ޣައްޒާގައި ފަލަސްތީނު ރައްޔިތުންނަށް ފާރަވެރިވެ، އެމީހުން ޓްރެކްކޮށް ހައްޔަރުކުރުމަށް އިސްރާއީލު ސިފައިން ބޭނުންކުރާ "ފޭޝަލް ރިކޮގްނިޝަން" ނުވަތަ މޫނު ދެނެގަންނަ އޭއައި ޓެކްނޮލޮޖީ، އިނގިރޭސިވިލާތުގެ ފުލުހުން މުޅި ގައުމުގައި ބޭނުންކުރަން ނިންމައިފިއެވެ.
އިނގިރޭސި ހޯމް ސެކްރެޓަރީ ޝަބާނާ މަޙްމޫދު އިއުލާނުކުރެއްވި ގޮތުގައި، ކުށްވެރިން ދެނެގަތުމަށްޓަކައި މި ޓެކްނޮލޮޖީ ބޭނުންކުރާ މިންވަރު ވަރަށް ބޮޑަށް އިތުރުކުރާނެއެވެ. މިގޮތުން، މިހާރު ބޭނުންކުރާ 10 ވޭންގެ ބަދަލުގައި، މޫނު ދެނެގަންނަ ސިސްޓަމްތައް ހަރުކޮށްފައިވާ 50 އަށްވުރެ ގިނަ ވޭން މުޅި އިނގިރޭސިވިލާތުގެ އެކި ސަރަހައްދުތަކުގައި ހަރަކާތްތެރިވާނެއެވެ.
އަލްޖަޒީރާއިން ކުރި ތަހުގީގަކުން އެނގިފައިވާ ގޮތުގައި، މި ސޮފްޓްވެއާ ފޯރުކޮށްދިނުމަށް އިނގިރޭސި ސަރުކާރުން ހަވާލުކޮށްފައިވަނީ އިސްރާއީލުގެ "ކޯސައިޓް އޭއައި" ނަމަކަށް ކިޔާ ކުންފުންޏަކާއެވެ. މި ކުންފުންޏަކީ ޣައްޒާގެ ޗެކްޕޮއިންޓްތަކުން ހުރަސްކުރާ ފަލަސްތީނު މީހުން ދެނެގަނެ، އެ މީހުން ހައްޔަރުކުރުމަށް އިސްރާއީލުގެ އަސްކަރީ އިންޓެލިޖެންސް ޔުނިޓް 8200 އިން ބޭނުންކުރާ ސިސްޓަމް ފޯރުކޮށްދޭ ކުންފުންޏެވެ.
އިސްރާއީލުގެ އޮފިޝަލުންނާ ހަވާލާދީ ރިޕޯޓްތައް ބުނާގޮތުން، ޣައްޒާގައި މި ސިސްޓަމް ބޭނުންކުރުމުގެ ތަޖުރިބާގައި އޭގެ ސައްހަކަމާމެދު ވަނީ ސުވާލު އުފެދިފައެވެ. މި ސޮފްޓްވެއާގެ ސަބަބުން އޮޅުމަކުން އެތައް ސަތޭކަ ފަލަސްތީނު ރައްޔިތުންނެއް ހައްޔަރުކޮށްފައިވާކަން ވެސް ވަނީ ހާމަވެފައެވެ.
ކޯސައިޓް ކުންފުނީގެ ބޯޑުގައި އިސްރާއީލުގެ އިންޓެލިޖެންސް އަދި ސަލާމަތީ ބާރުތަކުގެ ކުރީގެ އިސް ވެރިން ހިމެނެއެވެ. އޭގެ ތެރޭގައި ޣައްޒާގެ އުތުރު ބަނޑަށް ޖެއްސުމަށް ރޭވި "ޖެނެރަލްސް ޕްލޭން" ހުށަހެޅި ރިޓަޔާޑް މޭޖާ ޖެނެރަލް ގިއޯރާ އީލަންޑް ހިމެނޭއިރު، މިއީ އިނގިރޭސި ސަރުކާރުން ވެސް ކުރިން ކަންބޮޑުވުން ފާޅުކޮށްފައިވާ މައްސަލައެކެވެ.
މި ނިންމުމާ ގުޅިގެން އިންސާނީ ހައްގުތަކަށް މަސައްކަތްކުރާ އެމްނެސްޓީ އިންޓަނޭޝަނަލާއި ހިއުމަން ރައިޓްސް ވޮޗުން ވަނީ ވަރަށް ބޮޑަށް ފާޑުކިޔާފައެވެ. އެ ޖަމާއަތްތަކުން ބުނާގޮތުގައި، އިސްރާއީލުން ހިންގާ ގަތުލުއާންމާއި ނަސްލީ ތަފާތުކުރުމުގެ ނިޒާމަށް އެހީތެރިވާ ކުންފުނިތަކަށް އިނގިރޭސި ޓެކްސް ފައިސާ ހަރަދުކުރުމަކީ ބަލައިގަނެވޭނެ ކަމެއް ނޫނެވެ.
މި މައްސަލައިގައި އިނގިރޭސި ހޯމް އޮފީހުން ބުނެފައިވަނީ މިއީ "އޮޕަރޭޝަނަލް" ކަމެއް ކަމަށްވާތީ އިތުރު ތަފްސީލު ދެވެން ނެތް ކަމަށެވެ. އަދި މި މަޝްރޫއުގައި ހިމެނޭ ކުންފުނިތަކުން ވެސް މިކަމާ ގުޅޭގޮތުން މީޑިއާއަށް އެއްވެސް ޖަވާބެއް ދީފައެއް ނުވެއެވެ.