުންފުނިން ބުނެއެވެ.