މިދިޔަ އަހަރުގެ ރޯދަ މަހުގެ ފުރަތަމަ ހަފުތާއާ އަޅައިބަލާއިރު، މާލެ ސަރަހައްދުގައި މި އަހަރުގެ އެ މުއްދަތުގައި އެކްސިޑެންޓުތައް އިތުރުވެއްޖެއެވެ.
ފުލުހުން މިއަދު އާންމުކުރި ހިސާބުތަކުން އެނގޭ ގޮތުގައި، މިދިޔަ އަހަރުގެ ރޯދަމަހުގެ ފުރަތަމަ ހަފުތާގައި މާލެ ސަރަހައްދުގައި 90 އެކްސިޑެންޓު ހިނގިއެވެ. މި އަހަރުގެ އެ މުއްދަތު ކަމަށްވާ، މި މަހުގެ 18އިން 24އަށް، 107 އެކްސިޑެންޓު ހިނގައިފައިވެއެވެ.
އެންމެ ގިނައިން ރޯދަ މަހުގެ ފުރަތަމަ ހަފުތާގައި މާލެ ސަރަހައްދުގައި އެކްސިޑެންޓުތައް ހިނގާފައި ވަނީ، މަޖީދީ މަގާއި ސިނަމާލެ ބުރިޖުގައެވެ.
އެއިން ކޮންމެ ސަރަހައްދެއްގައި މި އަހަރު 19 އެކްސިޑެންޓު ހިނގާފައިވާއިރު، މިދިޔަ ރޯދައިގެ ފުރަތަމަ ހަފުތާގައި މަޖީދީމަގުގައި ހިނގީ 14 އެކްސިޑެންޓެކެވެ. ސިނަމާލެ ބުރިޖުގައި އެ މުއްދަތުގައި ވަނީ، 16 އެކްސިޑެންޓު ހިނގާފައެވެ.
އެ ސަރަހައްދުތަކަކީ، މާލެ ސަރަހައްދުގައި އާންމުކޮށް އެންމެ ޓްރެފިކް ބޮޑުވާ ސަރަހައްދުތަކެވެ.
އޭގެއިތުރަށް، މި ރޯދަމަހުގެ ފުރަތަމަ ހަފުތާގައި އަމީނީ މަގުގައި ނުވަ އެކްސިޑެންޓު ހިނގާފައިވާއިރު، ހުޅުމާލެ ފުރަތަމަ ފިޔަވަހީގައި ރޯދައިގެ ފުރަތަމަ ހަފުތާގައި ހިނގާފައި ވަނީ، 17 އެކްސިޑެންޓެވެ. އަދި، ހުޅުމާލެ ދެވަނަ ފިޔަވައްސާއި އެހެނިހެން ތަންތަނުގައި ވަކިން 16 އެކްސިޑެންޓު ހިނގާފައިވެއެވެ.
މި މުއްދަތުގައި އެންމެ މަދުން އެކްސިޑެންޓުތައް ފުލުހުންނަށް ރިޕޯޓުކުރީ، މާލޭގެ ލޯކަލް މާރުކޭޓު ހުންނަ ބޮޑުތަކުރުފާނު މަގުންނެވެ. އެ މަގުގައި މި މުއްދަތުގައި ހިނގާފައި ވަނީ، އެންމެ ތިން އެކްސިޑެންޓެވެ.
ފުލުހުން ވަނީ، އެކްސިޑެންޓުތައް މަދުކުރުމަށް ސްޕީޑު މަޑުކޮށް، މަގުމައްޗަށް ބަލައިގެން ވެހިކަލްތައް ދުއްވަން ހަނދާންކޮށްދީފައެވެ.
ފާހަގަކުރެވޭ ގޮތުގައި، މާލެއާއި ސިނަމާލެ ބުރިޖުގައި މިދިޔަ ހަފުތާގައި 41 އެކްސިޑެންޓު ހިނގައި، 16 މީހުންނަށް އަނިޔާވި ކަމަށް ފުލުހުންގެ ތަފާސްހިސާބުތަކުން ވަނީ ދައްކާފައެވެ.
އެ ހަފުތާގައި ހިނގި އެކްސިޑެންޓެއްގައި 16 އަހަރުގެ ކުޑަކުއްޖަކު ވެސް ވަނީ މަރުވެފައެވެ. ބާރު ސުޕީޑުގައި ވެހިކަލް ދުއްވުމަކީ ރާއްޖޭގައި އާއްމުވެފައިވާ މައްސަލައެކެވެ. މިފަދަ އެކްސިޑެންޓްތަކުގައި އެތައް ބައެއްގެ ފުރާނަ ގެއްލިފައި އެބަހުއްޓެވެ. އޭގެ ތެރޭގައި ޒުވާނުން ގިނައެވެ.