ފީފާ ވޯލްޑް ކަޕް 2026 ގެ ފައިނަލް މެޗަށްފަހު، މުބާރާތުގެ ޗެމްޕިއަން ޓީމަށް ތަށި ހަވާލުކުރުމުގައި އެމެރިކާގެ ރައީސް ޑޮނަލްޑް ޓްރަމްޕް ބައިވެރިވެވަޑައިގަންނަވާނެކަން, ފީފާގެ ރައީސް ޖިއާނީ އިންފަންޓީނޯ ކަށަވަރުކޮށްދެއްވައިފިއެވެ.
އެމެރިކާގެ ފޮކްސް އެންޑް ފްރެންޑްސް ޝޯއަށް ދެއްވި އިންޓަވިއުއެއްގައި އިންފަންޓީނޯ ވިދާޅުވީ، ފައިނަލް މެޗު ބައްލަވާލެއްވުމަށް ރައީސް ޓްރަމްޕާއެކު އޭނާ އިންނަވާނެ ކަމަށާއި، އަދި ދެ ބޭފުޅުން އެކުގައި މުބާރާތުގެ ތަށި މޮޅުވާ ޓީމާ ހަވާލުކުރައްވާނެ ކަމަށެވެ.
މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ ޖުލައި 19 ވަނަ ދުވަހު އެމެރިކާގެ ނިއު ޔޯކުގައި ހުންނަ ނިއު ޖާޒީ ސްޓޭޑިއަމް ނުވަތަ މެޓްލައިފް ސްޓޭޑިއަމްގައެވެ.
ޓްރަމްޕާއި އިންފަންޓީނޯއާ ދެމެދު ގާތް ގުޅުމެއް އޮންނައިރު، އިންފަންޓީނޯ ވަނީ އެ ގުޅުން ދިފާއުކޮށް ގިނަ ވާހަކަތަކެއް ދައްކަވާފައެވެ. އެގޮތުން ޓްރަމްޕާއެކު އަބަދުވެސް ގާތް ގުޅުމެއް އޮންނަ ކަމަށް އިންފަންޓީނޯ ވިދާޅުވިއެވެ.
މިއީ ފަހުގެ ތާރީޚެއްގައި ވޯލްޑް ކަޕްގެ ތަށި ހަވާލުކުރުމުގެ އުސޫލަށް ގެނައި ބޮޑު ބަދަލެކެވެ. އެންމެ ފަހުން 2018 އަދި 2022 ގެ ވޯލްޑް ކަޕްތަކުގައި ތަށި ހަވާލުކޮށްދެއްވީ ހަމައެކަނި ފީފާގެ ރައީސެވެ.
ނަމަވެސް، މިދިޔަ އަހަރު އެމެރިކާގައި ބޭއްވި ކްލަބް ވޯލްޑް ކަޕްގެ ފައިނަލުގައި ޗެލްސީ މޮޅުވުމުންވެސް ޓްރަމްޕް ވަނީ ތަށި ހަވާލުކުރުމުގެ ރަސްމިއްޔާތުގައި ބައިވެރިވެވަޑައިގަންނަވާފައެވެ.
އެ ފަހަރު ތަށި ހަވާލުކުރުމަށްފަހު ސްޓޭޖުން ފައިބައިވަޑައިގަތުމުގެ ބަދަލުގައި، ކުޅުންތެރިންނާއެކު އުފާފާޅުކުރުމުގައި ޓްރަމްޕް މަޑުކުރެއްވުމުން ބައެއް ކުޅުންތެރިން ހައިރާންވިއެވެ.
ޗެލްސީގެ ކެޕްޓަން ރީސް ޖޭމްސް ބުނި ގޮތުގައި ޓްރަމްޕް ސްޓޭޖުން ފައިބާނެ ކަމަށް އޭނާއަށް ހީވި ނަމަވެސް، ރައީސް ބޭނުންވީ މަޑުކުރައްވާށެވެ. އަދި އެޓީމުގެ ފޯވާޑް ކޯލް ޕާމާވެސް ވަނީ އެވަގުތު ސްޓޭޖްމަތިން ޓްރަމްޕް ފެނުމުން ކަންކުރަންވީ ގޮތް ނޭނގި ހުންނަން ޖެހުނުކަމަށް ބުނެފައެވެ.
މިފަހަރުގެ 48 ޓީމު ހިމެނޭ ވޯލްޑް ކަޕް ޖޫން 11 ގައި ފެށުނު ފަހުން ރައީސް ޓްރަމްޕް މުބާރާތާ ބެހޭގޮތުން މާގިނަ ވާހަކަތަކެއް ދައްކަވާފައެއް ނުވެއެވެ. އަދި މިހާތަނަށް އެއްވެސް މެޗަކަށް ވަޑައިގެންފައެއްވެސް ނުވެއެވެ.
ފީފާގެ ރައީސް އިންފަންޓީނޯ ވަނީ މީގެކުރިން ފީފާގެ ނަމުގައި ސުލްހައިގެ އެވޯޑެއް ތައާރަފްކޮށް ޓްރަމްޕަށް އަރުއްވާފައެވެ.
ޖުލައި 19 ގައި ބޭއްވުމަށް ހަމަޖެހިފައިވާ ފައިނަލް މެޗުގެ ރަސްމިއްޔާތުގައި ކެނެޑާ އަދި މެކްސިކޯގެ އިސްވެރިންނަށްވެސް ދައުވަތު ދޭނެކަމަށް ބެލެވެއެވެ.