ސެމްސަންގުން ދެން އެންމެ އަވަހަށް ނެރުމަށް ތައްޔާރުވަމުންދާ 'ގެލެކްސީ އެސް27 ސީރީޒް ފޯނުތަކުގެ ކެމެރާ ލޭއައުޓަށް ބޮޑު ބަދަލެއް ގެނައުމަށް އެ ކުންފުނިން މަސައްކަތް ކުރަމުން ދާކަން ހާމަވެއްޖެއެވެ.
މިއީ ފާއިތުވި އަހަރުތަކުގައި އެ ކުންފުނީގެ ފްލެގްޝިޕް ފޯނުތަކުގެ ފަހަތުގެ ޑިޒައިނަށް ގެންނަ އެންމެ ފާހަގަކޮށްލެވޭ ބަދަލަށް ވުމުގެ ފުރުސަތު ބޮޑު ކަމަށް ޓެކްނޮލޮޖީ ޚަބަރުތައް ބުނެއެވެ.
މި ބަދަލު ގެންނަން ޖެހުނު މައިގަނޑު ސަބަބެއް ކަމަށް ބެލެވެނީ 'ކިޔުއައި2' މެގްނެޓިކް ޗާޖިން އަށް ފޯނުގެ އެތެރޭގައި ޖާގަ ހެދުމެވެ. މެގްނެޓިކް އެކްސެސަރީޒްތައް ފަސޭހަކަމާއެކު ބޭނުންކުރެވޭ ގޮތަށް ފޯނުގެ އެތެރޭގެ ލޭއައުޓާއި ކެމެރާ ހުންނަ ތަރުތީބަށް ބޮޑެތި ބަދަލުތަކެއް ގެނައުމަށް ސެމްސަންގުން ދަނީ ދިރާސާކުރަމުންނެވެ.
ދެކުނު ކޮރެއާގެ ނޭވާ ބްލޮގްގައި 'ލަންޒުކް' ހާމަކޮށްފައިވާ ގޮތުގައި، މި އާ ޑިޒައިންގެ މަސައްކަތް މިހާރު ވަނީ ފަށާފައެވެ. ނަމަވެސް، މިއީ އަދި މަޝްވަރާ މަރުހަލާގައި އޮތް ކަމަކަށް ވުމުން، އެންމެ ފަހުގެ ނިންމުން ނިންމުމުގެ ކުރިން މި ބަދަލުތަކަށް ބައެއް އުނިއިތުރު އައުމަކީ އެކަށީގެންވާ ކަމެކެވެ.
ދުނިޔޭގެ ބާޒާރުގައި ސްޕެއާ ޕާޓްސްތަކުގެ އަގު، ޚާއްސަކޮށް މެމޮރީ އާއި ސްޓޯރޭޖްގެ އަގުތައް އުފުލެމުން ދިއުމަކީ މި ޕްރޮޖެކްޓަށް އޮތް ބޮޑު ގޮންޖެހުމެކެވެ. މިކަމުގެ ސަބަބުން މި އާ ޑިޒައިން ގެންނަ ތާރީޚު ލަސްވުން ނުވަތަ ބައެއް މޮޑެލްތަކަށް އެކަނި މި ބަދަލު ހަނިކޮށްލުން އެކަށީގެންވާ ކަމަށްވެސް ރިޕޯޓްތައް ބުނެއެވެ.
މީގެ އިތުރުން، އެސް27 ސީރީޒްގައި 'ޔޫއެފްއެސް 5.0' ސްޓޯރޭޖާއި 'ސިލިކަން-ކާބަން' ބެޓެރީ ބޭނުންކުރުމަށްވެސް ދަނީ ވިސްނަމުންނެވެ. އެހެންނަމަވެސް ޚަރަދު ބޮޑުވުމުގެ ސަބަބުން މި އާ ޓެކްނޮލޮޖީތައް ފެނިގެންދާނީ ހަމައެކަނި މި ސީރީޒްގެ އެންމެ އަގުބޮޑު މޮޑެލްތަކުން ކަމަށް ބެލެވެއެވެ.
ސެމްސަންގުން މިކަމާ ގުޅޭގޮތުން ރަސްމީ އެއްވެސް ބަހެއް ބުނެފައެއް ނުވެއެވެ. އެހެންކަމުން، ފޯނު ބާޒާރަށް ނެރުމުގެ ކުރިން މި މައުލޫމާތުތަކަށް ބަދަލުތަކެއް އައުމުގެ ފުރުސަތު އޮތް ނަމަވެސް، މިއީ ސެމްސަންގްގެ ފޯނުތަކަށް އަންނާނެ ބޮޑު އިންގިލާބީ ބަދަލެއް ކަމަށް ގިނަ ބަޔަކު ގަބޫލުކުރެއެވެ.