ލޭ ހޯދުމުގައި ދިމާވާ ދަތިތައް ހައްލުކުރުމަށް ޓަކައި، އެ މީހަކު ހުރި ތަނަކަށް ގޮސް ލޭ ނެގޭނެ މޯބައިލް ޚިދުމަތެއް ވަރަށް އަވަހަށް ފެށުމަށް ތައްޔާރުވަމުންދާކަމަށް ސިއްހަތާއި އާއިލާއާއި އިޖުތިމާއީ އެހީއާބެހޭ ވަޒީރު ގީލާ ޢަލީ ވިދާޅުވެއްޖެއެވެ.
ޓެލެވިޜަން މޯލްޑިވްސްގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން ގީލާ ވަނީ ލޭ ހަދިޔާކުރާނެ މީހުން ހޯދުމުގައި ގިނަ ދަތިތަކެއް ދިމާވާކަން ފާހަގަކުރައްވާފައެވެ.
"ދެން އަޅުގަނޑުމެންނަށް އެނގޭ ލޭ ދިނުމަށްޓަކައި އަންނަ ފަރާތްތައް ބައެއް ފަހަރު ހަމަ އެ ކްރައިޓީރިއާ އެ މީހުންގެ ފުރިހަމަ ނުވުމުގެ ސަބަބުން ލޭ ނުދެވޭ ގޮތް އެބަވޭ. މިހާލަތަށްވެސް ވަރަށް ގިނަ ދިވެހިން އެބަ ހުށަހެޅިގެންދޭ." ވަޒީރު ވިދާޅުވިއެވެ.
ލޭ ހަދިޔާކުރުމަށް ދިމާވާ އިތުރު ގޮންޖެހުމެއްގެ ގޮތުގައި ވަޒީރު ވަނީ، ވަގުތުގެ ދަތިކަމުގެ ސަބަބުން ލޭ ދިނުމަށް ސެންޓަރުތަކަށް ދާން ބައެއް މީހުންނަށް އުނދަގޫވާކަން ފާހަގަކުރައްވާފައެވެ. މިކަމަށް ލުޔެއް ހޯދައިދިނުމަށް ޓަކައި އެ މީހަކު ހުރި ތަނަކަށް ގޮސް ލޭ ނެގޭނެ އިންތިޒާމު ހަމަޖެއްސުމުގެ ޚިދުމަތެއް ތަޢާރަފުކުރުމަށް ތައްޔާރުވަމުންދާކަމަށް ވަޒީރު ވިދާޅުވިއެވެ.
"...އަޅުގަނޑުމެން މަސައްކަތްކުރަމުން މި ގެންދަނީ ލޭ ދިނުމަށް އެދޭ ފަރާތްތަކަށް ވީހާ ވެސް ލުއިފަސޭހަ ގޮތްތަކެއް ހޯދައި ދިނުމަށް. މިގޮތުން އަޅުގަނޑުމެން ވަރަށް އަވަހަށް ތައާރަފު ކުރާނަން ލޭ ދިނުމަށްޓަކައި މޯބައިލް ޚިދުމަތެއް، ރައްޔިތުންނާ ވީހާ ވެސް ގާތަށް ގޮސް އެ މީހުންގެ ލޭ ނަގާ އަދި ސްޓޯރޭޖް ފެސިލިޓީތަކަށް ގެންދިއުން." ވަޒީރު ވިދާޅުވިއެވެ.
ލޭ ލިބުމުގެ ދަތިކަން ޙައްލުކުރުމަށްޓަކައި ލޭ ރައްކާކުރެވޭ ހަތަރު ބްލަޑް ބޭންކެއް އަތޮޅުތަކުގައި ގާއިމުކޮށްފައިވާ ކަމަށް ވެސް ގީލާ ވިދާޅުވިއެވެ. އެފަދަ ފިޔަވަޅުތައް އެޅިކަމުގައި ވީނަމަވެސް ލޭ ލިބުމުގައި ދިމާވާ ދަތިކަން ހައްލުކުރެވޭނީ ލޭ ހަދިޔާކުރާ މީހުން އިތުރުކުރެވިގެންކަން އޭނާ ފާހަގަކުރެއްވިއެވެ.
ލޭ ބޭނުންވާ ކަންކަމުގެ ތެރޭގައި، ތެލަސީމިއާ ކުދިންނާއި އެކިއެކި އޮޕަރޭޝަންތަކާއި ބައްޔަކާ ގުޅިގެން ލޭ އަޅަން ޖެހުން ހިމެނެއެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތަކުން ދައްކާ ގޮތުގައި މި ވަގުތު ރާއްޖޭގައި 668 މީހަކު ގަވައިދުން ތެލެސީމިއާ ބަލީގައި ލޭ އަޅަމުންދެއެވެ. މީގެ ތެރެއިން 163 މީހުން ރެޖިސްޓާ ކޮށްފައިވަނީ މާލޭ ސަރަހައްދުގައި ކަމަށާއި އަތޮޅުތަކުގައި ރެޖިސްޓާ ކޮށްފައިވަނީ 505 މީހުން ކަމަށް އެ އިދާރާގެ ތަފާސްހިސާބުތަކުން ދައްކައެވެ.