އާޓިފިޝަލް އިންޓެލިޖެންސް (އޭއައި) ވަސީލަތްތަކުގައި ރައްކާތެރިކަމުގެ ފިޔަވަޅުތަކާއި ފާރަވެރިވުމުގެ ގާބިލުކަން ގާއިމުކޮށްފައި ނުވުމަކީ "އިންތިހާއަށް ޒިންމާދާރުކަން ކުޑަ" ކަމެއް ކަމަށް މައިކްރޯސޮފްޓްގެ ކޯ-ފައުންޑަރު ބިލް ގޭޓްސް ވިދާޅުވެއްޖެއެވެ.
އޭއައި ތަރައްގީކުރުމުގެ ދުވެލި މަޑުޖައްސާލުމަށް އޭއައި އުފައްދާ އިސް ކުންފުނިތަކުގެ ސީއީއޯއިން އެއްބަސްވަމުންދާ ދަނޑިވަޅެއްގައި، ގޭޓްސް ވަނީ އެކަމަށް ތާއީދުކުރައްވައި އޭއައި ގަވާއިދުތަކުން އިންތިޒާމުކޮށް ރައްކާތެރިކަމުގެ ފިޔަވަޅުތައް ވަރުގަދަކުރުމަށް ގޮވާލައްވާފައެވެ.
އެންބީސީ ނިއުސްގެ "މީޓް ދަ ޕްރެސް" ޕްރޮގްރާމަށް ދެއްވި އިންޓަވިއުއެއްގައި ގޭޓްސް ފާހަގަކުރެއްވި ގޮތުގައި، ކޮންމެ އޭއައި ނިޒާމެއްގައިވެސް ރައްކާތެރިކަމުގެ ފިޔަވަޅުތަކާއި ސުޕަވައިޒް ކުރެވޭނެ އިންތިޒާމުތައް ހުރުމަކީ މަޖުބޫރު ކަމަކަށް ހަދަންޖެހެއެވެ. މިފަދަ ރައްކާތެރިކަމުގެ ފިޔަވަޅުތައް އެޅުމުގެ ގޮތުން، އެންތުރޯޕިކް ކުންފުނިން ވަނީ އެ ކުންފުނީގެ އެންމެ ފަހުގެ އޭއައި މޮޑެލްތައް މިނިވަންކަމާއެކު ވަޒަންކުރުމަށް އެކްސެންޗާ ތާޑް-ޕާޓީ އެވެލުއޭޓަރެއްގެ ގޮތުގައި ހަމަޖައްސާފައެވެ.
އޭއައި ހަލުވިކަމާއެކު ކުރިއަރަމުންދާ ދުވެލި ކޮންޓްރޯލްކުރުމަށް އެކި ހައްލުތައް ހުށަހެޅެމުންދާއިރު، ކެލިފޯނިއާގެ ގަވަރުނަރު ގޭވިން ނިއުސަމް ވަނީ "ކިލް ސުވިޗް" އެއް ގާއިމުކުރުމުގެ ހުށަހެޅުމެއް ހުށަހަޅުއްވާފައެވެ. މި ހުށަހެޅުމާ ބެހޭގޮތުން ސުވާލުކުރުމުން ގޭޓްސް ވިދާޅުވީ، ކިލް ސުވިޗަކާ ދެކޮޅު ކަމަށް އެއްވެސް އިރަކު ވިދާޅުނުވާނެ ކަމަށެވެ. ނަމަވެސް އެއީ ކުރިމަތީގައި އޮތް އެންމެ ބޮޑު ނުރައްކަލަށް އޮތް ހައްލެއް ނޫން ކަމަށް އޭނާ ވިދާޅުވިއެވެ.
ގޭޓްސް ވިދާޅުވި ގޮތުގައި މިވަގުތު ކުރިމަތިވެފައިވާ އެންމެ ކުއްލި އަދި ނުރައްކާތެރި މައްސަލައަކީ، ނުބައި ނިޔަތެއް އޮތް ފަރާތްތަކުން އޭއައިގެ ބާރު ބޭނުންކޮށްގެން ބަޔޮޓެރަރިޒަމް (ބައިލޮޖިކަލް ނުރައްކާތެރި ހަމަލާތައް) ދިނުމާއި، ބޮޑެތި މާލީ އޮޅުވާލުންތަކާއި މަކަރާއި ހީލަތް ހިންގުމެވެ. ނުބައި އެދުންތައް ހުންނަ މީހުން އޭއައި ބޭނުންކުރުމަކީ މިހާރު ކުރިމަތިވެފައިވާ އެންމެ ނުރައްކާތެރި ކަންތައް ކަމަށާއި، އެފަދަ މީހުން އެންމެ ފަހުގެ އޭއައި ވަސީލަތްތައް ބޭނުންކުރުމާ ހަމައަށް ދިއުމުން އުފެދޭ ހަތިޔާރަށްވުރެ ނުރައްކާތެރި ހަތިޔާރެއް މީގެ ކުރިން އުފެދިފައި ނުވާކަމަށްވެސް އޭނާ ވިދާޅުވިއެވެ.
ގާނޫނުތައް ހެދުމުގެ ދާއިރާއަށް ބަލާއިރު، އޭއައި ކުންފުނިތަކުގައި ހިމަނަންޖެހޭ ރައްކާތެރިކަމުގެ ފިޔަވަޅުތަކާއި ފާރަވެރިވާނެ ގޮތްތަކާމެދު މަޝްވަރާކުރުމުގައި ގާނޫނު ތަންފީޒުކުރާ އިދާރާތަކާއި ސިޔާސީ ފަރާތްތަކުން ބައިވެރިވުމަށް ގޭޓްސް ތާއީދުކުރެއްވިއެވެ.
މައިކްރޯސޮފްޓްގެ ކުރީގެ އެގްޒެކެޓިވް ވިދާޅުވި ގޮތުގައި މިފަދަ އުސޫލުތަކުގެ ސަބަބުން އިންޑަސްޓްރީއަށް ބައެއް އިތުރު އިދާރީ ހަރަދުތަކާއި މަސައްކަތްތައް އިތުރުވި ނަމަވެސް، އެކަމުގެ ސަބަބުން ކުންފުނިތަކުގެ މަސައްކަތްތަކަށް ބޮޑު މަޑުޖެހުމެއް ނުވަތަ ހުރަހެއް ނާންނާނެއެވެ.