މެދު އިރުމަތީގައި މިހާރު ދިމާވެފައި އޮތް ނުތަނަވަސްކަމާ ގުޅިގެން ރާއްޖޭގައި ނުފުރި ތާށިވި ފަތުރުވެރިންނަށް ވިސާގެ މުއްދަތު އިތުރުކޮށްދޭން އިމިގްރޭޝަނުން ނިންމައިފިއެވެ.
މިދިޔަ ހޮނިހިރުން ފެށިގެން އިސްރާއިލާއި އެމެރިކާއިން އަންނަނީ އީރާނަށް ހަމަލާ ދެމުންނެވެ. އީރާނުން ވެސް ރައްދު ހަމަލާތައް ދެމުން އަންނައިރު، އެ ސަރަހައްދުގެ ގައުމުތަކުގެ ވައިގެ ސަރަހައްދު މިހާރު ވަނީ ބަންދުކޮށްފައެވެ.
އެހެންވެ، އެންމެ ގިނައިން އެ ސަރަހައްދުން ފަތުރުވެރިން އަންނަ އެއާލައިންތައް ހުއްޓި، ގިނަ އަދަދެއްގެ ފްލައިޓުތައް އަންނަނީ ކެންސަލްވަމުންނެވެ. ހޮނިހިރު ދުވަހު އެކަނި ވެސް، ވެލާނާ އެއާޕޯޓުގައި ނުފުރި ހާހަކަށްވުރެ ގިނަ ފަތުރުވެރިން ތާށިވިއެވެ.
ތަފާސްހިސާބުތަކަށް ބަލާއިރު، އިއްޔެ ވެސް 19 ފްލައިޓް ކެންސަލްވެ، 3،530 ފަސިންޖަރުންނަށް ދަތިތަކާ ކުރިމަތިވިއެވެ.
ފަތުރުވެރިންތަކެއް ވެލާނާ އެއާޕޯޓުގައި -- ފޮޓޯ/ އެމްއޭސީއެލް
އިމިގްރޭޝަނުން މިއަދު ބުނީ، ނުފުރި އެއާޕޯޓުގައި ތާށިވި ބައެއް ފަތުރުވެރިންގެ ވިސާގެ މުއްދަތު ހަމަވުމުގެ ކުރިން ފުރޭނެ އިންތިޒާމެއް ނެތުމުން އެ މީހުންގެ ޓޫރިސްޓު ވިސާ އިތުރުކޮށްދިނުމަށް ނިންމާފައިވާ ކަމަށެވެ.
ނުފުރި އެއާޕޯޓުގައި ތާށިވި ފަސިންޖަރުންނަށް އެމްއޭސީއެލްއިން ވަނީ، ކުރީގެ ޑޮމެސްޓިކް ޓާމިނަލުގެ ތެރޭ ތިބެވޭނެ އިންޒިތާމު ހަމަޖައްސަދީފައެވެ.
ޓޫރިޒަމް މިނިސްޓަރު ތޯރިގު އިބްރާހީމް ވަނީ، ރާއްޖެއަށް ދުވާލަކު އަންނަ ފަތުރުވެރިންގެ ތެރެއިން 35 އިންސައްތަ ފަތުރުވެރިންނަކީ މެދުއިރުމަތީގެ ފަތުރުވެރިން ކަމަށް ވާއިރު، ހަނގުރާމައިގެ ސަބަބުން ދެން އެ އަދަދު ވެސް ދަށްވާނެ ކަމަށާއި އޭގެ އަސަރު ވަރަށް ބޮޑަށް އާމްދަނީއަށް ކުރާނެ ކަމަށް ވިދާޅުވެފައެވެ.
ޓްރާންސްޕޯޓް މިނިސްޓްރީން ވަނީ، ގެއްލުން ކުޑަކުރަން އިތުރު އެއާލައިންތައް ރާއްޖެ ގެންނަން ނިންމާފައިވާ ކަމަށް ބުނެފައެވެ.
އިސްރާއީލުން އީރާނަށް ހަމަލާ ދިނުމުގެ ސަބަބުން މެދުއިރުމަތީގެ މަސްރަހު ހޫނުވެ، މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ވަނީ ވަގުތީ ގޮތުން ބަންދުކޮށްފައެވެ. މީގެ ސަބަބުން ސަޢޫދީ ހިމެނޭހެން އެ ސަރަހައްދުގެ ގިނަ ގައުމުތަކެއްގެ ވައިގެ ދަތުރުތަކަށް ވަނީ ބަދަލުތަކެއް ގެންނަން ޖެހިފައެވެ.