ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިހާބު އެއްކޮށްލަން ސަރުކާރުން ފެންނަ ނުފެންނަ ވޯޓަކާއި ހަމައަށް ދާއިރު، ރައްޔިތުންނަށް ވާނުވާ ނޭނގޭ ކަމަށާއި ފަސް އަހަރުން އެއްފަހަރު އިންހާބެއް ބާއްވަން 60 މިިލިއަން ނުވަތަ 100 މިލިއަން ހަރަދުކުރަން ޖެހުނު ނަމަވެސް އެއީ ބޮޑު އަދަދެއް ނޫން ކަމަށް ކުރީގެ ރައީސް އިބްރާހިމް މުޙައްމަދު ޞާލިހް ރޭ ވިދާޅުވެއްޖެއެވެ.
އެމަނިކުފާނު މިފަައިން ވިދާޅުވެފައި ވަނީ އަންނަ އޭޕްރިލް މަހު ސަރުކާރުން، ރައްޔިތުންގެ ޚިޔާލު ހޯދަން ނަގަން ނިންމާފައިވާ ވޯޓަށް ނޫނެކޭ ބުނެ އެމްޑީޕީއިން ރޭ ކުރިއަށްގެންދިޔަ ހަރުގެ ޖަލްސާގައެވެ.
ޞާލިހް ވިދާޅުވީ ޚަރަދު ކުޑަކުރަންކަމަށް ބުނެ ސަރުކާރުން ދައްކަނީ ފަސް އަހަރަށް ހޮވާފައި އޮތް ރައްޔިތުންގެ މަޖިލީހުގެ ދައުރު ކުޑަކުރާ ވާހަކަ ކަމަށެވެ. ގާނޫނުއަސާސީއަށް އިސްލާހެއް ހުށަހަޅާކަމުގައިވާނަމަ، އެ އިސްލާހަކާ ބެހޭގޮތުން ރައްޔިތުން ދެކޭގޮތް ބެލޭނެ ގޮތްތަކެއް، ހާމަކޮށް ލިޔެވިފައި އޮންނަން ވާނެ ކަމަށް ވެސް ޞާލިހް ވަނީ ވިދާޅުވެފައެވެ.
ބަހުސްކުރެވެން ޖެހޭނެ. އެ ދާއިރާގެ ބޭފުޅުންގެ މަޝްވަރާ ހޯދަން ޖެހޭނެ. ގާނޫނު އަސާސީއަށް 18 އަހަރު ފުރުނު އިރުގައި މިއިން މާއްދާއެއް އިސްލާހުކުރަން މި ޖެހެނީ ކީއްވެގެންތޯ؟ބަލަންޖެހޭނެ. އެއަށްފަހުގައި ނޫނީ ރައްޔިތުންނާ ހަމައަށް މިއިން ކަމެއް ގެނެސްގެން ނުވާނެ. ކުރީގެ ރައީސް އިބްރާހިމް މުޙައްމަދު ޞާލިހް
ޞާލިހް ވަނީ ދެ އިންތިޚާބު އެއްކޮށްލުމަށް ރައްޔިތުންނާ ހަމައަށް އިސްލާހު ގެނައިއިރު، ރައްޔިތުންނަށް އެކަމުގެ ވާނުވާ ނޭނގޭ ކަމަށް ވިދާޅުވެފައެވެ. އަދި ސަރުކާރުން ބުނާގޮތުގައި، ދެ އިންތިޚާބު އެއްކޮށްލަނީ 50 މިލިއަަން ރުފިޔާގެ ގެއްލުމެއް ކުޑަކުރަންކަން ވެސް ޞާލިހުވަނީ ފާހަގަކުރައްވައިފައެވެ.
އެ ކީއްތޯ 60 މިލިއަން ވިޔަސް. 100 މިލިއަން ވިޔަސް. އެއީ ބޮޑު އެއްޗެއް ނޫން އިންތިހާބެއް ބާއްވާކަށެެއް، ފަސް އަހަރު ދުވަހުން އެއްފަހަރު. 60 މިލިއަނަށް ވެއްޖީޔާ މި ދައްކަނީ 12 މިލިއަން ރުފިޔާގެ ވާހަކަ އަހަރެއްގައި. މަހެއްގެ މައްޗަށް އެއް މިލިއަން. ކުރީގެ ރައީސް އިބްރާހިމް މުޙައްމަދު ޞާލިޙް
ޞާލިހް ވަނީ ހަރަދު ކުޑަކުރާށޭ ބުނެ ދެ އިންތިހާބު އެއްކޮށްލުމަކީ އެއްވެސް ހާލެއްގައި ކޮށްގެން ވާނެކަމެއް ނޫން ކަމަށް ވިދާޅުވެފައެވެ. އޭގެ ފަހަތުން މުޅި ނިޒާމަށް އަރާ ލޮޅުން، ދެނެގަންނަން ޖެހޭކަމަށް ވަނީ ވިދާޅުވެފައެވެ. ޞާލިހް ވިދާޅުވީ އެމްޑީޕީއިން ފެންނަ ނުފެންނަ ވޯޓަށް ނޫނެކޭ ބުނަނީ އެ ސަބަބުތަކަށް ޓަކައި ކަމަށެވެ.
މީގެ އިތުރުން ޞާލިހް ވަނީ 2008ވަނަ އަހަރުގެ ގާނޫނު އަސާސީއަށްފަހު ބޭއްވުނު އިންތިހާބުތަކުގެ ނަތީޖާ ނިކުމެފައިވާގޮތަށް ބަލަން ޖެހޭކަމަށް ވިދާޅުވެފައެވެ. ދެހާސް ތޭރަވަނަ އަހަރު ރައީސް ޔާމީން އިންތިހާބުވެވަޑައިގެން، އޭގެ ފަސް މަސް ފަހުން މަޖިލީސް އިންތިހާބު ބޭއްވުމުން 69 އިންސައްތަ އެމަނިކުފާނު ކާމިޔާބުކުރެއްވިކަން ޞާލިހް ވަނީ ފާހަގަކުރައްވާފައެވެ. އެއަށްފަހު އެމްޑީޕީއިން ވެރިކަމަށް އައިސް މަޖިލީހުގެ 75 ޕަސެންޓް ކާމިޔާބު ކުރެއްވި ކަމާއި މިހާރު ޕީއެންސީއިން މަޖިލީސް އިންތިހާބުގެ 78 ޕަސެންޓް ކާމިޔާބުކޮށްފައިވާކަން ފާހަގަކުރައްވައިފައެވެ.
އެހެންކަމުން، ދެ އިންތިޚާބު އެހާ ކައިރީގައި އޮތުމުން ވެރިކަމުގެ ނުފޫޒާއި ބާރު ރައްޔިތުންގެ މަޖިލީހަށް ވަރަށް ބޮޑަށް ފޯރާފައިވާކަމަށާއި ވެރިކަމުގައި ހުންނަ ބޭފުޅަކު އެ ކޮންޓްރޯލް ނަންގަވާކަން ޞާލިހުވަނީ ފާހަގަކުރައްވަފައެވެ.
އެހެންކަމުން ދެ އިންތިހާބު އެއްކުރުމުން، ނުވަތަ އެއް ދުވަހެއްގައި ބޭއްވުމުން ދެން ވެގެންދާނެ ގޮތް ރައްޔިތުން ވިސްނަން ޖެހޭކަން ޞާލިހުވަނީ ފާގަކުރައްވާފައެވެ. ޞާލިހު ވަނީ، ވެރިކަމުގެ ބާރާއި ފައިސާގެ އިތުރުން ވަޒީފާޔާއެކު އިންތިޚާބަށް ނިކުމެވަޑައިގަތުމުން މުޅި މަޖިލީސް އެކުގައި ވެރިކަމުގައި ހުންނަވާ ބޭފުޅަކު ނަންގަވާނެ ކަމަށް ވިދާޅުވެފައެވެ. އަދި ނަތީޖާއަކަށް ވެގެންދާނީ ސަރުކާރު ޖަވާބުދާރީކުރަން އޮތް ފުރުސަތު މުޅިން ގެއްލިގެން ދިއުންކަން އޭނާ ވަނީ ފާހަގަކުރައްވާފައެވެ.
އިދިކޮޅު އެމްޑީޕީއިން ދަނީ އެ އިންތިހާބަށް ނޫނެކޭބުނެ ޖަލްސާތަކާއި ކެމްޕއިން ހަރަކާތްތައް ހިންގަމުންނެވެ.