އެމެރިކާގެ ލަސްވެގަސްގައި ހުންނަ ހެރީ ރީޑް އިންޓަނޭޝަނަލް އެއާޕޯޓުން ފުރި ބްރިޓިޝް އެއާވޭސްގެ ފްލައިޓެއްގެ ފުރޮޅެއް ނެއްޓިގެން ވެއްޓިއްޖެއެވެ.
މި ހާދިސާ ހިނގާފައިވަނީ މިދިޔަ ހޯމަ ދުވަހުގެ (26 ޖެނުއަރީ 2026) ރޭ، ލަންޑަންގެ ހީތްރޯ އެއާޕޯޓަށް ދަތުރުކުރި BA274 ފްލައިޓަށެވެ. އެއާބަސް A350-1000 މަރުކާގެ މި ބޯޓު ރަންވޭއިން ނައްޓާލިތާ ކުޑަ ވަގުތުކޮޅެއްގެ ތެރޭގައި، ބޯޓުގެ ކަނާތްފަރާތު މައި ލޭންޑިން ގިއަރުގައި ހުރި ފަހަތު ފުރޮޅެއް ވަނީ ނެއްޓިގެން ވެއްޓިފައެވެ.
މި ހާދިސާ ހިނގި މަންޒަރު ފްލައިޓްރޭޑާ24ގެ ލައިވްސްޓްރީމް ކެމެރާއަކަށް ވަނީ އަރާފައެވެ. ރިޕޯޓުތައް ބުނާގޮތުގައި، ބޯޓު ރަންވޭއިން ނައްޓާލަން ދުއްވަމުން ދިޔައިރު، ގާތްގަނޑަކަށް 40 ސިކުންތު ތެރޭގައި ބޯޓުގެ ކަނާތްފަރާތު ފުރޮޅުތަކާ ދިމާލުން ކަނިބުރާ މަންޒަރު ފެނިފައިވެއެވެ. އަދި ބޯޓު ވައިގެ ތެރެއަށް އަރައި، ލޭންޑިންގ ގިއަރުތައް އެތެރެއަށް ލަނިކޮށް، އެއް ފުރޮޅު ނެއްޓިގެން ތިރިއަށް ވެއްޓޭ މަންޒަރު ވީޑިއޯއިން ފެނެއެވެ.
މި ހާދިސާގައި ލަސްވެގަސްގެ އެއާޕޯޓުން އެއްވެސް މީހަކަށް އަނިޔާއެއް ލިބިފައި ނުވާކަމަށް ރިޕޯޓުތައް ބުނެއެވެ.
ފުރޮޅެއް ނެއްޓުނު ނަމަވެސް، ބޯޓު ވަނީ 9 ގަޑިއިރާއި 17 މިނެޓުގެ ދަތުރަކަށްފަހު ސަލާމަތްތެރިކަމާއެކު ލަންޑަނަށް ޖައްސާފައެވެ.
މި މަރުކާގެ ބޯޓުތަކުގެ ކަނާތްފަރާތުގައާއި ވާތްފަރާތުގައި ހުންނަ މައި ލޭންޑިންގ ގިއަރުތަކުގައި ޖުމްލަ 12 ފުރޮޅު ހުރެއެވެ. އެއީ ކޮންމެ ފަރާތެއްގައި ހަ ފުރޮޅެވެ. ނެއްޓިފައިވަނީ ކަނާތްފަރާތު ފަހަތު ސަފުގެ ބޭރު ފުރޮޅެވެ.
ބްރިޓިޝް އެއާވޭސްގެ ތަރުޖަމާނަކު ވިދާޅުވީ، އެ އެއާލައިނުން އެންމެ އިސްކަމެއް ދެނީ ފަސިންޖަރުންގެ ސަލާމަތާއި ރައްކާތެރިކަމަށް ކަމަށާއި، މި ހާދިސާ ތަހުގީގު ކުރަމުންދާ ކަމާބެހޭ އިދާރާތަކަށް ފުރިހަމަ އެއްބާރުލުން ދެމުންދާ ކަމަށެވެ.