ރާއްޖޭގައި ބައިނަލްއަގުވާމީ ފުޓްބޯޅަ ފެސިލިޓީއެއް ގާއިމްކުރުމަށް ސަރުކާރުން އިއުލާނުކުރި މަޝްރޫއަށް، ފުޓްބޯޅަ އެސޯސިއޭޝަން (އެފްއޭއެމް)އަށް ހުޅުމާލޭން ދިން ބިން އެކި ފަރާތްތަކަށް ކުއްޔަން ދީގެން ލިބެން ޖެހޭ ފައިސާގެ ތެރެއިން ގާތްގަނޑަކަށް 30 މިލިއަން ރުފިޔާ ގެއްލިފައިވާ މައްސަލައިގައި، އެއްވެސް ފައިސާއަކާ ހަވާލުނުވާ ކަމަށް، އެފްއޭއެމްގެ ކުރީގެ އަމީންއާންމު ޙުސައިން ޖަވާޒު ރޭ ވިދާޅުވެއްޖެއެވެ.
ހުޅުމާލޭގައި ފުޓްބޯޅަ ޓްރެއިނިން ފެސިލިޓީއެއް ގާއިމްކުރަން ދިން ބިން، އެކި ފަރާތްތަކަށް ދީގެން ލިބުނު ފައިސާއިން ބޮޑު ބައެއް ގެއްލިފައިވާ ކަމަށާއި، އެ ފައިސާއާ ހަވާލުވި ފަރާތްތަކުގެ ތެރޭ, މިހާރު މި ސަރުކާރުގެ ޔޫތު މިނިސްޓްރީގެ ޑެޕިއުޓީ މިނިސްޓަރަކަށް ހުންނެވި ޖަވާޒު ހިމެނޭކަމަށް އޮޑިޓު އޮފީހުން ބުނީ، އެ ބިން ކުއްޔަށް ދޫކުރުމުގެ މުއާމަލާތްތަކާ ގުޅޭ ގޮތުން ހެދި ޚާއްސަ އޮޑިޓެއްގައެވެ.
އެ އޮޑިޓުގައިވާ ގޮތުން، ފުޓްބޯޅަ ޓްރެއިނިން ފެސިލިޓީ ގާއިމްކުރުމަށް އެފްއޭއެމަށް ދޫކުރި ބިމުގެ ބައެއް ސްލޮޓްތަކާއި އިމާރާތުގެ ފަންގިފިލާތައް އެކި ފަރާތްތަކަށް ކުއްޔަށް ދޫކުރުމަށް ފަސް ފަރާތަކާއެކު އެފްއޭއެމުން ހެދި ސަބްލީސް އެއްބަސްވުންތަކުގެ ދަށުން، އެ ފަރާތްތަކުން ކުލީގެ ގޮތުގައި އެފްއޭއެމަށް ދައްކަންޖެހޭ ފައިސާގެ ޖުމުލަ 14.1 މިލިއަން ރުފިޔާ އެފްއޭއެމަށް ލިބިފައިވާކަން، ނަގުދު ފައިސާއިންނާއި ޗެކުން ފައިސާ ދެއްކި ކަމަށް ބުނެ، އެ ފަރާތްތަކުން ހުށަހެޅި ލިޔެކިއުންތަކުން ފާހަގަވެއެވެ.
އެ ރަސީދުތަކުގައި ސޮއިކޮށްފައިވަނީ ޖަވާޒުގެ އިތުރުން، އެފްއޭއެމްގެ ކުރީގެ ރައީސް ބައްސާމް ޢަދީލް ޖަލީލާއި، ކުރީގެ މާލީ ޑިރެކްޓަރު މުޙައްމަދު ޢަޤީލް ކަމަށް، އެ ރިޕޯޓުގައިވެއެވެ.
އޭގެ ތެރެއިން ޢަޤީލް 9.9 މިލިއަން ރުފިޔާ އާ ހަވާލުވިކަމާއި، ބައްސާމް ތިން މިލިއަން ރުފިޔާއާ ހަވާލުވިކަމާއި، ޖަވާޒު 1.2 މިލިއަން ރުފިޔާ އާ ހަވާލުވިކަމަށްވެސް، ޚާއްސަ އޮޑިޓުގައިވެއެވެ.
ނަމަވެސް މި އޮޑިޓް ރިޕޯޓުގައިވާ މައުލޫމާތާ ގުޅޭގޮތުން 'ސަން'އިން ސުވާލުކުރުމުން، މިހާރު ސިޔާސީ އިސް މަގާމެއްގައި ހުންނެވި ޖަވާޒު ވިދާޅުވީ، އެއްވެސް ފައިސާއަކާ ހަވާލުނުވާ ކަމަށް، އޮޑިޓް ރިޕޯޓަށް މައުލޫމާތު ދެއްވަމުން ވިދާޅުވެފައިވާނެ ކަމަށެވެ.
އެކަމަކު އެފްއޭއެމްގައި މަސައްކަތްކުރެއްވިއިރު، ބައެއް ފަރާތްތަކުގެ ޗެކާ އެކި ފަހަރުމަތިން ހަވާލުވެފައިވާނެ ކަމަށް ޖަވާޒު ވިދާޅުވިއެވެ.
އޭނާ ވިދާޅުވިގޮތުގައި އެފްއޭއެމަށް ލިބުނު ނަގުދު ފައިސާއާ ދުވަހަކުވެސް ހަވާލުވެފައި ނޯންނާނެއެވެ.
"އަޅުގަނޑާ ހަވާލުވެފަ އޮންނަ ލިޔެކިއުމެއްވިޔަސް ފައިސާގެ ލިޔެކިއުމެއް ވެއްޖިއްޔާ ދާނީ ފައިނޭންސް ޑިޕާޓްމަންޓަށް، އަޤީލް ނޫނީ ބައްސާމަށް،" ޖަވާޒު ވިދާޅުވިއެވެ.
ބައްސާމް ވަނީ އެފްއޭއެމްގެ ފައިސާއަށް ޚިޔާނަތްތެރިވީ މައްސަލައިގައި 32 އަހަރަށް ޖަލަށްލާފައެވެ. ޢަޤީލްގެ މައްޗަށް ވެސް ދައުވާކޮށްފައިވާއިރު، ފިލައިގެން ރާއްޖޭން ބޭރުގައި އުޅެނިކޮށް އޭނާވަނީ ހައްޔަރުކޮށްފައެވެ.
އެހެންކަމުން، އެ ތިން މީހުންގެ ތެރެއިން މިނިވަންކޮށް މިވަގުތު ހުރީ ޖަވާޒު އެކަންޏެވެ.
ޚާއްސަ އޮޑިޓުގައި ފާހަގަކޮށްފައިވާ ގޮތުގައި އަމިއްލަ ކުންފުންޏަކުން ތިން ފަހަރެއްގެ މަތިން ނަގުދު ފައިސާއިން ދިން 1.2 މިލިއަން ރުފިޔާއާ ޖަވާޒުވަނީ ހަވާލުވެފައެވެ.
އޮޑިޓަރު ޖެނެރަލް ޙުސައިން ނިޔާޒީ ސޮއިކުރައްވައި ނެރުއްވި ޚާއްސަ އޮޑިޓުގައިވަނީ، އެފްއޭއެމުން ގެއްލުނު ފައިސާ ހޯދުމަށާއި، އެކަމުގައި ޒިންމާވާ ފަރާތްތަކާމެދު ފިޔަވަޅު އެޅުމަށް ފުލުހަށް އެންގުމަށް ލަފާ ދެއްވައިފައެވެ.