ދުނިޔޭގެ ގިނަ ބައެއްގެ މެދުގައި މިހާރުވެސް ބޮޑު މަގުބޫލުކަމެއް ހޯދަމުން އަންނަ އިނގިރޭސިވިލާތުގެ ކުރީގެ ފުޓްބޯޅަ ލެޖެންޑް ޑޭވިޑް ބެކަމްގެ ޝަރަފުގައި 'ހޮލީވުޑް ވޯކް އޮފް ފޭމް'ގައި ތަރިއެއް ޖަހައިފިއެވެ.
'ހޮލީވުޑް ވޯކް އޮފް ފޭމް'ގައި ތަރި ބެހެއްޓުމަށް އިއްޔެ ބޭއްވި ރަސްމިއްޔާތުގައި ޑޭވިޑްގެ އަންހެނުން ވިކްޓޯރިއާ ބެކަމް އާއި ގާތް އެކުވެރިޔާ އަދި މަޝްހޫރު އެކްޓަރު ޓޮމް ކްރޫޒް ބައިވެރިވެ، ޑޭވިޑް މިހާތަނަށް ހޯދާފައިވާ ކާމިޔާބީތައް ވަނީ ފާހަގަކޮށްފައެވެ.
މި ރަސްމިއްޔާތުގައި ވާހަކަ ދައްކަމުން ހޮލީވުޑްގެ އެންމެ އަގުބޮޑު އެކްޓަރުންގެތެރޭ ހިމެނޭ ޓޮމް ކްރޫޒް ވަނީ މެންޗެސްޓާ ޔުނައިޓެޑްގައި ބެކަމް ހޭދަކުރި ފާހަގަކޮށްލެވޭ ކާމިޔާބު ދުވަސްތަކަށް އަލިއަޅުވާލާފައެވެ.
ވަކިން ޚާއްސަކޮށް، 1996 ވަނަ އަހަރު ވިމްބަލްޑަންއާ ދެކޮޅަށް ކުޅުނު މެޗުގައި ދަނޑުގެ މެދުތެރެއިން ބެކަމް ފޮނުވާލި ތާރީޚީ ގޯލުގެ ހަނދާންތައް ކްރޫޒް އާކުރިއެވެ.
ކްރޫޒް ބުނި ގޮތުގައި އެ ބޯޅަ ވައިގެ ތެރޭގައި އޮތީ އެންމެ 3.5 ސިކުންތަށެވެ. ނަމަވެސް އެ ވަގުތުކޮޅަކީ މުޅި ކުޅިވަރުގެ ތާރީޚުގައި އަދި އެ މަންޒަރު ދުށް ކޮންމެ މީހެއްގެ ހިތުގައި މިއަދާ ހަމައަށްވެސް ބިންވަޅު ނެގިފައިވާ ހަނދާނެއްގެ ގޮތުގައި ކްރޫޒް ވަނީ ސިފަކޮށްފައެވެ.
ޑޭވިޑް އާއި ވިކްޓޯރީއާ ތިން ކުދިން ކަމަށްވާ، ރޯމިއޯ، ކްރޫޒް އަދި ހާޕާއާ އެކު--ފޮޓޯ/އޭބީސީ
މީގެ އިތުރުން، 1998 ވަނަ އަހަރުގެ ފީފާ ވޯލްޑް ކަޕްގައި އިންގްލެންޑަށް ބެކަމް ޖަހައިދިން ހިތްގައިމު ހިލޭ ޖެހުންވެސް ކްރޫޒް ފާހަގަކުރިއެވެ.
ބެކަމްގެ މި ހުނަރުވެރި ކުޅުމުގެ ސަބަބުން "ބެންޑް އިޓް ލައިކް ބެކަމް"ގެ ނަމުގައި ފިލްމެއްވެސް އުފައްދާފައިވެއެވެ. ކްރޫޒް, ބެކަމް ސިފަކުރީ، ދުނިޔޭގެ އެކި ކަންކޮޅުތަކުގައި ފުޓްބޯޅަ ކުޅުމަށާއި ބެލުމަށް ޖީލުތަކަކަށް ހިތްވަރު ދިން ޝަޚްސިއްޔަތެއްގެ ގޮތުގައެވެ.
މި ހަފްލާގައި ބެކަމްގެ އަންހެނުން އަދި ކުރީގެ ލަވަކިޔުންތެރިޔާ، ވިކްޓޯރިއާ ބެކަމް ވާހަކަދައްކަމުން ބުނީ، މިފަދަ ޝަރަފެއް ހާސިލުކުރެވެނީ ހަމައެކަނި ފިލްމީ ދާއިރާގައި އުޅެގެން ނޫން ކަމަށާއި، އެއީ ބުރަ މަސައްކަތާއި އަޒުމާއި ވަރުގަދަ ތަަސައްވަރެއް އޮވެގެން ކުރެވޭނެ ކަމެއް ކަމަށް މިހާރު ގަބޫލުކުރެވޭ ކަމަށެވެ.
އަދި ބެކަމްގެ ނަން 'ވޯކް އޮފް ފޭމް'ގެ ތާރީޚުގެ ތެރޭގައި ހިމެނިގެން ދިއުމަކީ ވިކްޓޯރިއާއަށް ލިބުނު ވަރަށް ބޮޑު އުފަލެއް ކަމަށްވެސް އޭނާ ވަނީ ބުނެފައެވެ.
ޑޭވިޑްގެ ދެމަފިރިން ހޮލީވުޑްގެ މަޝްހޫރު އެކްޓަރު ޓޮމް ކްރޫޒްއާ އެކު--ފޮޓޯ/އޭބީސީ
މި އަހަރުގެ ފީފާ ވޯލްޑް ކަޕް ކުރިއަށްދާ މި ދަނޑިވަޅުގައި 'ވޯކް އޮފް ފޭމް'ގެ ޝަރަފު ލިބުމަކީ ވަރަށް އާދަޔާ ޚިލާފު އިހުސާސެއް ކުރެވޭ ކަމެއްގެ ގޮތުގައި ބެކަމް ސިފަކުރިއެވެ.
ޑޭވިޑް އިތުރަށް ބުނީ އޭނާއަކީ އަބަދުވެސް ހުވަފެން ދެކޭ މީހެއް ކަމަށާއި، ނަމަވެސް އާދައިގެ އާއިލާއަކުން އައި އިނގިރޭސި ފުޓްބޯޅަ ކުޅުންތެރިއަކަށް މިފަދަ މަތީ ޝަރަފެއް ލިބިދާނެ ކަމަށް ދުވަހަކުވެސް ހީނުކުރާ ކަމަށެވެ.
މި ރަސްމިއްޔާތުގައި ބެކަމްގެ ދަރިފުޅު ހާޕާ އާއި ފިރިހެން ދަރިން ކަމަށްވާ ރޯމިއޯ އަދި ކުރޫޒް ބައިވެރިވިއެވެ. ނަމަވެސް ދޮށީ ދަރިފުޅު ބްރޫކްލިން މި ރަސްމިއްޔާތުން ނުފެނެއެވެ.
މީގެ އިތުރުން މަޝްހޫރު ބަތަލާ އީވާ ލޮންގޯރިއާ އާއި އޭނާގެ ފިރިމީހާ ހޯޒޭ ބަސްޓަންގެ އިތުރުން ފުޓްބޯޅަ ކޯޗު ރޮބީ ކީން އާއި އޭނާގެ އަންހެނުން ކްލޯޑިން ކީންވެސް މި ރަސްމިއްޔާތުގައި ބައިވެރިވިއެވެ.
މެންޗެސްޓަ ޔުނައިޓެޑް، ރެއާލް މެޑްރިޑް، އަދި ޕީއެސްޖީ ފަދަ ޓީމުތަކަށް ކުޅެފައިވާ ބެކަމް އަކީ ޕްރޮފެޝަނަލް ކެރިއަރުގައި ތަފާތު ހަތަރު ގައުމެއްގެ ލީގު ކާމިޔާބުކުރި ފުރަތަމަ އިނގިރޭސި ކުޅުންތެރިޔާއެވެ.
ފުޓްބޯޅަ ކުޅުން ހުއްޓާލުމަށްފަހު ބެކަމް ވަނީ ބޮޑެތި ވިޔަފާރިތަކާއި އިންވެސްޓްމަންޓްތަކުގައި ބައިވެރިވެފައެވެ۔ އޭގެތެރެއިން އެންމެ ފާހަގަކޮށްލެވެނީ އެމެރިކާގެ މޭޖާ ލީގް ސޮކާ (އެމްއެލްއެސް)ގައި ވާދަކުރާ އިންޓަ މިއާމީގެ އެއް ހިއްސާދާރު އަދި ރައީސްގެ ގޮތުގައި އޭނާ އަދާކުރާ ދައުރެވެ۔