ރާއްޖޭގެ އެންމެ ފުންނާބުއުސް އެއް ދީނީ އިލްމުވެރިޔާ ކަމަށްވާ ޝައިޚް އިސްމާއީލް މުޙައްމަދު، އުމުރުފުޅުން 85 އަހަރުގައި މިއަދު އަވަހާރަވެއްޖެއެވެ.
ޝައިޚް އިސްމާއީލް އަވަހާރަވިކަން އިއުލާނުކޮށްފައިވާއިރު، އޭނާއަކީ ރާއްޖޭގައި އިސްލާމީ ތަޢުލީމު ފެތުރުއްވުމަށް ގިނަގުނަ މަސައްކަތްތަކެއް ކުރައްވައި، ގިނަ ބައެއްގެ ލޯތްބާއި އިހުތިރާމު ހޯއްދަވާފައިވާ ބޭފުޅެކެވެ. އޭނާ އަވަހާރަވުމަކީ ދިވެހި ގައުމަށާއި އިސްލާމީ އުއްމަތަށް ލިބުނު ފުން ހިތާމައެއް ކަމަށް ގިނަ ބަޔަކު ދަނީ ފާހަގަކުރަމުންނެވެ.
ޝައިޚް އިސްމާއީލްގެ މައްޗަށް ކަށުނަމާދު ކުރުން އޮންނާނީ މިއަދުގެ މެންދުރު ނަމާދަށްފަހު، މާލޭގެ އިސްލާމީ މަރުކަޒުގައެވެ.
ޝެއިޚް އިސްމާއީލްގެ މުޅި ހަޔާތްޕުޅު ހޭދަކުރެއްވީ ދިވެހި މުޖުތަމައުގައި ދީނީ ހޭލުންތެރިކަން އިތުރުކުރުމަށާއި، އިސްލާމީ ރިވެތި އުސޫލުތައް އަށަގެންނެވުމަށެވެ. އެގޮތުން، އޭނާ ވަނީ އެތައް ޖީލެއްގެ ދަރިވަރުންނަށް ދީނީ އިލްމު އުނގަންނައިދެއްވައި، ހެޔޮ މަގު ދައްކަވައިދެއްވާފައެވެ.
ދ. އަތޮޅު މީދޫއަށް އުފަން ޝައިޚް އިސްމާއީލަކީ 1970 ގެ އަހަރުތަކުގެ ތެރޭގައި ސައުދީ އަރަބިއްޔާގެ މަދީނާގެ އިސްލާމިކް ޔުނިވާސިޓީން ތަޢުލީމު ހާސިލުކުރެއްވި ފުރަތަމަ ދިވެހި ދަރިވަރެވެ. ޝެއިޚް ދިގު ހިދުމަތުގެ ތާރީހުގައި، ދީނީ އެކި މައުލޫއުތަކަށް 40 ފޮތް ލިޔުއްވާފައިވެއެވެ. ޝައިޚް އިސްމާއީލްގެ އިލްމީ މަސައްކަތްޕުޅުތަކުގެ ތެރޭގައި، ދިވެހި ބަހުން ދީނީ ފޮތްތައް ލިޔުއްވުމާއި ތަރުޖަމާކުރެއްވުން ހިމެނެއެވެ. މީގެ ސަބަބުން، އަރަބި ބަސް ނޭނގޭ އާންމު ރައްޔިތުންނަށް ދީނީ މައުލޫމާތު އުނގެނުމަށް ވަރަށް ބޮޑު ލުއިފަސޭހަކަމެއް ލިބިގެންދިޔައެވެ.
މި ފޮތްތަކަކީ މިއަދުވެސް ރާއްޖޭގެ އެކި ކަންކޮޅުތަކުގައި ދީނީ މައުލޫމާތު ހޯދުމަށް އާންމުންނާއި ދަރިވަރުން ބޭނުންކުރަމުންދާ މުހިންމު މަސްދަރުތަކެކެވެ. މީގެ އިތުރުން، ފަނޑިޔާރުކަން ކުރެއްވި ދުވަސްވަރު، އަދުލުއިންސާފު ގާއިމުކުރުމުގައާއި ޝަރުއީ ނިޒާމު ހަރުދަނާކުރުމަށް ޝެއިޚް ވަނީ ގިނަގުނަ މަސައްކަތްތަކެއް ކުރައްވާފައެވެ.
އިސްލާމީ ތަޢުލީމަށް ޝެއިޚް ކޮށްދެއްވި ހިދުމަތްތަކުގެ އަގުވަޒަންކުރުމުގެ ގޮތުން، 2025 ވަނަ އަހަރުގެ އޭޕްރީލް މަހުގެ 19 ވަނަ ދުވަހު އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ވަނީ ރާއްޖޭގެ ތާރީހުގައި ފުރަތަމަ ފަހަރަށް ދިން އޮނަރަރީ ޑޮކްޓަރޭޓްގެ ޝަރަފު ޝެއިޚްއަށް އަރުވާފައެވެ. މި ޝަރަފު ޝެއިޚްއާ ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އައިޔޫއެމްގެ ދަސްވެނިވުމުގެ ރަސްމިއްޔާތުގައި މި ޝަރަފު އެރުވުމަކީ ރާއްޖޭގެ މަތީ ތަޢުލީމުގެ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށް އޭރު ވަނީ ފާހަގަކޮށްފައެވެ.
ޝައިޚް އިސްމާއީލް އަވަހާރަވުމާ ގުޅިގެން، ރައީސް ޑރ. މުޙައްމަދު މުޢިއްޒު ވަނީ އެކްސްގައި ކުރެއްވި ޕޯސްޓެއްގައި ޝެއިޚްގެ އާއިލާއަށް ތައުޒިޔާ ފޮނުއްވާފައެވެ. ރައީސް ވިދާޅުވި ގޮތުގައި، ޝައިޚް އިސްމާއީލް އަވަހާރަވި ޚަބަރު އެއްސެވީ ފުން ހިތާމަޔާއެކުގައެވެ. ރާއްޖޭގައި އިސްލާމީ ތަޢުލީމު ކުރިއެރުވުމަށް ޝައިޚް އިސްމާއީލް ކޮށްދެއްވި ހިދުމަތްތަކުގެ މައްޗަށް އަލިއަޅުވާލައްވަމުން، ރާއްޖޭގެ ގިނަ ދަރިވަރުންނަށް ރާއްޖެއިން ބޭރުން ތަޢުލީމު ހާސިލުކުރުމުގެ ފުރުސަތުތައް ހޯއްދަވައިދެއްވުމަށް ޝެއިޚް ކުރެއްވި މަސައްކަތްޕުޅުތައް ރައީސް ފާހަގަކުރެއްވިއެވެ. އަދި ޝެއިޚް އުނގަންނައިދެއްވި ގިނަ ދަރިވަރުންތަކެއް މިއަދުވެސް ގައުމަށް އަގުހުރި ޚިދުމަތްތަކެއް ކުރަމުންދާކަން ރައީސްގެ މެސެޖުގައި ފާހަގަކުރައްވާފައިވެއެވެ.
ހަމައެއާއެކު، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވެސް ވަނީ ޝައިޚް އިސްމާއީލްގެ ޚިދުމަތްތަކަށް ތާރީފުކުރައްވައި ތައުޒިޔާ ވިދާޅުވެފައެވެ. ވަޒީރު ވިދާޅުވި ގޮތުގައި، ޝައިޚް އިސްމާއީލަކީ “ރާއްޖޭގައި އިސްލާމީ ތަޢުލީމާއި ތަރުބިއްޔަތަށް އަގުހުރި ހިދުމަތްތަކެއް ކޮށްދެއްވި ފުންނާބުއުސް ދީނީ އިލްމުވެރިއެއް” ކަމަށެވެ.
ޝައިޚް އިސްމާއީލްގެ ދަރިވަރުންގެ ގޮތުގައި ތަޢުލީމު ހާސިލުކުރި ގިނަ ބޭފުޅުން މިއަދު ރާއްޖޭގެ އެކި މުއައްސަސާތަކުގައި އިސް މަގާމުތައް ފުރުއްވަމުން ގެންދަވާއިރު، އެއީ ޝެއިޚްގެ ޚިދުމަތުގެ ދިރިހުރި ނަމޫނާއެއް ކަމަށް ގިނަ ބަޔަކު ގަބޫލުކުރެއެވެ.