'ޓެކްސީ ނަފާ' ލޯނުގެ ކަންކަމަށް ގާނޫނުގެ ތެރެެއިން ހައްލު ހޯދުމަށް އަވަސް މަސައްކަތްތަކެއް ކުރަމުން އަންނަ ކަމަށް ޓްރާންސްޕޯޓު މިނިސްޓަރު މުހައްމަދު ސައީދު މިރޭ ވިދާޅުވެއްޖެއެވެ.
މިނިސްޓަރު މި ފަދައިން ވިދާޅުވީ، ސަރުކާރުން ތައާރަފުކުރި 'ޓެކްސީ ނަފާ' ލޯނުގެ ކަންބޮޑުވުންތަކަށް ހައްލެއް ނުލިބި އަހަރަކަށް ވުރެ ގިނަ ދުވަސްވެފައިވަނިކޮށް މައްސަލަ ބަލައިދިނުމަށް އެދިފައިވަނިކޮށެވެ.
އެ ލޯނު ސްކީމަކީ ގްރޭޓާ މާލޭ ސަރަހައްދުގައި ޓެކްސީ ވިޔަފާރި ފަށައިގަތުމަށް ދިވެހި ރައްޔިތުންނަށް އެހީތެރިވުމުގެ ގޮތުން ތައާރަފުކުރި ސްކީމެކެވެ.
ޓެކްސީއެއް: މިނިސްޓަރު ވިދާޅުވީ 'ޓެކްސީ ނަފާ' ލޯނުގެ ކަންކަމަށް ގާނޫނުގެ ތެރެއިން ހައްލު ހޯދުމަށް އަވަސް މަސައްކަތެއް ކުރަމުން އަންނަ ކަމަށް --- ސަން ފޮޓޯ/ ފަޔާޒު މޫސާ
މިގޮތުން، ލޯނާ މެދު ކަންބޮޑުވުން ފާޅުކޮށް މިނިސްޓަރަށް އެޑްރެސްކޮށް އާދަމް ސަލީމް ކިޔާ މީހަކު އާންމުކުރި ސިޓީގައި ބުނެފައި ވަނީ، ޓެކްސީ ނަފާ ލޯނު ސްކީމްގެ ދަށުން ލިބިފައިވާ ކާރުތައް ރަޖިސްޓަރީ ނުވެ ހުއްޓައި ލޯނު އަނބުރާ ދެއްކުމަށް ލޯނު ދޫކުރި ފަރާތްތަކުން ތަކުރާރުކޮށް ބާރު ފޯރުވަމުންދާ ކަމަށެވެ.
އެހެންވެ، ލޯނު ނެގި ފަރާތްތަކަށް ބޮޑެތި ތަކުލީފުތަކެއް ކުރިމަތިވަމުންދާކަން ފާހަގަކޮށް އެ ކަމަށް އަވަސް ހައްލެއް ހޯދައިދިނުމަށް އެ މީހާ ވަނީ އެދިފައެވެ.
އެ ސިޓީއާ ގުޅިގެން މިނިސްޓަރު ސައީދު މިއަދު ވަނީ، ޓެކްސީ ނަފާ ލޯނު ލިބިފައިވާ ބައެއް ފަރާތްތަކާ ކަމާ ގުޅުން ހުރި ފަރާތްތަކާ ބައްދަލުކުރައްވާފައެވެ.
އެ ބައްދަލުވުމަށް ފަހު މިރޭ މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވީ، ޓެކްސީ ނަފާ ލޯނުގެ ކަންކަން އަޑުއަހައި، ޤާނޫނާއި ޤަވާއިދުތަކުގެ ތެރެއިން ހައްލެއް ހޯދައިދިނުމަށް އަވަސް މަސައްކަތެއް ކުރަމުން އަންނަ ކަމަށެވެ.
ފާހަގަކުރެވޭ ގޮތުގައި، ކުރީގެ އެސްޑީއެފްސީ ނުވަތަ މިހާރުގެ ނަމުންނަމަ އެސްއެމްއީ ޑިޖިޓަލްއިން މި ލޯނު ތައާރަފުކުރީ ސެޕްޓެމްބަރު 04، 2023ގައެވެ. ނަމަވެސް، އެ ލޯނަށް އެދުނު މީހުންނަށް ފައިސާ ޖަމާވެފައި ވަނީ މި ސަރުކާރު އައިސް ރައްޔިތުންގެ މަޖިލީހުގެ އިންތިޚާބާ ދިމާކޮށެވެ.
އެ ލޯނުގެ ދަށުން ޑްރައިވަރުން ގަތް ކާރުތައް ރަޖިސްޓްރީ ނުކުރެވި އަދި އަދަށް ވެސް ކާރުތައް ބޭނުންނުކުރެވޭ ކަމުގެ ޝަކުވާ އޮތީ ބޮޑުވެފައެވެ. އެގޮތުން 2024 ވަނަ އަހަރުގެ ފަހުކޮޅު ވެސް އެކަމުގައި ޓެކްސީ ޑްރައިވަރުން ވަނީ އިހުތިޖާޖު ކޮށްފައެވެ.
ޑްރައިވާސް އެސޯސިއޭޝަނުން އޭރު ބުނެފައިވާ ގޮތުގައި ލޯނު ނަގައިގެން ކާރު ގަތް ޑްރައިވަރުންނަށް ކާރު ލޮލަށް ނުފެނި އަދި އެ ކާރު ރަޖިސްޓްރީ ނުކުރެވި ބޭނުން ކުރެވޭ ހާލަތުގައި އޮއްވައި ބައެއް ޓެކްސީ ޑްރައިވަރުންގެ ބޮލުގައި 179،000 ރުފިޔާގެ ލޯނެއް އަޅުވާފައިވާ ކަމަށެވެ. އަދި، މިއީ ދައުލަތުގެ މުއައްސަސާތަކުން ޓެކްސީ ޑްރައިވަރުންނާ ދޭތެރޭ އިހާނެތިކޮށް ކޮށްފައިވާ ކަމެއް ކަމަށް ވެސް އެ ފަރާތްތަކުން ވަނީ ބުނެފައެވެ.