ފީފާ ވޯލްޑް ކަޕު 2026 ގެ ގްރޫޕް ފިޔަވަހީގެ ފަހު މެޗުގައި އުރުދުންއާ ދެކޮޅަށް ކުޅެ 3-1 އިން އާޖެންޓީނާ ކާމިޔާބުކުރި މެޗުގެ 80 ވަނަ މިނެޓުގައި ކާމިޔާބުކުރި ހިލޭޖެހުމާއެކު އާޖެންޓީނާގެ ކެޕްޓަން ލިއޮނަލް މެސީ އަނެއްކާވެސް ރެކޯޑެއް ހަދައިފިއެވެ.
މިއީ މެސީގެ ކެރިއަރުގައި ވޯލްޑް ކަޕް މުބާރާތްތަކުގައި ކާމިޔާބުކުރި 19 ވަނަ ލަނޑެވެ. މި ލަނޑާއެކު އޭނާ ވެގެން ގޮސްފައިވަނީ ދުނިޔޭގެ އެންމެ ބޮޑު ފުޓްބޯޅަ މުބާރާތުގެ ޖެހިޖެހިގެން ހަތް މެޗުގައި ލަނޑު ޖެހި ފުރަތަމަ ފިރިހެން ކުޅުންތެރިޔާއަށެވެ.
މީގެ ކުރިން މި ރެކޯޑް ހިއްސާކުރަމުން ދިޔައީ ޖެހިޖެހިގެން ހަ މެޗުގައި ލަނޑު ޖަހާފައިވާ ޖަސްޓް ފޮންޓެއިން އާއި ޖެއިރްޒީނިއޯ އެވެ.
މި މެޗު ފެށުނުއިރު މެސީ އިނީ ބެންޗުގައެވެ. އެއީ ގްރޫޕް ޖޭގެ ފުރަތަމަ ދެ މެޗުން އާޖެންޓީނާ މޮޅުވެ، ގްރޫޕްގެ އެއްވަނަ ޔަގީންވެފައި އޮތުމުންނެވެ. މެސީ ވަނީ ފުރަތަމަ ދެ މެޗުގައި ޖުމްލަ 5 ލަނޑު ޖަހާފައެވެ.
އޭގެތެރޭގައި އަލްޖީރިއާ ކޮޅަށް ހެދި ހެޓްރިކަކާއި އޮސްޓްރިއާ ކޮޅަށް ޖެހި ދެ ލަނޑު ހިމެނެއެވެ. މެސީގެ 39 ވަނަ އުފަންދުވަސް ފާހަގަކުރިތާ ތިން ދުވަސްފަހުން ކުޅުނު މި މެޗުގައި ކޯޗު ލިއޮނަލް ސްކަލޯނީ އޭނާ ކުޅެން އެރުވީ މެޗުގެ 60 ވަނަ މިނެޓުގައެވެ.
މެސީ އެންމެ ފަހުން ވޯލްޑް ކަޕް މެޗެއްގައި ލަނޑެއް ނުޖަހާ ދިޔައީ 2022 ވަނަ އަހަރުގެ ވޯލްޑް ކަޕްގެ ގްރޫޕް ސްޓޭޖުގައި ޕޮލެންޑާ ދެކޮޅަށް ކުޅުނު މެޗުގައެވެ.
އެ މެޗުގައި އޭނާ އަތުން ޕެނަލްޓީއެއް ބޭކާރުވިއިރު، އެއީ އެ ފަހަރުގެ މުބާރާތުގެ ޗެމްޕިއަންކަން އާޖެންޓީނާ ހޯދިއިރު މެސީއަށް ލަނޑެއް ނުޖެހިދިޔަ ހަމައެކަނި މެޗެވެ.
އެ މެޗަށްފަހު މެސީ ވަނީ އޭނާ ކުޅުނު ފަހު 10 ވޯލްޑް ކަޕް މެޗުގައި 13 ލަނޑު ޖަހާފައެވެ. އޭގެ ތެރޭގައި 2022 ގެ ފައިނަލްގައި ފްރާންސް ކޮޅަށް ޖެހި ދެ ލަނޑުވެސް ހިމެނެއެވެ.