ދުވާލެއްގެ މައްޗަށް އިތުރަށް ފަސް މިނެޓު ކަސްރަތު ކުރުމުން ނުވަތަ އިށީނދެގެން އިންނަ ވަގުތު މަދުކުރުމުން، އިންސާނާގެ އުމުރު ދިގުވެ، އަވަހަށް މަރުވުމުގެ ނުރައްކާ ކުޑަކޮށްދޭކަން ސިއްހީ އާ ދިރާސާއަކުން ހާމަވެއްޖެއެވެ.
ސިއްހީ ދާއިރާގެ މަޝްހޫރު މަޖައްލާއެއް ކަމަށްވާ "ދަ ލާންސެޓް ޖާނަލް"ގައި 2026 ވަނަ އަހަރުގެ ޖެނުއަރީ މަހު ޝާއިއުކޮށްފައިވާ މި ދިރާސާއިން ދައްކާ ގޮތުގައި، ދިރިއުޅުމުގެ އާދަތަކަށް ގެންނަ ކުދިކުދި ބަދަލުތަކުންވެސް އާންމު ސިއްހަތަށް ބޮޑެތި ފައިދާތަކެއް ކުރެއެވެ.
ގިނަ ބަޔަކު ގަބޫލުކުރާ ގޮތުގައި ސިއްހަތު ރަނގަޅުކުރުމަށްޓަކައި ގިނަ ވަގުތުތަކެއް ވަންދެން ބުރަ ކަސްރަތުތަކެއް ކުރަން ޖެހެއެވެ. ނަމަވެސް މި ދިރާސާއިން ސާބިތުކޮށްދިނީ، ދުވަހުގެ ތެރޭގައި ހަރަކާތްތެރިވެ އުޅޭ މިންވަރު ކުޑަ ގޮތަކަށް އިތުރުކޮށްލުމުންވެސް އޭގެ ނަތީޖާ ފެންނާނެ ކަމެވެ.
ޖިމެއްގައި ކަސްރަތު ކުރަނީ --
މި ދިރާސާ ކުރިއަށް ގެންގޮސްފައިވަނީ އެމެރިކާ، ނޯވޭ، ސްވިޑަން އަދި އިނގިރޭސިވިލާތުން ޖުމްލަ 135،000 އަށްވުރެ ގިނަ މީހުންގެ މައުލޫމާތު އެއްކޮށްގެންނެވެ. އޭގެ ތެރޭގައި އެމެރިކާ، ނޯވޭ އަދި ސްވިޑަންގެ ހަތް ގްރޫޕަކުން 40،327 މީހުންނާއި، އިނގިރޭސިވިލާތުގެ ޔޫކޭ ބަޔޯބޭންކް މެދުވެރިކޮށް 94،719 މީހުންގެ މައުލޫމާތު ހިމެނެއެވެ.
މި ދިރާސާގައި މައިގަނޑު ގޮތެއްގައި ބަލާފައިވަނީ ހިތުގެ ވިންދު އަވަސްކޮށްދޭ ފަދަ މެދުމިނުން ފެށިގެން ބުރަކޮށް ކުރާ ކަސްރަތުތަކަށާއި، އެއްތަނެއްގައި އިށީނދެގެން ހޭދަކުރާ ވަގުތަށެވެ. ދިރާސާގެ ބައިވެރިންގެ ހަރަކާތްތައް މޮނިޓާކޮށްފައިވަނީ ހަށިގަނޑުގައި ހަރުކުރެވޭ ޑިވައިސްތަކެއް މެދުވެރިކޮށެވެ. މިއީ މީގެ ކުރިން ހަމައެކަނި މީހުން ދޭ މައުލޫމާތަށް ބިނާކޮށް ހަދާފައިވާ ދިރާސާތަކާ ހިލާފަށް، ސީދާ ޓެކްނޮލޮޖީގެ އެހީގައި ޑޭޓާ އެއްކޮށްގެން ކޮށްފައިވާ އިތުބާރު ހުރި ދިރާސާއެކެވެ. މިގޮތަށް މައުލޫމާތު އެއްކުރުމުން، މީހުން އަމިއްލައަށް އަންދާޒާކޮށްފައި ބުނާ އަދަދުތަކަށްވުރެ ސައްހަ ނަތީޖާއެއް ލިބިފައިވާ ކަމަށް ދިރާސާކުރި ފަރާތްތަކުން ފާހަގަކޮށްފައިވެއެވެ.
ދިރާސާއިން ދެއްކި ގޮތުގައި، އެންމެ މަދުން ހަރަކާތްތެރިވެ އުޅޭ މީހުން ދުވާލަކު އިތުރަށް ފަސް މިނެޓު ކަސްރަތު ކުރުމުން، އަވަހަށް މަރުވުމުގެ ނުރައްކާ ހަ އިންސައްތަ ކުޑަކޮށްދެއެވެ. އަދި އެންމެ ހަރަކާތްތެރި މީހުން ފިޔަވައި އެހެން ހުރިހާ އެންމެން މިގޮތަށް ފަސް މިނެޓު އިތުރުކޮށްފިނަމަ، އަވަހަށް މަރުވުމުގެ ނުރައްކާ 10 އިންސައްތަ ކުޑަކުރެވެއެވެ. މީގެ އިތުރުން، އިށީނދެގެން އިންނަ ވަގުތު މަދުކުރުމުން ލިބޭ ފައިދާތައްވެސް މި ދިރާސާގައި ފާހަގަކޮށްފައިވެއެވެ. އެގޮތުން، ދުވާލެއްގެ މައްޗަށް އިށީނދެގެން އިންނަ ވަގުތުން 30 މިނެޓު މަދުކޮށްފިނަމަ، އެންމެ މަދުން ހަރަކާތްތެރިވާ މީހުންގެ އަވަހަށް މަރުވުމުގެ ނުރައްކާ ތިން އިންސައްތަ ކުޑަވެގެންދެއެވެ. އަދި އާންމުކޮށް ހުރިހާ އެންމެންގެ ނިސްބަތުން ބަލާއިރު މި އަދަދު ހަތް އިންސައްތައަށް އަރައެވެ.
އެމެރިކާގެ ޖޯޖް ވޮޝިންޓަން ޔުނިވާސިޓީގެ ކްލިނިކަލް އެސޯސިއޭޓް ޕްރޮފެސަރު އަދި ސީއެންއެންގެ ވެލްނެސް އެކްސްޕާޓް ޑރ. ލީއާނާ ވެން ވިދާޅުވި ގޮތުގައި، މި ދިރާސާގެ އެންމެ މުހިންމު ހޯދުމަކީ ކަސްރަތު ކުރުމުގެ މިންގަނޑުތަކާ މެދު ދެކޭ ގޮތް ބަދަލުކުރުމެވެ. އޭނާ ފާހަގަކުރެއްވި ގޮތުގައި، އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) ފަދަ އިދާރާތަކުން ހަފުތާއަކު 150 މިނެޓު ކަސްރަތު ކުރުމަށް ލަފާދީފައި އޮތް ނަމަވެސް، އެ މިންވަރަށް ނުކުރެވޭ ހާލަތްތަކުގައިވެސް ކުޑަ މިންވަރަކުން ހަރަކާތްތެރިވުމަކީ ފައިދާހުރި ކަމެކެވެ.
ޑރ. ވެން ވިދާޅުވީ، ކަސްރަތު ކުރުމަކީ ހަމައެކަނި ޖިމަށް ދިއުން ނޫން ކަމަށާއި، ދުވަހުގެ ތެރޭގައި ހަރަކާތްތެރިވުން އިތުރުކުރުމަށް އިސްކަންދިނުން މުހިންމު ކަމަށެވެ. ގިނަ ބަޔަކަށް ކަސްރަތު ކުރުމަކީ ބުރަ ކަމެއްގެ ގޮތުގައި އިހުސާސްކުރެވުނު ނަމަވެސް، މި ދިރާސާއިން އެނގިގެންދިޔައީ ކޮންމެ ފިޔަވަޅަކީވެސް ސިއްހަތަށް ފައިދާކުރާނެ ކަމެއް ކަމެވެ.
މި ދިރާސާގެ ނަތީޖާއިން ދައްކާ ގޮތުގައި، އުމުރުން ދުވަސްވީ މީހުންނާއި، ދާއިމީ ބަލިތައް ތަހައްމަލުކުރާ މީހުންނާއި، އަދި ވަޒީފާގެ ގޮތުން ގިނަ ވަގުތު އިށީނދެގެން ތިބެންޖެހޭ މީހުންނަށް މި ކުދި ބަދަލުތަކުން އެންމެ ބޮޑު ފައިދާއެއް ކުރާނެއެވެ. ކަސްރަތު ކުރުމަށް އުނދަގޫވާ މީހުންނަށް ފެށުމެއްގެ ގޮތުން ކުރެވިދާނެ ކަންކަމުގެ ތެރޭގައި އަންނަނިވި ކަންކަން ހިމެނޭ ކަމަށް ޑރ. ވެން ވިދާޅުވިއެވެ:
ބާރަށް ހިނގާލަން ދިއުން
ލިފްޓުގެ ބަދަލުގައި ސިޑި ބޭނުންކުރުން
ގޭތެރެ ކުނިކަހައި ސާފުކުރުން ފަދަ ކަންކަން ކުރުން
އޭނާ އިތުރަށް ވިދާޅުވި ގޮތުގައި، އެންމެ މުހިންމު ކަމަކީ ކޮންމެ ދުވަހަކުވެސް ކޮންމެވެސް މިންވަރަކަށް ހަރަކާތްތެރިވުން އާދައަކަށް ހެދުމެވެ. ކުދި ބަދަލުތަކަކުން ފަށައިގެން، ދުވަހުން ދުވަހަށް އެކަން ތަކުރާރުކުރުމުން، ދިގު މުއްދަތެއްގައި އޭގެ އެދެވޭ އަސަރު ފެންނާނެ ކަމަށް ޑރ. ވެން ފާހަގަކުރެއްވިއެވެ.