މީހަކު ރަހީނުކޮށްގެން ގެންގުޅެ، އަނިޔާކުރި މައްސަލައެއްގައި ބަންގްލަދޭޝްއަށް ނިސްބަތްވާ މީހަކު ހައްޔަރުކޮށްފިއެވެ.
ފުލުހުން ބުނީ މިދިޔަ ބުރާސްފަތި ދުވަހުގެ ރޭ 1:22ހާއިރު، ހުއްދަ ނޫން ގޮތުގައި މީހަކު ހިފަހައްޓާފައިވާ ކަމުގެ ރިޕޯޓު ލިބުނު ކަމަށެވެ. އެ މައްސަލައިގެ ތަހުގީގު ތެރެއިން ކުރި މަސައްކަތުން، އެ މީހާ ހިފަހައްޓާފައި ހުރި ތަން ދެނެގަނެ، ބާރުގެ ބޭނުންކޮށްގެން ވަދެ، 2:29ހާއިރު އެ މީހާ ސަލާމަތް ކުރި ކަމަށް ފުލުހުން ބުންޏެވެ.
އެ މައްސަލައިގައި، މީހަކު ރަހީނުކުރުމުގެ ތުހުމަތުގައި ހައްޔަރުކޮށްފައިވަނީ 35 އަހަރުގެ، އިގްބާލް މިއާ ކިޔާ މީހެކެވެ.
ބަންދު އަމުރުގައިވާ ގޮތުން، ބިދޭސީ މީހަކު ރަހީނުކޮށްގެން ގެންގުޅެ، އޭނާއަށް އަނިޔާކުރުމުގެ ތުހުމަތު އިގްބާލްގެ މިއާގެ މައްޗަށް ވަނީ ކޮށްފައެވެ. އޭނާ ކުށް ކުރި ކަމަށް އެކަށީގެންވާ ވަރަށް ހެކި ހުށަހަޅައިފައިވާ ކަމަށް ބަންދު އަމުރުގައިވެއެވެ.
އިގްބާލް މިއާ ރާއްޖޭގައި އުޅެނީ ގަވައިދާ ޚިލާފަށް ކަމަށް ފާހަގަކޮށް، ކޯޓުން ވަނީ އޭނާގެ ފަރާތުން މުޖުތަމައަށް ނުރައްކަލެއް ކުރިމަވެދާނެ ކަމަށް ފެންނަ ކަމަށް ވެސް ފާހަގަކޮށްފައެވެ.
އެހެންވެ، އޭނާ އިއްޔެއިން ފެށިގެން 30 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ރާއްޖޭގައި ބިދޭސީންގެ ބޮޑު އާބާދީއެއް އޮންނައިރު، ބިދޭސީން ރަހީނުކޮށް، އަނިޔާކުރުމުގެ މައްސަލަތައް މީގެ ކުރިން ވެސް ފެންމަތިވެފައިވެއެވެ. އަދި އެ ކުށުގައި އެހެން ބިދޭސީން ޝާމިލުވުމުގެ ތުހުމަތުގައި އެ މީހުން ހައްޔަރުކޮށްފައިވެސް އެބަހުއްޓެވެ.