ކުޑަކުއްޖަކަށް ޓެކްސީ ތެރޭގައި ހޮޑުލެވުމުން ޑްރައިވަރު 1،500 ރުފިޔާއަށް ޑިމާންޑުކުރި ކަމަށް ބުނެ ދައްކަނީ ހަގީގަތް އޮޅޭގޮތަށް ދައުރުކުރަމުންދާ ވާހަކައެއް ކަމަށް، އެ ޓެކްސީ ނިސްބަތްވާ ކުންފުނި، ނަލަ ޓެކްސީން މިއަދު ބެނެފިއެވެ.
ކާރެއްގެ ތެރެއަށް ކުޑަ ކުއްޖަކު ހޮޑުލުމުން އެ ސީޓު ސާފުކުރުމަށް ޓެކްސީ ޑްރައިވަރު 1،500 ރުފިޔާއަށް ޑިމާންދުކުރި ކަމަށް ބުނެ ކޮށްފައިވާ ޕޯސްޓެއް ވަނީ މިއަދު ސޯޝަލް މީޑިއާގައި އާންމުވެފައެވެ.
ސޯޝަލް މީޑިއާގައި އެ ޕޯސްޓް ޖެހި ހައްވާ އަހްމަދު މިއަދު 'ސަން' އަށް މައުލޫމާތުދެމުން ބުނީ، ހުޅުމާލެއިން ހަތް ނަމްބަރު ޖެޓީއަށް ދިއުމަށް އޭނާ އެރި ކާރަށް، ދަރިފުޅަށް ހޮޑުލެވުމުން ކާރު ދުއްވަންއިން ޑްރައިވަރު ވަރަށް ރުންކުރުކޮށް ވާހަކަދެއްކި ކަމަށެވެ. އަދި ކާރުގެ ސީޓު ސާފުކުރަން ޑްރައިވަރު 1،500 ރުފިޔާއަށް ޑިމާންޑުކުރި ކަމަށް އޭނާ ވަނީ ބުނެފައެވެ.
ހައްވާ ބުނީ އެކަމާ ގުޅިގެން އޭނާގެ ފިރިމީހާއަށް ގުޅައި، ޑްރައިވަރާ ވާހަކަ ދެއްކި ކަމަށެވެ. އަދި އެ މީހުންނަށް ރަށަށް ދެވެންދެން ޑްރައިވަރު ފިރިމީހާއަށް ގުޅި ކަމަށެވެ. އެއަށްފަހު ޑިމާންޑުކުރިވަރު ބޮޑު ކަމަށް ބުނުމުން ފަހުން 1،000 ރުފިޔާ ދޭން ބުނިކަމަށެވެ. އަދި ދޭނަމޭ ބުނެވިފައި އޮތުމުން ފިރިމީހާ އެ ޑްރައިވަރަށް 1،000 ރުފިޔާ ދިނުމަށްފަހު އެ މައްސަލަ ނިންމާލި ކަމަށް ހައްވަ ކިޔައިދިނެވެ.
އެ މައްސަލައާ ގުޅިގެން 'ނަލަ ޓެކްސީ'ން ނެރެފައިވާ ބަޔާނެއްގައި ވަނީ، ޑްރައިވަރު 1،500 ރުފިޔާއަށް ޑިމާންޑުކޮށް ކަންތައްތައް ކޮށްފައިވާ ގޮތްކަމަށް ބުނެ ސޯޝަލް މީޑިއާގައި ދައުރުވަމުންދާ ވާހަކަތަަކަކީ ކަން ހިނގާފައިވާ ޚިލާފަށް، ކަމުގެ ހަގީގަތް އޮޅޭ ގޮތަށް ދައުރުކުރަމުންދާ ވާހަކަތަކެއް ކަމަށެވެ.
އެ ބަޔާނުގައިވާ ގޮތުން، ތުއްތު ކުއްޖާއަށް ހޮޑުލެވުނު ވާހަކަ ކަސްޓަމަރު ޑްރައިވަރު ގާތުގައި ބުނެ، ކޮތަޅު ހުރިތޯ އެހުމުން، ޝީޓު ކައިރީގައި ކޮތަޅު ހުންނާނެ ކަމަށާއި ކާރުގެ ޝީޓާއެކު ހޮޑު ލެވުމުން އާންމުކޮށް ޝީޓު ސާފުކޮށްދޭ ތަންތަނުން 1،500 ރުފިޔާ ނަގާކަމަށް ޑްރައިވަރު ބުންޏެވެ.
ޑްރައިވަރު އެހެން ބުނުމުން ކަސްޓަމަރު ފޯނުން މީހަކާ ގުުޅައި ޑްރައިވަރާ ވާހަކަދައްކައި، އޭނާ ބުނާ ތަނަކަށް ސާފުކުރަން ދިއުމަށް ބުނުމުން ޑްރައިވަރު ކަސްޓަމަރު ދާން ބޭނުންވި ލޮކޭޝަނަށް ގަޑިއަށް ކަސްޓްމަރު ގެންގޮސްދިނުމަށްފަހު، ފޯނުން ވާހަކަދެއްކި މީހާ ބުނިތަނަށް ކާރުގެ ޝީޓް ސާފުކުރުމަށް ދިޔަކަމަށްވެސް ވަނީ ބުނެފައެވެ.
އެ މީހާ ބުނި ތަނުން ޝީޓު ސާފުކުރެވެން ނެތުމުން ޖެހިގެންހުރި ތަނަށްގޮސް އަގު ބެލި ކަމަށާއި އެ ތަނުން 1،600 ރުފިޔާއަށް ސާފުކޮށްދޭން ބުނުމުން، އެ ތަނުގެ މީހުންނާ ވާހަކަދައްކައިގެން 1،000 ރުފިޔާއަށް އަގު ކުޑަކުރިކަމަށް ބުނެފައިވެއެވެ.
މީގެ އިތުރުން ކާރުގެ ޝީޓު ސާފުކުރަން 1،000 ރުފިޔާ ނަގާފައިވަނީ ފޯނުން ވާހަކަ ދެއްކި މީހާއާއި ޑްރައިވަރާ އެއްބަސްވެގެންކަން ވެސް ބަޔާނުގައި ފާހަގަކޮށްފައެވެ.
އެ ބަޔާނުގައިވަނީ ޝީޓު ސާފުކުރަން ނެގި ފައިސާ ލިބުނު ނަމަވެސް ސާފުކުރުމަށް ދިޔަ ޚަރަދު ފިޔަވައި ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައިނުވާ ކަމަށެވެ.
އެހެންކަމުން އެކަމުގައި ދެފަރާތުން ވާހަކަދައްކައި ވަކި ގޮތަކަށް އެއްބަސްވެ، ކަންކަން ކުރުމަށްފަހު ޑްރައިވަރާއި ސެންޓަރުގެ އަގު ވެއްޓޭ ގޮތަށް ސޯޝަލް މީޑިއާގައި ހަގީގަތް އޮޅޭގޮތަށް ވާހަކަ ފެތުރުމަކީ އެ ސެންޓަރުން ކަންބޮޑުވާ ކަމެއްކަން އެ ބަޔާނުގައި ވަނީ ފާހަގަކޮށްފައެވެ.