ދިރުވާލައިގެން ގިނަ އަދަދެއްގެ މަސްތުވާތަކެތި ރާއްޖެއަށް އެތެރެކުރި މައްސަލައިގައި ހައްޔަރުކުރި ނޭޕާލްގެ ދެ މީހުންގެ ބަންދަށް ކްރިމިނަލް ކޯޓުން 30 ދުވަސް ޖަހައިފިއެވެ.
މި މައްސަލައިގައި ހައްޔަރުކޮށްފައި ވަނީ ނޭޕާލަށް ނިސްބަތްވާ 47 އަހަރުގެ ފިރިހެނެއް ކަމަށްވާ ނިއްކަ ތަމަންގް އާއި 40 އަހަރުގެ އަންހެނެއް ކަމަށްވާ އީތްރާނީ ގަލެއެވެ.
ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، މި ދެ މީހުންގެ ހަށިގަނޑުން ޖުމްލަ 53 ބުލެޓް (650 ގްރާމްގެ މަސްތުވާތަކެތި) ވަނީ ފެނިފައެވެ.
ކްރިމިނަލް ކޯޓުގެ ޤާޟީ ޢަބްދުﷲ ޞަބީޙް ނެރުއްވި އަމުރުގައިވާ ގޮތުން، މި ދެ މީހުން 30 ދުވަހުގެ މުއްދަތަށް ބަންދުކުރަން އަމުރުކޮށްފައި ވަނީ ދޫނިދޫ ކަސްޓަޑީ ޖަލުގައެވެ.
މި ދެ މީހުންނަކީ މަސްތުވާތަކެތި ދިރުވާލައިގެން ރާއްޖެއަށް އެތެރެކުރުމުގެ ތުހުމަތުގައި ހައްޔަރުކުރި ދެ މީހުންނެވެ. އެމީހުން ހައްޔަރުކޮށް، ފުރަތަމަ ބަންދާމެދު ގޮތެއް ނިންމުމަށް ކޯޓަށް ހާޒިރުކުރިއިރު ސިއްހީ ފަރުވާ ދެމުންދާތީ، އެ ފަހަރު ބަންދު މުއްދަތުގެ މަޖިލިސް ކުރިއަށް ގެންދިޔައީ އެ ދެ މީހުންގެ ޣައިރު ހާޒިރުގައެވެ. އެ ފަހަރު ކޯޓުން ދިނީ ތިން ދުވަހުގެ ބަންދު މުއްދަތެކެވެ.
ނަމަވެސް ސިއްހީ ހާލަތު ރަނގަޅުވެ ކޯޓަށް ހާޒިރުކުރުމުން، ކުށް ކުރިކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާތީއާއި، މުޖުތަމަޢުގެ ސަލާމަތަށް ނުރައްކާވެދާނެތީ، ކޯޓުން ވަނީ އެ ދެ މީހުންގެ ބަންދަށް 30 ދުވަސް އިތުރުކޮށްދީފައެވެ.
ރާއްޖެއަށް ބިދޭސީން މަސްތުވާތަކެތި އެތެރެކުރުމުގެ މައްސަލަތައް ފަހަކަށް އައިސް ވަނީ އިތުރުވެފައެވެ. އަދި މި ފަދަ މައްސަލަތައް ހުއްޓުވުމަށްޓަކައި، ވަކި މިންވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް ޤާނޫނު ވަނީ އިޞްލާޙްކޮށްފައެވެ.