ދައުލަތް ހިންގުމުގެ އެންމެހާ ގުނަވަންތަކާއި، ގާނޫނު ހެދުމުގެ މަޖިލީހާއި، އަދުލު އިންސާފު ގާއިމުކުރުމުގެ ނިޒާމުގެ ތެރޭގައި އަންހެނުންގެ ފުރިހަމަ ހިއްސާ އޮތުމަކީ ކޮންމެހެން ބޭނުންތެރި ކަމެއް ކަމަށް އެމްޑީއޭގެ ރައީސް އަދި ދ. މީދޫ ދާއިރާގެ މެންބަރު އަޙުމަދު ސިޔާމް މުޙައްމަދު މިއަދު ވިދާޅުވެއްޖެއެވެ.
މިއަދު ފާހަގަކުރާ ބައިނަލްއަގްވާމީ އަންހެނުންގެ ދުވަހުގެ މުނާސަބަތުގައި ސިޔާމް ފޮނުއްވި ޚިތާބުގައި ވަނީ ދިވެހިރާއްޖޭގެ އެންމެހާ ލޮބުވެތި އަންހެނުންނަށާއި، އަންހެން ކުދިންނަށް އަދި ވަކިން ޚާއްސަކޮށް އެމްޑީއޭގެ އެންމެހާ އަންހެން މެންބަރުންނަށް ތަހުނިޔާއާއި ހެޔޮ އެދުންތައް އަރިސްކުރައްވައިފައެވެ.
ސިޔާމް ވިދާޅުވީ މިއަދަކީ ގައުމު ބިނާކުރުމުގައި ކަނބަލުން އަދާކުރައްވަމުން ގެންދަވާ އަގުނުކުރެވޭ ފަދަ މުހިންމު ދައުރާއި، ދެއްވަމުން ގެންދަވާ މަތިވެރި ޚިދުމަތްތަކުގެ އަގުވަޒަންކުރުމުގައި މުޅި މުޖުތަމައު ބައިވެރިވުން ނުހަނު ބޭނުންތެރި ދުވަހެއް ކަމަށެވެ. އެގޮތުން މިންތީގެ ހަމަހަމަކަން ގާއިމުކުރުމުގެ މަގުގައި ގައުމެއްގެ ހައިސިއްޔަތުން ފާހަގަކޮށްލެވޭ ކާމިޔާބީތަކެއް ހޯދާފައިވީ ނަމަވެސް، މި ދާއިރާއިން އަދިވެސް އިތުރު ހަރުފަތްތަކަށް ވާސިލުވާންޖެހޭ ކަމަށް އެމަނިކުފާނު ދެކެވަޑައިގަންނަވާ ކަމަށް ސިޔާމް ވިދާޅުވިއެވެ.
ޚާއްސަކޮށް ޖިންސީ ތަފާތުކުރުންތައް ނައްތާލުމަށާއި، އަންހެނުންނަށް ކުރިމަތިވާ އެކި ބާވަތުގެ އަނިޔާތަކާ ދެކޮޅަށް ކުރެވޭ މަސައްކަތްތައް މިހާރަށްވުރެ ހަރުދަނާކޮށް ވަރުގަދަކުރަންޖެހޭ ކަމަށް ސިޔާމް ވިދާޅުވިއެވެ.
ހަމައެއާއެކު ސިޔާސީ މައިދާނުގައި އަންހެނުންގެ ބައިވެރިވުން އިތުރުކުރުމަކީ، މިންތީގެ ހަމަހަމަކަން ކަށަވަރުކުރުމަށާއި، އަންހެނުންނަށް ކުރާ އަނިޔާތައް ހުއްޓުވުމަށް އެޅޭނެ އެންމެ ވަރުގަދަ އެއް ފިޔަވަޅު ކަމަށް އެމަނިކުފާނު ވިދާޅުވިއެވެ. އަދި ސިޔަސީ ދާއިރާއަކީ އަންހެނުންނަށް ކުރިމަތިލުމުގައި ގޮންޖެހުންތަކެއް ހުރި ދާއިރާއެއްކަން ފާހަގަކުރައްވައި ސިޔާމް ވިދާޅުވީ ދައުލަތް ހިންގުމުގެ އެންމެހާ ގުނަވަންތަކާއި، ގާނޫނު ހެދުމުގެ މަޖިލީހާއި، އަދުލު އިންސާފު ގާއިމުކުރުމުގެ ނިޒާމުގެ ތެރޭގައި އަންހެނުންގެ ފުރިހަމަ ހިއްސާ އޮތުމަކީ ކޮންމެހެން ބޭނުންތެރި ކަމެއް ކަމަށެވެ.
ސިޔާމް ވިދާޅުވީ، އެމަނިކުފާނުގެ އަބަދުވެސް އުންމީދަކީ ދިވެހި އަންހެނުންނަށް އިތުރު ފުރުސަތުތައް ފަހިވެ، ބާއްޖަވެރި މުސްތަގުބަލެއް ލިބުން ކަމަށެވެ.
އުންމީދަކީ ދިވެހިރާއްޖެއަކީ އެންމެހާ ރައްޔިތުންނަށް، ވަކިން ޚާއްސަކޮށް އަންނަން އޮތް ޖީލުތަކަށް އަމާންކަމާއި، ރައްކާތެރިކަމާއެކު ދިރިއުޅެވޭނެ ފަހި މާހައުލަކަށް ވެގެން ދިޔުން،
ސިޔާމްގެ ޚިތާބު ނިންމަވައިލެއްވީ، އަންހެނުންނާއި ފިރިހެނުންގެ ހަމަހަމަ ބައިވެރިވުމާއެކު ދިވެހި މުޖުތަމައަށް އިތުރު ކުރިއެރުމާއި ފާގަތިކަން މިންވަރުކޮށްދެއްވުން އެދި ދުޢާ ދަންނަވަމުންނެވެ.