ލެގޫންސް ސްޕޯޓްސް ކްލަބުގެ އިންތިހާބު، ސިވިލް ކޯޓުން ހުއްޓުވައިފިއެވެ.
ލެގޫންސްގެ އިންތިހާބު ކަންތައް ސިވިލް ކޯޓުން ހުއްޓުވީ، އެ ކްލަބުގެ ހިންގާ ގަވައިދާ ހިލާފަށް، ވައިބަރ އެޕްލިކޭޝަން މެދުވެރިކޮށް އިންތިހާބު ބޭއްވި ކަމަށް، ބުނެ، މއ. ނޮޅިވަރަންގޭ އަބްދުލްވާހިދު އަދި މއ. ފަޅުމަތީގޭ އަހްމަދު އަލީ، ސިވިލް ކޯޓުގައި ވަގުތީ އަމުރަކަށް އެދުމުން ނެރުނު އަމުރެއްގެ ދަށުންނެވެ.
ސިވިލް ކޯޓުގެ ގާޒީ އަބްދުﷲ އިހްސާން، އަންގާރަ ދުވަހު ނެރުނު މި އަމުރަކީ 15 ދުވަހުގެ ތެރޭގައި އިންތިހާބާ ގުޅޭ މައްސަލަ ރަސްމީކޮށް ކޯޓަށް ހުށަހަޅަން އަންގައި، އެ މައްސަލަ ކޯޓަށް ހުށަހަޅައި ކޯޓުން ގޮތެއް ނިންމަންދެން، އިންތިހާބާ ގުޅޭ ކަންކަން ހުއްޓުވުމަށް ނެރުނު އަމުރެކެވެ.
އެ މުއްދަތުގެ ތެރޭގައި މައްސަލަ ހުށަހަޅަން، އަބްދުލްވާހިދު އަދި އަހްމަދު އަލީއަށްވަނީ އަންގައިފައެވެ. އެ މުއްދަތުގެ ތެރޭގައި މައްސަލަ ހުށަނާޅައިފިނަމަ އަމުރު ބާތިލުވާނެއެވެ.
އަންގާރަ ދުވަހު ނެރެފައިވާ ވަގުތީ އަމުރުގައި، ސިވިލް ކޯޓުންވަނީ މިހާރު ވައިބަރ މެދުވެރިކޮށް ބޭއްވި އިންތިހާބަށް އަމަލު ނުކުރުމަށް ކަމާބެހޭ ފަރާތްތަކަށް އަންގައިފައެވެ. އަދި ލެގޫންސްގެ މެންބަރުންގެ ހައްގު ގެއްލޭނެ ފަދަ އެއްވެސް ކަމެއް ނުކުރުމަށްވެސް ސިވިލް ކޯޓުންވަނީ އެ ކްލަބާއި ކަމާބެހޭ ފަރާތްތަކަށް އަމުރުކޮށްފައެވެ.
އަމުރުގައި ބުނެފައިވާ ގޮތުގައި، ލެގޫންސްގައި 89 މެންބަރުން ތިއްބައި، އިންތިހާބު ބާއްވާފައިވަނީ އެންމެ 14 މެންބަރުން ހިމެނޭހެން ވައިބަރ ގްރޫޕެއްގައެވެ.
ދެހާސް ބާވީސްވަނަ އަހަރު، ތިންވަނަ ޑިވިޝަންގެ ޗެމްޕިއަންކަން ހޯދައި، މިހާރު ދެވަނަ ޑިވިޝަނުގައި އޮތް ލެގޫންސްއަކީ ކުރިން ދިވެހި ކުޅިވަރުގައި ވަކިން ހާއްސަކޮށް ފުޓްބޯޅައިގައި ގަދަ ބާރެކެވެ. އެކަމަކު ފަހުން ފަހުން އެ ކްލަބަކަށް ފުރަތަމަ ޑިވިޝަންގެ ޖާގައެއް ނުލިބެއެވެ.