އިންޑިއާގެ ކޮޗިންގައި ހުންނަ އަމްރީތާ ހޮސްޕިޓަލަށް އާސަންދައިގެ ދަށުން އާ ބަލިމީހުން ފޮނުވުން މި ވަގުތަށް މެދުކަނޑާލާފައިވާ ކަމަށް އާސަންދަ ކުންފުނިން މިއަދު ބުނެފިއެވެ.
އަމްރީތާއަކީ ގިނަ އަދަދެއްގެ ދިވެހިން އާސަންދައިގެ ދަށުން ފަރުވާއަށް ގޮސް އުޅޭ، ދިވެހިންގެ ތެރޭގައި ވަރަށް މަޝްހޫރު ހޮސްޕިޓަލެކެވެ. އެހެންކަމުން މި ބަދަލުގެ ސަބަބުން އާސަންދައިގެ ދަށުން އެ ހޮސްޕިޓަލަށް ދާން ގަސްތުކުރާ އާ ބަލިމީހުންނަށް ވަގުތީ ގޮތުން މަޑުޖައްސާލަން ޖެހޭނެއެވެ.
އާސަންދަ ކުންފުނިން ބުނި ގޮތުގައި، އާ ޕޭޝެންޓުން ފޮނުވުން ހުއްޓާލި ނަމަވެސް، މިހާރު ވެސް އެ ހޮސްޕިޓަލުން ފަރުވާ ހޯދަމުންދާ ދިވެހި ބަލިމީހުންނަށް ކަންބޮޑުވުމެއް ނެތެވެ. އެގޮތުން، މިހާރު ފަރުވާ ހޯދަމުންދާ މީހުންނަށް އޮންނަ އުސޫލުގެ ތެރެއިން އާސަންދައިގެ ޚިދުމަތް މެދުކެނޑުމެއްނެތި ލިބެމުންދާނެ ކަމުގެ ޔަގީންކަން އެ ކުންފުނިން ދީފައިވެއެވެ.
ނަމަވެސް، އަމްރީތާ ހޮސްޕިޓަލަށް އަލުން އާ ބަލިމީހުން ފޮނުވަން ފެށޭނެ ވަކި ދުވަހެއް އަދި ބުނަން ނޭނގޭ ކަމަށް އެ ކުންފުނިން ފާހަގަކުރިއެވެ.
މީގެ ކުރިން ވެސް ރާއްޖެއިން ބޭރުގެ ބައެއް ހޮސްޕިޓަލްތަކުން ވަގުތީ ގޮތުން އާސަންދައިގެ ޚިދުމަތް މެދުކެނޑުމުގެ ހާލަތްތައް ދިމާވެފައިވެއެވެ. ދިވެހިރާއްޖޭގެ ސިއްހީ ނިޒާމުގެ ތެރެއިން، ދައުލަތުގެ ބަޖެޓުން ކޮންމެ އަހަރަކު ވެސް އެތައް ސަތޭކަ މިލިއަން ރުފިޔާއެއް ރާއްޖެއިން ބޭރުގެ ހޮސްޕިޓަލްތަކުން ފަރުވާ ހޯދުމަށް އަންނަނީ ޚަރަދުކުރަމުންނެވެ.