ވޮޝިންޓަން (04 އޮކްޓޯބަރު 2026) : މިފަހަރު ކޮންމެވެސް އެއްގޮތަކަށް އީރާނުގެ ކަންތައް ނިންމާލާނެ ކަމަށާ އީރާން އިނދަޖައްސާލައި މުޅިން ބަލިކޮށްލުމަކީ އެމެރިކާއަށް އެއްވެސް ކަމެއް ނޫންކަމަށް އެގައުުމުގެ ހަރުކަށި ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ވައިޓް ހައުސްގައި ދެއްވި ބަޔާނެއްގައި ޓްރަމްޕް ވިދާޅުވީ އީރާނަށް އޮތީ އެމެރިކާއަށް ބޯލަނބައި އެމެރިކާ އެދޭފަދަ އެއްބަސްވުމަކަށް އައުމެވެ. ނޫނީ ބާރުގެ ބޭނުންކޮށްގެން އީރާން ބަލިކޮށް އިނދަޖައްސާލުމެވެ. މި ދެގޮތުން ކުރެ ގޮތެއް އިޚްތިޔާރު ކުރުން ނޫންގޮތެއް އީރާނަށް ނޯންނާނެކަމަށާ ބޭނުން ވެއްޖެނަމަ އީރާން އިނދަޖައްސާލުމަކީ އެމެރިކާ އަށް އެއްވެސް ކަމެއް ނޫންކަމަށް ޓްރަމްޕް ވިދާޅުވިއެވެ. އަދި އެމެރިކާއަށް ނުކުރެވޭނެ ކަމެއް ނޯންނާނެކަން އީރާން ހަނދާން ކުރަން ޖެހޭކަމަށްވެސް ޓްރަމްޕް ވިދާޅުވިއެވެ.
މިއީ ޓްރަމްޕް އަލަށް ދެއްކެވި ވާހަކައެއް ނޫނެވެ. ރިޕޯޓްތައް ބުނާގޮތުން ޓްރަމްޕް ވަނީ 16 ވަރަކަށް ފަހަރު މި ވާހަކަ ތަކުރާރު ކުރައްވައިފައެވެ. ޓްރަމްޕް މިގޮތަށް ވާހަކަ ދައްކަވާފައިވާއިރު ޓްރަމްޕްގެ އަމުރަށް އެމެރިކާގެ އަސްކަރިއްޔާއިން ގެންދަނީ ގަލްފުގެ ސަރަހައްދަށް ހަނގުރާމަމަތީ އިތުރު މަނަވަރުތަކާއި މަތިންދާ ބޯޓު އުފުލާ އިތުރު ދެ މަނަވަރު 10 ހާސް ސިފައިންނާއެކު ޖަމާކުރަމުންނެވެ. މިއާއެކު އީރާނުގެ އަވަށްޓެރި ގަލްފުގެ އަރަބި ގައުމުތަކުގައި އެމެރިކާގެ 40 ވަރަކަށް ހާސް ސިފައިން ތައްޔާރީ ހާލަތުގައި އެބަތިބިކަމަށް ރިޕޯޓްތައް ބުނެއެވެ.
އެހެން ފަހަރުތަކެކޭ އެއްގޮތަށް މިފަހަރުވެސް ޓްރަމްޕް ކުރަން މިއުޅެނީ ކޮންކަމެއްކަން އަދި ސާފުވެފައެއް ނުވެއެވެ. ނުރަސްމީ ރިޕޯޓްތައް ބުނާގޮތުން ޓްރަމްޕްގެ ޕްލޭންގައި އީރާނަށް އެއްގަމުން އަރައިގަތުންވެސް ހިމެނެއެވެ. ކުއްލި ހަމަލާތަކެއްދީ އީރާނުގެ ތެލުގެ ހުރިހާ މަރުކަޒުތަކާއި ކަރަންޓާއި ފެނުގެ މަރުކަޒުތައް ހަލާކުކޮށްލުމާއި އީރާނުގެ ނިއުކްލިޔާ މަރުކަޒުތަކާއި އެނޫންތަންތަނަށް ހުއްޓުމެއްނެތި އެތަށް ދުވަހެއް ވަންދެން ބޮންއެޅުންވެސް ހިމެނެއެވެ. ނަމަވެސް މިކަން ރަސްމީ ފަރާތަކުން ކަށަވަރުކޮށެއް ނުދެއެވެ.
މިއީ ޓްރަމްޕް މިގޮތަށް އީރާން ކައިރިއަށް އެމެރިކާގެ މަނަވަރުތަކާއި ސިފައިން ޖަމާކުރާ ފުރަތަމަ ފަހަރެއް ނޫނެވެ. އެތަށް ފަހަރަކު މިގޮތަށް ހަތިޔާރާއި މަނަވަރުތަކާއި ސިފައިންނާއި ވަސީލަތްތައް ޖަމާކޮށް އީރާނަށް އިންޒާރުތައް ދިނުމަށްފަހު އެކި ބަހަނާތައް ދައްކައި ޓްރަމްޕް އެތަށް ފަހަރަކު ފަހަތަށް ޖެހިފައިވެއެވެ.
އަނެއްކޮޅުން ޓްރަމްޕްގެ ހަނގުރާމައާބެހޭ ވަޒީރު ޕިޓް ހެގްސެޓް ވަނީ އީރާނުން ނިއުކްލިޔާ ޕްރޮގްރާމް އެއްކޮށް ދޫކޮށްލައި މުޅި ޕްރޮގްރާމް އަމިއްލައަށް ރޫޅާލުމަށް އީރާނަށް ގޮވާލައިފައެވެ. މިކަން އީރާން އަމިއްލައަށް ނުކޮށްފިނަމަ ދެން އެމެރިކާ މިކަން ކުރާނީ ބާރުގެ ބޭނުންކޮށްގެން ކަމަށްވެސް ޓްރަމްޕްގެ ހަނގުރާމައިގެ ވަޒީރު ވިދާޅުވިއެވެ. އެމެރިކާވަނީ ބާރުގެ ބޭނުންކޮށްގެން އީރާނުގެ ނިއުކްލިޔާ ޕްރޮގްރާމު ރޫޅާލުމަށް މީގެކުރިން ބޮންއަޅައިގެން އެތަށް މަސައްކަތެއްކޮށްފައެވެ.
އީރާނުގެ ނިއުކްލިޔާ މަރުކަޒުތަކަށް ކުރިން އެތަށްފަހަރަކު ބޮންއެޅުމަށްފަހު އެތަންތަން އެއްކޮށް ހަލާކުކޮށްލެވިއްޖެކަމަށް ދެ ފަހަރެއްގެ މަތިން ހެގްސެޓް ވިދާޅުވެފައިވެސް ވެއެއެވެ. އަދި ޓްރަމްޕްވެސް އީރާނުގެ ނިއުކްލިޔާ މަރުކަޒުތައް އެއްކޮށް ހަލާކުކޮށްލެވިއްޖެކަމަށް އެތަށް ފަހަރަކު ވިދާޅުވެފައިވެއެވެ. އަދި އީރާނުން ނިއުކްލިޔާ ޕްރޮގްރާމު ގެ ބޮޑުބައި ދޫކޮށްލަން އެމެރިކާއާއެކު އެއްބަސްވެފައިވާކަމަށްވެސް ދެފަހަރެއްގެ މަތިން ޓްރަމްޕް ވަނީ ވިދާޅުވެފައެވެ.
ޓްރަމްޕްގެ ހަނގުރާމައާބެހޭ ވަޒީރު ޕިޓް ހެގްސެޓް އީރާނުން ނިއުކްލިޔާ ޕްރޮގްރާމް އެއްކޮށް ދޫކޮށްލައި މުޅި ޕްރޮގްރާމް އަމިއްލައަށް ރޫޅާލުމަށް އީރާނަށް ގޮވާލައިފައި ވަނީވެސް ނިއުކްލިޔާ ޕްރޮގްރާމު ގެ ބޮޑުބައި ދޫކޮށްލަން އެމެރިކާއާއެކު އީރާން އެއްބަސްވެފައިވާކަމަށް އިއްޔެ ޓްރަމްޕް ވިދާޅުވެފައި ވަނިކޮށެވެ. އެމެރިކާގެ ވަޒީރުގެ ވާހަކަތަކާއި ޓްރަމްޕްގެ ވާހަކަތައް ފުށުއަރާއިރު ޚުދު ޓްރަމްޕް އެއްދުވަހު ދައްކަވާ ވާހަކަތައް އަނެއް ދުވަހު ދައްކަވާ ވާހަކަތަކާ 180 ޑިގްރީ ފުށުއަރާކަން މުރާސިލުން ފާހަގަ ކުރެއެވެ.