އެމެރިކާގެ ނިއުޔޯކުގެ ހޮސްޕިޓަލެއްގައި އާދަޔާ ޚިލާފަށް ބަރުދަން ހުރި ކުއްޖަކު މި ފަހުން އުފަންވެއްޖެއެވެ.
ނިއުޔޯކުގެ ކަޔޫގާ މެޑިކަލް ސެންޓަރުގައި މީގެ ދެތިން ދުވަސް ކުރިން އުފަންވި މި ކުއްޖާގެ ބަރުދަނުގައި 13 ޕައުންޑް ނުވަތަ 5.9 ކިލޯ ހުއްޓެވެ.
ޝޯން ޖޫނިއާގެ ނަން ދީފައިވާ މި ކުއްޖާއަކީ އެ ހޮސްޕިޓަލުގެ ތާރީޚުގައިވެސް މިހާތަނަށް އުފަންވި އެންމެ ބަރު ކުއްޖާ ކަމަށް ހޮސްޕިޓަލުން މައުލޫމާތު ދެއެވެ. މި ކުއްޖާގެ މައިންބަފައިން ކަމަށްވާ ޓެރިކާ އަދި ޝޯން ބުނިގޮތުގައި، ކުއްޖާ ބޮޑުވާނެކަން ކުރިންވެސް އެނގުނު ނަމަވެސް، މިހާ ބޮޑުވެދާނެ ކަމަށް ހީކޮށްފައެއް ނުވެއެވެ.
އާންމު ގޮތެއްގައި އުފަންވާއިރު ކުއްޖެއްގެ ގައިގައި ހުންނަނީ 2.5 ކިލޯ އާއި 3.5 ކިލޯއާ ދެމެދުގެ ބަރުދަނެކެވެ. ނަމަވެސް ޝޯން ޖޫނިއާގެ ބަރުދަނުގައި 5.9 ކިލޯ ހުރުމުން، އެއީ އާދައިގެ ތިން މަހުގެ ކުއްޖެއްގެ ބަރުދަނެވެ.
"ހީވަނީ ހަމަ ސީދާ ތިން މަހުގެ ކުއްޖަކު ލިބުނުހެން. އުފަންވީއިރުވެސް ހެޔޮވަރުވަނީ ތިން މަހާއި ހަ މަހާ ދެމެދުގެ ކުދިންނަށް ޚާއްސަ އަންނައުނާއި ޑައިޕާ" ކުއްޖާގެ މަންމަ ޓެރިކާ މީޑިއާތަކަށް މައުލޫމާތު ދެމުން ބުންޏެވެ.
މިކަން އިތުރަށް ޚާއްސަވީ، ޝޯން ޖޫނިއާ އުފަންވި ދުވަހު ހަމަ އެ ހޮސްޕިޓަލަށް އުފަންވި އެހެން ކުއްޖަކާ އަޅާކިޔުމުންނެވެ. ހޮސްޕިޓަލުން ވަނީ 5.9 ކިލޯގެ ޝޯން ޖޫނިއާ އާއި، އެދުވަހު އުފަންވި 1.8 ކިލޯގެ މާގޯ ނަމަކަށް ކިޔާ ކުއްޖެއްގެ ފޮޓޯއެއް އާންމުކޮށްފައެވެ. މި ފޮޓޯއިން ދެ ކުދިންގެ ސައިޒުގެ ތަފާތު ވަރަށް ބޮޑަށް ފާހަގަވެގެން ދިޔައެވެ.
ކުޑަ ކުއްޖާ މާގޯގެ މަންމަ ކްލޯއީ ބުނިގޮތުގައި، މި ދެ ކުދިން އެއްކޮށް ފެނުމުން ކޮންމެ ކުއްޖަކީވެސް ތަފާތު އަދި ޚާއްސަ ކުއްޖެއްކަން އިހުސާސް ކުރެވުނެވެ. ހޮސްޕިޓަލުގެ މެނޭޖްމަންޓުންވެސް ވަނީ ކުއްޖާގެ ބަރުދަނަށް ބެލުމެއްނެތި ކޮންމެ އުފަންވުމަކީވެސް އުފާވެރި އަދި ޚާއްސަ ކަމެއްގެ ގޮތުގައި ފާހަގަކޮށްފައެވެ.
ދުނިޔޭގެ ރެކޯޑު ފޮތުގައިވާ ގޮތުން މިހާތަނަށް ދުނިޔެއަށް އުފަންވި އެންމެ ބަރު ކުއްޖަކީ 1955 ވަނަ އަހަރު އިޓަލީގައި އުފަންވި ކުއްޖެކެވެ. އެ ކުއްޖާގެ ބަރުދަނުގައި 9.9 ކިލޯ (22 ޕައުންޑް) ހުއްޓެވެ.