ވޮޝިންޓަން (3 މާޗް 2026) : އީރާނުގެ ވެރިކަން ބަދަލުކުރުމަށްޓަކައި އެއްގަމު މަގުން އެ ގައުމަށް އަރައިގަންނަން ޖެހިދާނެކަމުގެ ހަރުކަށި އިންޒާރު ޓްރަމްޕް ދެއްވިތާ 12 ގަޑިއިރުވެސް ނުވަނީސް އެކަން ނުކުރައްވާނެ ކަމަށް ޓްރަމްޕް ވިދާޅުވެއްޖެއެވެ.
ޓްރަމްޕް އޭނާގެ ސޯޝަލް މީޑީއާ ޕްލެޓްފޯމް ޓްރުތް ސޯޝަލްގައި ކުރިން ވަނީ އީރާނުގެ ވެރިކަން ބަދަލުކުރުމަށްޓަކައި އެއްގަމު މަގުން އީރާނަށް އަރައިގަތުމަށް އެމެރިކާ ސިފައިންގެ ލަޝްކަރެއް އެ ގައުމަށް ފޮނުވަން ގަސްދު ކުރައްވާކަމަށް ވިދާޅުވެ އީރާނަށް ބިރު ދައްކަވާފައެވެ.
އެއްގަމުން އެމެރިކާ އަރައި ހަނގުރާމަ ކުރިޔަށް ގެންގޮސްފިނަމަ އީރާނުގެ މިހާރުގެ ވެރިކަން ވައްޓާލުމަށްފަހު އީރާނުގެ ވެރިކަމުގެ ނިޒާމުގެ ކޮންޓްރޯލް އެމެރިކާއަށް ނެގިދާނެކަމުގެ އުންމީދު އެބައޮތްކަމަށް ޓްރަމްޕް ވިދާޅުވިއެވެ.
ނަމަވެސް މިހެން ވިދާޅުވިތާ 12 ވަރަކަށް ގަޑިއިރު ފަހުން ޓްރަމްޕް ވަނީ މި ޚިޔާލު އެއްކޮށް ބަދަލުކުރައްވައިފައެވެ. ފަހުން ޓްރަމްޕް ޓްރުތް ސޯޝަލްގައި ލިޔުއްވާފައިވާ ގޮތުގައި އީރާނުގެ ވެރިކަން ބަދަލުކުރުމަށްޓަކައި އެ ގައުމަށް އެއްގަމު މަގުން އަރައިގަތުމުގެ އެއްވެސް ބޭނުމެއްނެތެވެ. ސަބަބެއް ބަޔާން ކުރައްވާފައެއް ނުވެއެވެ.
ހަމައެކަނި ޓްރަމްޕް ވިދާޅުވެފައިވަނީ އެއްގަމު މަގުން އީރާނުގައި ހަނގުރާމަ ކުރުމަށް އެމެރިކާ ސިފައިން ފޮނުވުމަކީ ބޭނުންކަމެއް ނޫން ކަމުގައެވެ.
އަނެއްކޮޅުން ޓްރަމްޕް ވަނީ ޔަހޫދީ އިސްރާއީލާ ގުޅިގެން އީރާނާ ދެކޮޅަށް އޭނާ ހަނގުރާމަ ފެށި ސަބަބު އެމެރިކާގެ ރައްޔިތުންނަށް ވިސްނައި ދިނުމުގައިވެސް މުޅިން ނާކާމިޔާބު ވެފައެވެ.
އީރާނާ ދެކޮޅަށް ހަނގުރާމަ ފެށީ އެމެރިކާއަށް ފޯރާވަރުގެ މިސައިލް އީރާނުން އުފައްދާތީ ކަމަށް އެއްފަހަރު ވިދާޅުވާއިރު އަނެއް ފަހަރު ވިދާޅުވަނީ މަގްސަދަކީ އީރާނުގެ ނިއުކްލިޔާ ޕްރޮގްރާމު ހުއްޓުވުން ކަމުގައެވެ. ނިއުކްލިޔާ ހަތިޔާރުން އެމެރިކާއަށް ބިރުދެއްކުމުގެ ފުރުސަތު އީރާނަށް ނުދިނުން ކަމުގައެވެ.
އަނެއްކޮޅުން އީރާނުގެ ވެރިކަން ބަދަލުކޮށް އީރާނުގެ ރައްޔިތުން ބޭނުންވާފަދަ ވެރިކަމެއް ގާއިމް ކޮށްދިނުމުގެ ބޭނުމުގައި ހަނގުރާމަ ފެށީ ކަމަށްވެސް ޓްރަމް އެތަށް ފަހަރަކު ވިދާޅުވެފައިވެއެވެ.
މިގެއިތުރުން އީރާނާ ދެކޮޅަށް ދިގުލީ ހަނގުރާމައެއް ކުރަން ބޭނުންނުވާކަމަށް ބައެއްފަހަރު ޓްރަމްޕް ވިދާޅުވާއިރު އަނެއްބައި ފަހަރު ވިދާޅުވަނީ ހަނގުރާމަ ދިގުލައިގެން ހިނގައިދާނެކަމަށެވެ.
ޓްރަމްޕްގެ އިތުރުން އެމެރިކާގެ ނައިބު ރައީސް ވާންސް އާއި ހަނގުރާމައާބެހޭ ވަޒީރު ހެގްސެޓްވެސް ހަނގުރާމަ ފެށި ސަބަބު ޖަސްޓިފައި ކޮށްދިނުމާބެހޭގޮތުން ގެންދަވަނީ އެކި ފަހަރު އެކި ގޮތަށް ވާހަކަ ދައްކަވަމުންނެވެ. މިއީ އެއްވެސް ލަނޑުދަނޑިއަކާ ސްޓްރެޓެޖީ އެއްނެތި ހަނގުރާމަ ފެށުމުން ވާގޮތެއްކަމަށް ތަޖުރިބާކާރުން ވިދާޅުވެއެވެ.
ޔަހޫދީ ބޮޑުވަޒީރު ނަތަންޔާހޫ ވެސް ގެންދަނީ އީރާނާ ދެކޮޅަށް ހަނގުރާމަ ފެށި ސަބަބު ޖަސްޓިފައި ކޮށްދިނުމަށް އެކިފަހަރު އެކިގޮތަށް ބަޔާންތައް ދެމުންނެވެ.
މުހައްލިލުން ވިދާޅުވާގޮތުގައި އެމެރިކާއާއި އިސްރާއީލުގެ ހަމަލާތަކުން އީރާނަށް ކިތަންމެ ބޮޑެތި ގެއްލުންތަކެއް ލިބުނުނަމަވެސް އެކަން އީރާނުގެ ރައްޔިތުންނާއި ވެރިން ތަހައްމަލް ކުރާނެއެވެ. ނަމަވެސް ޔަހޫދީންނަށް ގެއްލުން ތަހައްމަލެއް ނުކުރެވޭނެއެވެ. އެއީ އެމީހުންނަކީ އިންތިހާއަށް މަރަށް ބިރުގަންނަ ބަޔަކަށް ވެފައި އަރާމު ދިރިއުޅުމުގައި އުޅެން ބޭނުންވާ ބަޔަކަށް ވާތީއެވެ.
އީރާނުގެ ހަމަލާތަކުން އިސްރާއީލަށް ލިބޭ ގެއްލުންތައް ދިގުމުއްދަތަކަށް ތަހައްމަލް ކުރުމަކީ އިސްރާއީލު ގެ ޔަހޫދީންނަށާއި ޔަހޫދީ ލީޑަރުންނަށް ކުރެވޭނެ ކަމެއް ނޫނެވެ.
އިސްރާއީލުން މިހާތަނަށް ހަނގުރާމަ ކުރާގޮތަކީ އިސްރާއީލުން އެހެންގައުމުތަކަށް ހަމަލާދީ އެގައުތަކަށް ބޮޑެތި ގެއްލުންތަކެއް ދީފައި އިސްރާއީލު ސަލާމަތުން އޮތުމެވެ. ނަމަވެސް އީރާނާއެކު ކުރާ ހަނގުރާމަތަކުގައި މިހެނެއް ނުވެއެވެ.
އީރާންވެސް އިސްރާއީލަށް އާދަޔާ ޚިލާފު ބޮޑެތި ގެއްލުންތަކެއް ދެމުން ގެންދެއެވެ. އިސްރާއީލުގެ ވައިގެ ދިފާއީ ނިޒާމުތައް ވަނީ އީރާނުގެ ހުރިހާ މިސައިލްތައް ވައްޓާލުމުގައި ނާކާމިޔާބު ވެފައެވެ. އެެހެންކަމުން އީރާނުގެ ވަރަށް ގިނަ މިސައިލްތައް އަރައި އިސްރާއީލުގެ އެތަށް ސިޓީއެއްގެ އެތަށް ސަރަހައްދެއްވަނީ މުޅިން ނޫނީ ދެބައިކުޅެ އެއްބައި ހަލާކުވެފައެވެ.
އީރާނުގެ ހަމަލާތަކުގެ ސަބަބުން އިސްރާއީލުގެ 300 އަށް ވުރެގިނަ އިމާރާތް ހަލާކުވެފައިވާއިރު އެހަމަލާތަކުގައި ވެއްޓިފައިވާ އިމާރާތްތަކުގެ ދަށުގައިވެސް ޔަހޫދީ އެތަށް ބަޔަކު ވަނީ ތާށިވެފައެވެ. މިއީވެސް އިސްރާއީލު މީހުންނަށް ބަލަން ފަސޭހަ މަންޒަރެއްނޫނެވެ.
މިދިޔަ އަހަރު އީރާނާ ދެކޮޅަށް ކުރި ހަނގުރާމަވެސް 12 ދުވަހަށްފަހު ހުއްޓާލަން އެމެރިކާގެ ކިބައިން އިސްރާއީލު އެދުނު ސަބަބަކީވެސް މިއީ ކަމަށް މުހައްލިލުން ވިދާޅުވެއެވެ.
އަނެއްކޮޅުން އީރާނުގެ ރައްދު ހަމަލާތަކުން ގަލްފުގެ އަރަބި ގައުމުތައް ސަލާމަތް ކޮށް ނުދެވުމާއި އެމެރިކާ އުންމީދުކުރި ގޮތަށް ކުއްލި ހަމަލާތަކެއް ދީގެން އީރާނުގެ ވެރިކަމުގެ ނިޒާމު ވައްޓައި ނުލެވުމަކީ ޓްރަމްޕަށްވެސް ކުރިމަތިވި ވަރަށް ބޮޑު ކަންބޮޑުވުމެކެވެ.
ޓްރަމްޕް މި އުދުވާނީ ހަނގުރާމަ ފެށީ އެމެރިކާގެ ރައްޔިތުންގެ މަސްލަހަތު ބޮލާލައި ޖެހުމަށްފަހު ޔަހޫދީ އިސްރާއީލުގެ މަސްލަހަތަށް އިސްކަން ދީގެންކަން މިހާރު ހާމަވެފައިވާތީ ޓްރަމްޕަށް ވަނީ ސިޔާސީ ގޮތުންނާއި ސްޓްރެޓީޖިކް ގޮތުގައި އަމިއްލަ ގައުމުގައި ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.