އޮޕަރޭޝަން އަލިމަގުގެ ދަށުން ފުލުހުން ހިންގި އޮޕަރޭޝަނެއްގައި، ބައި ކިލޯ ޑްރަގާއެކު ޒުވާނަކު، ހައްޔަރުކުރިއިރު އެ ޑްރަގް ހޯދީ އޭނާ ދިރިއުޅެމުން އަންނަ ސިފްކޯ ފްލެޓުން ކަން އެނގިއްޖެއެވެ.
ފުލުހުން ބުނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލޭގައި ހިންގި އޮޕަރޭޝަނެއްގައި މިދިޔަ ހޯމަ ދުވަހު ޒުވާނަކު ހައްޔަރުކޮށްފައިވާ ކަމަށެވެ.
މި އޮޕަރޭޝަނުގައި ހައްޔަރުކޮށްފައިވަނީ، ހުޅުމާލެ ސިފްކޯހިޔާ 0801 ބީ، މާލެ، އުމުރުން 22 އަހަރުގެ އިބްރާހީމް ޢަމްރު ތައުފީގެވެ. އޭނާ ހައްޔަރުކޮށްފައިވަނީ މަސްތުވާތަކެތި ގެންގުޅެ، ބޭނުންކޮށް އަދި އެ ތަކެތީގެ ވިޔަފާރިކުރާ ކަމަށް ތުހުމަތުކުރެވޭ މައްސަލައަކާ ގުޅިގެން ކަމަށް ފުލުހުން ބުންޏެވެ.
"ސަން"އަށް އެނގިފައިވާ ގޮތުގައި މަސްތުވާތަކެތި ފެނުނީ ވެސް އޭނާ ދިރިއުޅެމުން އަންނަ ސިފައިންގެ ފްލެޓުގެ ތެރެެއިންނެވެ. އެގޮތުން އޭނާ ހައްޔަރުކޮށް ބަލައިފާސްކުރިއިރު މަސްތުވާތަކެތި ކަމަށް ބެލެވޭ 500 ގްރާމްގެ ތަކެތި ފެނިފައިވާކަމަށް ފުލުހުން ބުންޏެވެ.
މި މައްސަލައާ ގުޅިގެން އިބްރާހީމް ޢަމްރު ތައުފީޤުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސްދުވަހަށް ބަންދުކުރުމަށް އަމުރުކުރިކަމަށް ފުލުހުން ބުންޏެވެ. އަދި މި މައްސަލަ ތަހުގީގުކުރަމުން އަންނަކަމަށް ވެސް ބުންޏެވެ.
އޮޕަރޭޝަން އަލިމަގުގެ ދަށުން 100 އެއްހައި މީހުން ފުލުހުން ވަނީ ހައްޔަރުކޮށްފައެވެ. މަސްތުވާތަކެތީގެ ބޮޑުން ހައްޔަރުކިށް އަތުލައިގަތުމަށް ފެށި މި އޮޕަރޭޝަނާ ގުޅޭ ފަހުގެ މައުލޫމާތު އަދި ފުލުހުން ހާމައެއް ނުކުރެއެވެ.
މިފަދަ މައްސަލަތަކުގައި މަދުން ނަމަވެސް ފުލުހުންނާއި، ސިފައިން ވެސް މީގެ ކުރިން ޝާމިލުވެ އެ މައްސަލަތައް ވެސް ފެންމަތިވެފައި އެބަހުއްޓެވެ.