މި އަހަރުގެ ސެޕްޓެމްބަރު މަހުގެ ނިޔަލަށް ޖުމްލަ 37،038 މީހުން ގައިންގަޔަށް ނާރާ ބައްޔަށް ސްކްރީންކުރިއިރު، އޭގެ ތެރެއިން 21.2 އިންސައްތަ މީހުންނަކީ ކޮލެސްޓްރޯލް މައްޗަށްދާ މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.
ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން ނެރެފައިވާ ބަޔާނެއްގައި އެޗްޕީއޭއިން ވަނީ ހިތާއި ލޭހޮޅިތަކުގެ ބައްޔަކީ ގައިންގަޔަށް ނާރާ ބަލިތަކުގެ ތެރެއިން ދުނިޔޭގައި އެންމެ ގިނައިން މީހުން މަރުވާ އެއްބަލިކަން ފާހަގަކޮށްފައެވެ.
ރާއްޖޭގައި ވެސް ގައިންގަޔަށް ނާރާ ބަލިތައް ގިނަވެ، މަރުވާ މީހުންގެ 84 އިންސައްތައަކީ އެދަފަ ބަލިތައް ތަހައްމަލް ކުރަމުންދާ މީހުންކަމަށް އެޗްޕީއޭއިން ވަނީ ބުނެފައެވެ. އެގޮތުން 2020 އިން 2021 އަށް ހެދި ސާވޭއިން ދައްކާ ގޮތުން، ރާއްޖޭގައި 15 އަހަރާއި 65 އަހަރާ ދެމެދުގެ 4.7 އިންސައްތަ މީހުންނަކީ ހިތުގެ ބައްޔާއި ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުންކަމަށް އެޗްޕީއޭއިން ވަނީ ފާހަގަކޮށްފައެވެ.
އައިޖީއެމްއެޗް: ހިތުގެ ބަލިތަކުން ރައްކާތެރިވުމަށް، ދުރާލާ ފިޔަވަޅު އެޅުން މުހިންމު ކަމަށް ސިއްހީ މާހިރުން ވިދާޅުވޭ --ސަން ފޮޓޯ/ މާނިއު މުހައްމަދުއެޗްޕީއޭއިން ބުނީ، މި އަހަރުގެ ސެޕްޓެންބަރު މަހުގެ ނިޔަލަށް 37،038 މީހުން ގައިންގަޔަށްނާރާ ބައްޔަށް ސްކްރީންކުރިއިރު، އޭގެތެރެއިން 21.2 އިންސައްތަ މީހުންނަކީ ކޮލެސްޓްރޯލް މައްޗަށްދާ މީހުން ކަމަށާއި 10.4 އިންސައްތަ މީހުންނަކީ ހަކުރުބަލި ތަހައްމަލްކުރާ މީހުން ކަމަށެވެ. މީގެ އިތުރުން 18 އިންސައްތަ މީހުންނަކީ ލޭ މައްޗަށްދާ މީހުންކަމަށް އެޗްޕީއޭއިން ވަނީ ބުނެފައެވެ.
ޑރ. ޢަބްދުލް ޢަޒީޒު ޙަމީދުގެ ސިއްހަތު ބްލޮގްގައި ލިޔުއްވާފައިވާ ގޮތުން، ލޭގައި ކޮލެސްޓްރޯލްގެ މިންވަރު މަތިވުމަކީ ހިތުގެ ބަލިތަކާއި ލޭހޮޅިތައް ހަރުވުން ފަދަ ބަލިތަކަށް މަގުފަހިކުރާ ކަމެކެވެ. އެގޮތުން ލޭ ހޮޅިތަކުގެ ތެރޭގައި ކޮލެސްޓްރޯލް ނުވަތަ ސަރުބީ ޖަމާވެ، ލޭ ހޮޅިތަކުގައި ލޭ ދައުރުކުރުމުގައި ހުރަސްތަކާ ކުރިމަތިވެއެވެ.
އޭގެ ސަބަބުން، ހަށިގަނޑުގެ އެކި ހިސާބުތަކަށް ލޭ ފޮނުވައިދޭ މިންވަރު ދަށްވެ، ހިތްހުއްޓުން، ހިތުގެ މަސްގަނޑުން ބައެއް މަރުވުން، އަދި ވާގިނެތޭ ބަލި ޖެހުން ފަދަ ކަންތައްތައް ކުރިމަތި ކުރުވައެވެ.
ލޭ މައްޗަށް ދިއުމަކީ އެއްވެސް އަލާމާތެއް ނުފެނި، ހިތާއި ސިކުނޑީގެ ނާރުތަކަށް ގެއްލުންދޭ ކަމެއް ކަމަށް ޑަބްލިއުއެޗްއޯއިން ފާހަގަކުރެއެވެ.
ފާހަގަކޮށްލެވޭ ގޮތުގައި ދުނިޔޭގެ ނިސްބަތުން ބަލާއިރު ވެސް އެންމެ ގިނަ މީހުން މަރުވަނީ ހިތުގެ ބަލިތަކުގައެވެ. ޑަބްލިއުއެޗްއޯއިން އަންދާޒާކުރާ ގޮތުގައި 2022 ވަނަ އަހަރު 19.8 މިލިއަން މީހުން ހިތުގެ ބަލިތަކުގައި މަރުވެފައިވެއެވެ. ވޯލްޑް ހާޓް ފެޑެރޭޝަނުން މި އަދަދު 20.5 މިލިއަނަށްވުރެ މަތިވާނެ ކަމަށް ލަފާކުރެއެވެ.
އެޗްޕީއޭއިން ވަނީ ހިތުގެ ދުޅަހެޔޮކަމަށްޓަކައި ކުރެވިދާނެ ބައެއް ކަންކަން ވެސް އާންމުކޮށްފައެވެ. އެގޮތުން:
- ރަނގަޅަށް ނިދުން
- ހަރަކާތްތެރިވެ ހެލިފެލިވެ އުޅޭ މިންވަރު އިތުރުކުރުން
- ފައިދާހުރި ކާނާ ކެއުމަށް އާދަކުރުން
- ދުންފަތުގެ އިސްތިއުމާލާއި ވޭޕް ބޭނުންކުރުމުން ދުރުހެލިވުން
- ސިއްހީ ގޮތުން ރައްކާވެ ތިބުމަށް އާދަވެ ޓެސްޓުތައް ހެދުން
ރާއްޖޭގެ އާބާދީ ފަސް ލައްކައަށް އަރާއިރު، ރަށްތައް އުފެދިފައިވާ ގޮތުން، ކުއްލި ސިއްހީ ފަރުވާ ހޯދުމުގައި ގޮންޖެހުންތަކެއް ހުރެއެވެ. އެހެންކަމުން، ބަލިވުމުގެ ކުރިން ރައްކާތެރިވުމުގެ ފިޔަވަޅުތައް އެޅުމަކީ ވަރަށް މުހިންމު ކަމެކެވެ.