ސްމާޓްފޯން ބާޒާރުގައި ބެޓެރީގެ ރޭހުގައި އެޕަލް މިހާރު ކުޑަކޮށް ފަހަތުގައި އޮތް ނަމަވެސް، ކުރިއަށް އޮތް އައިފޯން 18 އާއެކު މިކަން ބަދަލުކޮށްލާނެ ފަދަ "ގޭމް-ޗޭންޖިންގް" ނުވަތަ އިންގިލާބީ ބެޓެރީއެއް އެޕަލް އިން އުފައްދަމުންދާ ކަމަށް ރިޕޯޓުތައް ބުނަން ފަށައިފިއެވެ.
މިހާރުގެ މާކެޓަށް ބަލާއިރު، ސެމްސަންގުން އަންނަނީ 2026 ވަނަ އަހަރުގެ ނިޔަލަށް "ސޮލިޑް-ސްޓޭޓް" ބެޓެރީ އެ ކުންފުނީގެ އުފެއްދުންތަކަށް ތައާރަފުކުރުމަށް މަސައްކަތް ކުރަމުންނެވެ. ހަމައެއާއެކު، ޗައިނާގެ ބައެއް ފޯނު އުފައްދާ ކުންފުނިތަކުން މިހާރުވެސް 10,000 މިލީއެމްޕަޔަރުގެ ބޮޑެތި ބެޓެރީތައް ފޯނުތަކުގައި ބޭނުންކުރަން ވަނީ ފަށާފައެވެ.
މި ވާދަވެރިކަމުގެ ތެރޭގައި އެޕަލް އޮތީ ހިމޭނަކުންނެއް ނޫނެވެ. އިންޑަސްޓްރީގެ މަސްދަރުތަކުން ހާމަކުރާ ގޮތުގައި، އެޕަލްގެ ކުޕަޓީނޯ ހެޑްކުއާޓާސްގައި އަންނަނީ ސިއްރުވެރި، އާ ބެޓެރީ ޓެކްނޮލޮޖީއެއް ތަރައްގީ ކުރަމުންނެވެ.
މި ބެޓެރީގެ މަސައްކަތް އެޕަލް އިން ކުރަމުންދާތާ ދުވަސްތަކެއް ވެފައިވާކަމަށް ބެލެވެއެވެ. ކުރިން އަޑު ފެތުރުނު ގޮތުގައި، އެޕަލް އިން ތައާރަފުކުރަން އުޅުނު އެންމެ ތުނި ފޯނު "އައިފޯން އެއާ" ގައި މި އާ ބެޓެރީ ބޭނުންކުރުމަށް ރޭވިއެވެ. ނަމަވެސް އެ ވަގުތު އެ ޓެކްނޮލޮޖީ އެންމެ ފުރިހަމައަށް ތައްޔާރު ނުވުމުގެ ސަބަބުން އެކަން މަޑުޖައްސާލީއެވެ.
މިހާރުގެ ލަފާކުރުންތަކަށް ބަލާއިރު، އެޕަލްގެ މި އާ ބެޓެރީ ފެންނާނީ އައިފޯން 18 އިންނެވެ. މީގެ ސަބަބުން ފޯނުގެ ބެޓެރީ ލައިފަށް ބޮޑު ކުރިއެރުމެއް ލިބި، އެހެން ވާދަވެރިންނަށް ވުރެ އެޕަލް ކުރި ހޯދާނެ ކަމަށް ބެލެވެއެވެ.
އެޕަލްގެ އެންމެ ތުނި އައިފޯން -- އައިފޯން އެއާ
އައިފޯން ބޭނުންކުރާ ފަރާތްތަކުން އަބަދުވެސް އެންމެ ބޮޑަށް އެދޭ އެއް ކަމަކީ ބެޓެރީގެ ދިގުމިން އިތުރުވުމެވެ. އެހެންކަމުން، މި އާ ޓެކްނޮލޮޖީއަކީ އައިފޯންގެ ތާރީޚުގައި އަންނާނެ އެންމެ މުހިންމު އެއް ބަދަލަށް ވުމީ ގާތް ކަމެކެވެ.
ސްމާޓްފޯން އިންޑަސްޓްރީގައި މިހާރު އެންމެ ބޮޑު ވާދަވެރިކަމެއް އޮތީ ބެޓެރީގެ ލައިފް އިތުރުކުރުމުގައެވެ. ފާއިތުވި އަހަރުތަކުގައި އެޕަލް އިން ބޮޑަށް ބަރޯސާވެފައިވަނީ އައިފޯންގެ ސޮފްޓްވެއާ (އައިއޯއެސް) މެދުވެރިކޮށް ބެޓެރީ ބޭނުންކުރާ މިންވަރު ކުޑަކުރުމަށެވެ. ނަމަވެސް، ފޯނުތަކުގައި އާޓިފިޝަލް އިންޓެލިޖެންސް (އޭއައި) ފަދަ ބާރުގަދަ ފީޗާތައް ހިމަނަން ފެށުމާއެކު، މިހާރު ބޭނުންކުރާ ލިތިއަމް-އަޔަން ބެޓެރީތަކުގެ ފިޒިކަލް ލިމިޓޭޝަންތަކުގެ ސަބަބުން އިތުރު ކުރިއެރުން ހޯދުމަށް ވަނީ ހުރަސްތަކެއް ކުރިމަތިވެފައެވެ.
މީގެ ކުރިން ބައެއް ރިޕޯޓުތައް ބުނާގޮތުން، އެޕަލް އިން އަންނަނީ 2018 ވަނަ އަހަރުން ފެށިގެން އަމިއްލަ ބެޓެރީ ކެމިކަލް މެޓީރިއަލްތައް ތަރައްގީކުރުމުގެ މަސައްކަތް ކުރަމުންނެވެ. އޭގެ ބޭނުމަކީ ބެޓެރީގެ ސައިޒު ބޮޑުނުކޮށް، އޭގެ ޑެންސިޓީ ނުވަތަ ހަކަތަ ރައްކާކުރެވޭ މިންވަރު މަތިކުރުމެވެ.
މި އާ އީޖާދަކީ އެޕަލް އިން ސެމްސަންގާއި ޗައިނާގެ ވާދަވެރި ކުންފުނިތަކާ އެއްވަރުވުމަށް އަޅާ އެންމެ މުހިންމު ފިޔަވަޅެވެ.