މި އަހަރު ރިލީޒްކުރާ، ގިނަ ބަޔަކު އެންމެ އެ ފިލްމަކަށް އިންތިޒާރު ކުރަމުން އަންނަ ބޮލީވުޑްގެ ފިލްމުތަކުގެތެރޭ ހިމެނޭ، ކާތިކް އާރްޔަންގެ "ނާގްޒިއްލާ"އިން ބަތަލާގެ ރޯލްއިން ފެންނާނީ މުޅިން އާ ތަރިއެއް ކަމަށް ރިޕޯޓުތަކުން ބުނެފިއެވެ.
އެގޮތުން ކާތިކްއާ އެކު ބަތަލާގެ ރޯލްއިން ފެންނާނީ ދެކުނު އިންޑިއާގެ ފިލްމު އިންޑަސްޓްރީގައި ފާހަގަކޮށްލެވޭ ހުނަރުވެރި ބަތަލާ ޕްރީތީ މުކުންދަން ކަމަށާއި މިއީ ޕްރިތީގެ ފުރަތަމަ ބޮލީވުޑް ފިލްމު ކަމަށް ބޮލީވުޑްހަންގާމާގެ ރިޕޯޓެއްގައި ވަނީ ބުނެފައެވެ.
ފިލްމީ ޚަބަރުތަކުން ބުނެފައިވާ ގޮތުގައި މި ފިލްމަށް ޕްރިތީ ގެންނަން ނިންމީ ފިލްމުގައި އޭނާ ކުޅޭ ކެރެކްޓާ އެންމެ ގުޅޭ ފިލްމީ ތަރިންގެ ލިސްޓެއް ހެދުމަށްފަހު އެ ލިސްޓުން ޕްރިތީ ޝޯޓް ލިސްޓުވެ، ފިލްމުގެ ޕްރޮޑިއުސަރުންނަށް އެއީ އެ ރޯލަށް އެންމެ އެކަށީގެންވާ ބަތަލާ ކަމަށް ގަބޫލު ކުރެވުމުންނެވެ.
ކާތިކް އާރްޔަންގެ ފިލްމު "ނާގްޒިއްލާ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
މި ފިލްމުގައި ޕްރީތީ ފެންނާނީ މަޖާ ރޯލަކުން ކަމަށާއި، އޭނާގެ ކެރެކްޓަރަކީ ފިލްމުގެ ވާހަކައިގައި ވަރަށް މުހިންމު ދައުރެއް އަދާކުރާނެ ބައެއް ކަމަށްވެސް "ނާގްޒިއްލާ"ގެ ޕްރޮޑަކްޝަން ޓީމާ ހަވާލާދީ ރިޕޯޓުތަކުން ވަނީ ބުނެފައެވެ.
ޕްރީތީ ފިލްމީ ދާއިރާއަށް ތައާރަފުވީ 2024 ވަނަ އަހަރު ނެރުނު ތެލުގޫ ހޮރޯ ކޮމެޑީ "އޯމް ބީމް ބުޝް" އިންނެވެ. އޭގެ ފަހުން އޭނާ ވަނީ ތަމަޅަ ފިލްމު "ސްޓާ" އިން ވެސް ފެނިފައެވެ.
ފިލްމު "ނާގްޒިލާ" އަކީ ޕްރޮޑިއުސަރު ކަރަން ޖޯހަރްގެ ދަރުމާ ޕްރޮޑަކްޝަންސް އާއި މަހާވީރު ޖެއިން ފިލްމްސް ގުޅިގެން އުފައްދާ ފިލްމެކެވެ. މި ފެންޓަސީ ކޮމެޑީގެ ލީޑް ރޯލް ކަމަށްވާ ކާތިކް ފެންނާނީ ސިފަ ބަދަލުކުރާ ނާގަ ހަރުފައެއްގެ ރޯލުންނެވެ. އަދި ފިލްމުގެ ވިލަންގެ ބައި ކުޅެނީ ރަވީ ކިޝަން ކަމަށް މައުލޫމާތު ލިބެއެވެ.
މިއީ މަހާވީރު ޖެއިން އާއެކު ކާތިކް އަދި ކަރަން މަސައްކަތްކުރާ ފުރަތަމަ ފަހަރެވެ. ނަމަވެސް، މިއީ މިދިޔަ ޑިސެމްބަރު މަހު ރިލީޒްކުރި ފިލްމު "ތޫ މޭރީ މޭ ތޭރާ މޭ ތޭރާ ތޫ މޭރީ"އަށް ފަހު ކާތިކް އާއި ކަރަން ގުޅިގެން މަސައްކަތްކުރާ ދެވަނަ ފިލްމެވެ.