އަންނަ ހަފުތާގައި ފެށޭ ރޯދަ މަހު، ރާއްޖޭގެ އެކި ކަންކޮޅުތަކުގައި އުޅޭ 300 އާއިލާއަކަށް އެހީވުމަށް ތަކެތި ހަދިޔާކުރުމަށް މަމްސް އެއިޑުން ހުޅުވާލައިފިއެވެ.
މި ކަމަކީ، އެ ޖަމިއްޔާގެ 'ރަމަޟާން އެއިޑް' ކެމްޕެއިންގެ ތެރެއިން ކުރާ ކަމެކެވެ.
މަމްސް އެއިޑުން ބުނީ، އެ ކެމްޕެއިންގެ އެންމެ މުހިންމު އެއް މަސައްކަތީ، ރަމަޟާން މަހުގެ ތެރޭގައި އާއިލާތަކަށް ބޭނުންވާނެ އަސާސީ ކާބޯތަކެތީގެ ސާމާނު ހިމެނޭ އެހީ ޢާއިލާތަކަށް ފޯރުކޮށްދިނުން ކަމަށެވެ.
އެގޮތުން، 1،200 ރުފިޔާގެ އަގުހުރި "ކެއާ ބާސްކެޓް"ތަކަކީ، ރޯދަމަހުގެ އާދަކާދަތަކާއި ނިއުޓްރިޝަނަށް ބަލައިގެން ޢާއިލާތަކަށް ފަސޭހަކަމާއެކު ރޯދައަށް ހުރުމަށް އެހީތެރިވެދޭނެ ބާސްކެޓްތަކެއް ކަމަށް އެ ޖަމިއްޔާއިން ބުނެއެވެ. އަދި، 75 ރުފިޔާއަށް "އިފްތާރު ޕެކް"އެއް ސްޕޮންސާ ކޮށްގެންވެސް، ރޯދަ މަހުގެ ތެރޭގައި އާއިލާތަކަށް ރޯދަވީއްލުމުގެ ކަންކަމުގައި އެހީތެރިކަން ފޯރުދިނުމުގެ ފުރުސަތު ވަނީ ހުޅުވާލައިފައެވެ.
މި އަހަރުގެ އެ ކެމްޕެއިންގެ ދަށުން ރާއްޖޭގެ އެކި ސަރަހައްދުތަކުގައި ނިކަމެތި ހާލުގައި ދިރިއުޅޭ، ޙާލަތު ކަށަވަރުކުރެވިފައިވާ 300 ޢާއިލާއަކަށް އެހީ ފޯރުކޮށްދިނުމަށް އެ ޖަމިއްޔާއިން ވަނީ ނިންމާފައެވެ. އެ އެހީ ލިބޭނެ ފަރާތްތައް ކަނޑައަޅަނީ، އެންމެ ބޮޑަށް އެހީއަށް ބޭނުންޖެހިފައިވާ ފަރާތްތަކަށް އެހީ ފޯރުކޮށްދިނުމުގެ މަގުސަދުގައި މަމްސް އެއިޑުގެ ޚާއްސަ ވެރިފިކޭޝަން މަރުހަލާއަކަށް ފަހުގައެވެ.
ދެހާސް ނަވާރަ ވަނަ އަހަރުން ފެށިގެން މަމްސް އެއިޑުން އަންނަނީ ދަތި ހާލަތްތަކުގައި އުޅޭ ޢާއިލާތަކުގެ ޙައްޤުގައި މިފަދަ އެހީތެރިކަން ފޯރުކޮށްދެމުންނެވެ.
މި ހަރަކާތަށް އެހީ ފޯރުކޮށްދިނުމަށް މިހާރު ވަނީ ހުޅުވާލާފައެވެ. އެގޮތުން، ބާސްކެޓު ތައްޔާރުކުރުމަށް ބޭނުންވާ ތަރުކާރީއާއި މޭވާ ދަޅާއި ކިރު ޕެކެޓު ފަދަ ތަކެތި ވެސް މިހާރު ހުށަހެޅޭނެއެވެ.
އެ ތަކެތި މިއަދު 16:00 އާއި 20:00އަށް ގަލޮޅު މަދަރުސާއަށް ގެންގޮސް ދިނުމަށް މަމްސް އެއިޑުން ވަނީ އެދިފައެވެ.
އެ ޖަމިއްޔާގެ އޮޕަރޭޝަންސް ޑައިރެކްޓަރު ޒައިން ޒަރީރު ވިދާޅުވީ، އެ ކެމްޕެއިން މެދުވެރިކޮށް އެހީއަށް ބޭނުންވާ އާއިލާތަކަށް ކުރިމަތިވެފައިވާ ދަތިތަކަށް ލުޔެއް ހޯދައިދެވޭނެ ކަމަށެވެ. އަދި، އެކަކު އަނެކަކަށް އެހީތެރިވުމުގެ ރޫހު އާލާކުރެވޭނެ ކަމަށް އޭނާ ވަނީ ވިދާޅުވެފައެވެ.