ދިވެހިރާއްޖޭގެ އެންމެ ބޮޑު ގޭމިން ޕްލެޓްފޯމް، ދިރާގު ގޭމާސް ގިލްޑް (ޑީޖީޖީ) އިން ކުރިއަށްގެންދާ "ރޯދަ ކުއެސްޓް" މިރޭ ދިރާގު ހެޑް އޮފީހުގައި ފެށުމަށް ތައްޔާރުވެއްޖެއެވެ.
މިރެއިން ފެށިގެން އަންނަ އާދިއްތަ ދުވަހުގެ ނިޔަލަށް މި ހަރަކާތް ކުރިއަށްދާނެއެވެ.
ދިވެހިރާއްޖޭގެ ގޭމިން ކޮމިއުނިޓީއަށް ޚާއްސަކޮށްގެން ބާއްވާ މި ފޯރިގަދަ ހަރަކާތުގައި މަގުބޫލު އެކި ގޭމުތައް ވަނީ ހިމަނައިފައެވެ. މިއީ ހުރިހާ ފެންވަރެއްގެ ގޭމް ކުޅޭ ފަރާތްތަކަށް ވެސް ބައިވެރިވެވޭ ގޮތަށް ފަރުމާކޮށްފައިވާ ހަރަކާތެކެވެ.
"ރޯދަ ކުއެސްޓް" ކޮންމެ ރެއަކުވެސް ރޭގަނޑު 9:00 އިން ދަންވަރު 1:00 އަށް ކުރިއަށްދާނެއެވެ.
ދިރާގުން ބުނި ގޮތުގައި "ރޯދަ ކުއެސްޓް"ގައި ބައިވެރިވުމަށް އެއްވެސް ފީއެއް ދައްކާކަށް ނުޖެހެއެވެ.
އެމްއެލްބީބީ، ޕަބްޖީ މޮބައިލް، އެފްސީ26 އަދި ޓެކެން 8ގެ ރަޖިސްޓްރޭޝަން މިހާރު ނިމިފައިވީ ނަމަވެސް، ހުކުރު ދުވަހުން ފެށިގެން ކުރިއަށްދާ ޖީޓީ7 ރޭސިންގް ސިމިއުލޭޓާ އަދި ބީޓް ސޭބާ ސެޝަންތަކުގައި ކުރިން ރަޖިސްޓްރީވުމަކާ ނުލައި، ޒިޔާރަތްކުރާ ހުރިހާ ފަރާތްތަކަށް ވެސް ބައިވެރިވެވޭނެ ކަމަށް ދިރާގުން ބުންޏެވެ. އަދި، ގޭމިންގްއަށް ޝައުގުވެރިވާ ހުރިހާ ފަރާތްތަކުން ވެސް މި ހަރަކާތްތަކުގައި ބައިވެރިވެ، ކޮންމެ ރެއަކުވެސް ތަފާތު ތަޖުރިބާއެއް ކޮށްލުމަށް ދިރާގުން ވަނީ ދައުވަތު އަރުވައިފައެވެ.
ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމުގައިވާ ޑީޖީޖީއިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއްކޮށް، އަންނަން އޮތް ޖީލުތަކުގެ ގޭމިން ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.
ޑީޖީޖީއިން ކުރިއަށް ގެންދާ ހަރަކާތްތަކުގެ އެންމެ ފަހުގެ މައުލޫމާތުތައް dgg.mv މެދުވެރިކޮށް ލިބޭނެ ކަމަށް ދިރާގުން ބުންޏެވެ.