ރާއްޖޭގައި ފުރަތަމަ ފަހަރަށް ވިޔަފާރި އުސޫލުން ކަކުނި ފަލަކުރުމުގެ ނުވަތަ "މަޑް ކްރެބް ފެޓަނިން"ގެ މަޝްރޫއެއް ހިންގުމުގެ ހުއްދަދީފިއެވެ.
އެގްރިކަލްޗާ މިނިސްޓްރީން، މި ހުއްދަ ދޫކޮށްފައިވަނީ މެރިޓޯލް ޕްރައިވެޓް ލިމިޓެޑް ނަމަކަށް ކިޔާ އަމިއްލަ ކުންފުންޏަކަށެވެ. މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ގދ. ފިޔޯރީގައެވެ.
މިނިސްޓްރީން ބުނީ، މި މަޝްރޫއުގެ މަގުސަދަކީ ފިޔޯރީގެ "ކުޅިޔެ ވަޅަގަނޑޭ" ކުޅިން ނަގާ ކުދި ކަކުނި، ޚާއްސަ ކޮށިތަކެއްގައި ފަލަކޮށްގެން ވިޔަފާރި އުސޫލުން ރާއްޖެއާއި ރާއްޖޭން ބޭރުގެ ބާޒާރަށް ނެރެވޭނެ ފެންވަރަށް ތަރައްގީކުރުމެވެ.
"މަޑް ކްރެބް ފެޓަނިން"އަކީ ބަރުދަން ލުއި ނުވަތަ ކުދި ކަކުނި ވަކި ޚާއްސަ ކޮށިތަކެއްގައި ނުވަތަ ފެންގަނޑުތަކެއްގައި ބައިތިއްބައިގެން ކާންދީ، ކުރު މުއްދަތެއްގެ ތެރޭގައި އެ އެއްޗެހީގެ މަސްގަނޑު ފުރިހަމަކޮށް ބަރުދަން އިތުރުކުރުމެވެ.
މިގޮތުން، 20 ދުވަހާއި އެއް މަސްދުވަހުގެ ތެރޭގައި، ގިނައިން ޕްރޮޓީން އެކުލެވޭ ކާނާ ދީގެން މި ކަކުނިތައް ބާޒާރުގައި އެންމެ އަގުބޮޑު ފެންވަރަށް ފަލަކުރެވޭ ކަމަށް ތަޖުރިބާ ކާރުން ބުނެއެވެ.
ފިޔޯރީގައި ކުދި ކަކުނި ފަލަކުރުމުގެ މަޝްރޫއެއް ފަށާއިރު، ރާއްޖޭގެ އެކި ހިސާބުތަކުގެ ކުށިތަކާއި ޗަސްބިންތަކުގައި އެކި ބާވަތްތަކުގެ ކަކުނިތައް އުޅެއެވެ. އެ ރަށްތަކުގައި ކަކުނިތައް އެކި ގޮތްގޮތަށް ކައިއުޅެއެވެ.