ނިދި މަދުވުމުން އޭގެ އަސަރު ފިލައިދިޔަ ނަމަވެސް، އޭގެ ސަބަބުން ހަށިގަނޑުގައި އިންސިއުލިން މަސައްކަތްކުރާ މިންވަރު ދަށްކޮށްލާ ކަމަށް ސިއްހީ މާހިރުން ވިދާޅުވެއްޖެއެވެ.
މަދު ގަޑިއިރުތަކެއްގެ ނިދި މަދުވުމުން ވެސް ޖެހިގެން އަންނަ ދުވަހު ވަރުބަލިކަން އިހުސާސް ކުރެވުނު ނަމަވެސް، އޭގެ އަސަރުތައް ހަމައެކަނި ވަރުބަލިކަމަށްވުރެ މާ ފުންކަން ދިރާސާތަކުން ދައްކައެވެ.
އިތުރުވަމުންދާ ހޯދުންތަކުން އެނގޭ ގޮތުގައި، ކުރު މުއްދަތަކަށް ނިދި މަދުވުމަކީވެސް ހަށިގަނޑުން ގްލޫކޯޒް (ހަކުރު) ބޭނުންކުރާ ގޮތަށް ބަދަލުތަކެއް އަންނަ ކަމެކެވެ. އަދި އެންމެ ދެ ރެއަކު ނިދި މަދުވުމުންވެސް ވަގުތީގޮތުން އިންސިއުލިންގެ މަސައްކަތް ހީނަރުވެ، މިއީ "ޓައިޕް 2"ގެ ހަކުރުބަލި ޖެހުމަށް މަގުފަހިވާ މައިގަނޑު ސަބަބަކަށް ވެދާނެއެވެ.
ނިދި މަދުވުމުން ހަށިގަނޑުގެސްޓްރެސް އިތުރުވެ، ކޯޓިޒޯލް ހުންނަ މިންވަރު މަތިވާ ކަމަށް ސިއްހީ މާހިރުން ވިދާޅުވޭ--ފޮޓޯ/އިންޑިއަންއެކްސްޕްރެސް
މީގެ ހަތަރު އަހަރު ކުރިން 'ކިއުރިއަސް' މަޖައްލާގައި ޝާއިއުކޮށްފައިވާ ދިރާސާއަކުން ދައްކާގޮތުގައި، ނިދި މަދުވުމާއި އިންސިއުލިންއަށް ހަށިގަނޑު ދޭ އިޖާބަ ދަށްވުމާ ދެމެދު ވަރުގަދަ ގުޅުމެއްވެއެވެ.
އެ ދިރާސާއިން އެނގޭ ގޮތުގައި، ރެޔަކު ހަތް ގަޑިއިރަށް ވުރެ މަދުން ނިދާނަމަ ހަށިގަނޑުގައި އިންފްލެމޭޝަން އުފެދި، ހޯމޯންތަކަށް ބަދަލު އައިސް، ހަށިގަނޑުގެ ގުދުރަތީ ގަޑި ނުވަތަ 'ސާކޭޑިއަން ރިދަމް'އަށް ބުރޫއަރައެވެ.
މީގެ ސަބަބުން އިންސިއުލިންގެ މަސައްކަތަށް ހުރަސްއެޅެއެވެ. މީގެ ފުރިހަމަ ސައިންޓިފިކް ސަބަބުތައް އަދިވެސް ދަނީ ހޯދަމުންނެވެ. ނަމަވެސް، މި ހޯދުންތަކުން ކަށަވަރުވަނީ ސިއްހަތަށް ފައިދާހުރި ކާނާއާއި ކަސްރަތު ފަދައިން، ހަށިގަނޑުގެ މެޓަބޮލިޒަމް ރަނގަޅަށް ބެހެއްޓުމަށްޓަކައި އަރާމު ނިދީގެ މުހިއްމުކަމެވެ.
މެޑް ފަސްޓް އީއެންޓީ ސެންޓަރުގެ ކޮންސަލްޓަންޓް، ޑރ. ރާޖޭޝް ބަރަދްވާޖް ވިދާޅުވާ ގޮތުގައި، ދެ ރެއަކު ނިދި މަދުވުމުންވެސް ވަގުތީގޮތުން އިންސިއުލިންގެ މަސައްކަތް ހީނަރުވާކަމުގެ ވަރުގަދަ ހެކި އެބަހުއްޓެވެ. ނަމަވެސް އޭގެ މާނައަކީ ދުޅަހެޔޮ މީހަކަށް ކުއްލިއަކަށް ހަކުރުބަލި ޖެހުމެއް ނޫންކަމަށް އޭނާ ވިދާޅުވިއެވެ.
ޑރ. ބަރަދްވާޖް ތަފްސީލުކޮށްދެއްވި ގޮތުގައި، އެކެއް ނުވަތަ ތިން ރެއަކު ނިދި މަދުވުމުން ހަށިގަނޑުގެ ސެލްތަކުން އިންސިއުލިންއަށް ދޭ އިޖާބަ ދަށްވެއެވެ. ނަތީޖާއެއްގެ ގޮތުން، ލޭގައި ހަކުރު ހުންނަ މިންވަރު އާދައިގެ މިންގަނޑެއްގައި ހިފެހެއްޓުމަށްޓަކައި ޕެންކްރިއަސްއިން އިތުރަށް އިންސިއުލިން އުފައްދަން މަޖުބޫރުވެއެވެ.
ނިދި މަދުވުމުގެ ސަބަބުން 'ސިމްޕަތެޓިކް ނާވަސް ސިސްޓަމް' ހީވާގިވެ، އިންސިއުލިންގެ ފައިދާ އިތުރަށް ކުޑަކޮށްލާ ކަމަށް ސިއްހީ މާހިރުން ވަނީ ވިދާޅުވެފައި--ފޮޓޯ/އިންޑިއަންއެކްސްޕްރެސް
ނަމަވެސް އުފާވެރި ޚަބަރަކީ، ދުޅަހެޔޮ މީހުންގެ ހަށިގަނޑަށް އަންނަ މި ބަދަލުތަކަކީ ވަގުތީ އަދި އަލުން ރަނގަޅު ކުރެވޭނެ ބަދަލުތަކެއްކަން ޑރ. ބަރަދްވާޖް ވަނީ ފާހަގަކުރައްވާފައެވެ. އެހެންނަމަވެސް، މަސްތަކެއް ނުވަތަ އަހަރުތަކެއް ވަންދެން ތަކުރާރުކޮށް މިގޮތަށް ނިދި މަދުވާނަމަ، ހަކުރުބަލީގެ ކުރީގެ މަރުހަލާ ނުވަތަ 'ޕްރީޑައިބެޓިކްސް' އާއި ޓައިޕް 2 ހަކުރުބަލި ޖެހުމުގެ ފުރުސަތު ބޮޑުކަމަށް އޭނާ ވިދާޅުވެއެވެ.
ޑރ. ބަރަދްވާޖް ވިދާޅުވާ ގޮތުގައި، ނިދި މަދުވުމުން ލޭގެ ހަކުރު ކޮންޓްރޯލްކުރާ ބައެއް ހޯމޯންތަކާއި ހަށިގަނޑުގެ ނިޒާމުތަކަށް ބުރޫއަރާއިރު، މީގެ ތެރެއިން އެންމެ ބޮޑު ދައުރެއް އަދާކުރަނީ ހަށިގަނޑުގެ ސްޓްރެސް ހޯމޯން ކަމަށްވާ 'ކޯޓިޒޯލް'އެވެ.
"ނިދި މަދުވުމުން ހަށިގަނޑުގެ ސްޓްރެސް އިތުރުވެ، ކޯޓިޒޯލް ހުންނަ މިންވަރު މަތިވޭ. ކޯޓިޒޯލްގެ ސަބަބުން ލޭގައި ހަކުރު ހުންނަ މިންވަރު އިތުރުވެ، އިންސިއުލިންއަށް ސެލްތަކުން ދޭ އިޖާބަ ދަށްކޮށްލާ," އޭނާ ވިދާޅުވިއެވެ.
ނިދި މަދުވުމުގެ ސަބަބުން 'ސިމްޕަތެޓިކް ނާވަސް ސިސްޓަމް' ހީވާގިވެ، އިންސިއުލިންގެ ފައިދާ އިތުރަށް ކުޑަކޮށްލައެވެ. ހަމައެއާއެކު، ނިދި މަދުވުމުން ބަނޑުހައިކަން ކޮންޓްރޯލްކުރާ ހޯމޯންތަކަށް ބަދަލު އާދެއެވެ.
މީގެ ނަތީޖާއެއްގެ ގޮތުން، ފޮނި އެއްޗިއްސާއި ކެލޮރީ ގިނަ ކާނާއަށް އޮންނަ ޝައުގުވެރިކަން އިތުރުވެ، މާ ގިނައިން ކެވޭގޮތް ދިމާވާ ކަމަށް ޑރ. ބަރަދްވާޖް ފާހަގަކުރެއްވިއެވެ.
ދުޅަހެޔޮ ސިއްހަތެއްގައި ހުންނަ މީހަކު މަދު ފަހަރަކު ނިދި މަދުވުމުން ދާއިމީ ގެއްލުމެއް ލިބުމަކީ ދުރު ކަމެކެވެ. ކުރު މުއްދަތަކަށް މެޓަބޮލިޒަމްއަށް އަންނަ ގިނަ ބަދަލުތަކަކީ، ފަހުން ރަނގަޅަށް ނިދައި އަރާމުކުރުމުން އަލުން އިއާދަކުރެވިދާނެ ބަދަލުތަކެއް ކަމަށް ސިއްހީ މާހިރުން ވިދާޅުވެއެވެ.
ނުރައްކާ އޮތީ ނިދި މަދުވުމަކީ އާދައަކަށް ވެފައިވާނަމައެވެ. ތަކުރާރުކޮށް ނިދި މަދުވުމުގެ ސަބަބުން އިންސިއުލިން ރެސިސްޓެންސް އުފެދުމާއި، ހޯމޯންތަކުގެ ބެލެންސް ގެއްލުމާއި، ކާހިތްވުން އިތުރުވެ ބަރުދަން އިތުރުވުމަށް މަގުފަހިވެއެވެ.