ގޫގުލްގެ އޭއައި ޚިދުމަތްތައް އެންމެ އަގުހެޔޮކޮށް ލިބޭ "ގޫގުލް އޭއައި ޕްލަސް" ސަބްސްކްރިޕްޝަން ދުނިޔޭގެ 165 ގައުމަކާއި ސަރަހައްދަކަށް އެ ކުންފުނިން ފުޅާކޮށްފިއެވެ.
މި ޕްލޭން އަލަށް ތައާރަފުކުރި 35 ގައުމުގެ ތެރޭގައި އެމެރިކާ ހިމެނޭއިރު، އެމެރިކާއަކީ މި ޚިދުމަތް އެންމެ ފަހުން ލިބުނު އެއް ގައުމެވެ. މީގެ ހަތަރު މަސް ކުރިން ގޫގުލްއިން ވަނީ އިންޑޮނޭޝިއާގައި މި ޚިދުމަތުގެ ޕައިލެޓް ޕްރޮގްރާމެއް ކުރިއަށް ގެންގޮސްފައެވެ.
ހިލޭ ބޭނުންކުރާ ޕްލޭނާއި "އޭއައި ޕްރޯ" ޕްލޭނާ ދެމެދުގެ މި ޚިދުމަތުގެ އަގަކީ އެމެރިކާގައި މަހަކު 7.99 ޑޮލަރެވެ. ނަމަވެސް، ލިމިޓެޑް މުއްދަތަކަށް ފުރަތަމަ ދެ މަހު މި އަގުން 50 އިންސައްތަ ޑިސްކައުންޓް ލިބޭނެ ކަމަށް ގޫގުލްއިން ބުނެއެވެ.
އިންޑިއާގެ މާކެޓަށް މި ޕްލޭން މިދިޔަ ޑިސެމްބަރު މަހު ތައާރަފުކޮށްފައިވާއިރު، އެ ގައުމުގައި މި ޚިދުމަތުގެ އަގަކީ ފުރަތަމަ ހަ މަސްދުވަހު މަހަކު 199 ރުޕީސްއެވެ. އޭގެ ފަހުން ކޮންމެ މަހަކު ދައްކަން ޖެހޭނީ 399 ރުޕީސްއެވެ.
މި ޕްލޭންގެ ދަށުން "ޖެމިނައި 3 ޕްރޯ" އޭއައި މޮޑެލް ބޭނުންކުރުމުގެ ފުރުސަތު ފުޅާދާއިރާއެއްގައި ލިބިގެންދާނެއެވެ. އެގޮތުން ހިލޭ ބޭނުންކުރާ ފަރާތްތަކަށް 32,000 ޓޯކަންގެ ކޮންޓެކްސްޓް ވިންޑޯއެއް ލިބޭއިރު، އޭއައި ޕްލަސް ކަސްޓަމަރުންނަށް 128,000 ޓޯކަންގެ ކޮންޓެކްސްޓް ވިންޑޯއެއް ލިބޭނެއެވެ.
މިއީ އޭއައި ބޭނުންކޮށްގެން ވީޑިއޯ އުފައްދާ "ވިއޯ 3 ފާސްޓް" މޮޑެލް ބޭނުންކުރެވޭނެ އެންމެ އަގުހެޔޮ މަގެވެ. މި ޚިދުމަތަކީ ހިލޭ ބޭނުންކުރާ ފަރާތްތަކަށް ލިބޭ ޚިދުމަތެއް ނޫނެވެ.
މީގެ އިތުރުން ޖީމެއިލް، ޑޮކްސް، އަދި ޑްރައިވް ފަދަ ވޯކްސްޕޭސް އެޕްލިކޭޝަންތަކުގައި ޖެމިނައިގެ އެހީތެރިކަން ލިބޭނެ "ސައިޑް ޕެނަލް" ފީޗާ މި ޕްލޭނާއެކު ލިބޭނެއެވެ. އަދި ވީޑިއޯ އުފައްދާ "ފްލޯ" އެޕާއި ފޮޓޯއިން ވީޑިއޯ އުފައްދާ "ވިސްކް" އެޕް ބޭނުންކުރުމުގެ ފުރުސަތު ވެސް ލިބިގެންދާނެއެވެ.
މި ސަބްސްކްރިޕްޝަނާ އެކު ކަސްޓަމަރުންނަށް ޖީމެއިލް، ފޮޓޯސް އަދި ޑްރައިވްގައި ބޭނުންކުރުމަށް 200 ޖީބީގެ ކްލައުޑް ސްޓޯރޭޖް ވެސް ލިބޭނެ ކަމަށް ގޫގުލްއިން މައުލޫމާތުދެއެވެ.