ބޮލީވުޑްގެ އެކްޓަރު ސަނީ ޑިއޯލް އަދި ދެކުނު އިންޑިއާގެ ބަތަލާ ޖޯތިކާ ފުރަތަމަ ފަހަރަށް އެކީގައި މަސައްކަތްކުރާ ފިލްމު އިއުލާނުކޮށްފިއެވެ.
"އެންތަނީ"ގެ ނަމުގައި އުފައްދާ މި ފިލްމަކީ ބޮލީވުޑްގެ ޑައިރެކްޓަރު ފަރުހާން އަޚްތަރާއި ރިތޭޝް ސިދުވާނީގެ އެކްސަލް މޫވީސް އަދި ޑައިރެކްޓަރު އޭއާރް މުރްގަދޯސް ގުޅިގެން ގެނެސްދޭ ފިލްމެކެވެ.
މިހާރު ޕޯސްޓް-ޕްރޮޑަކްޝަން މަރުހަލާގައި އޮތް "އެންތަނީ"ގެ ޑައިރެކްޓަރަކީ ބާލާޖީ ގަނޭޝްއެވެ. މި ފިލްމުގެ މަސައްކަތް މި ފެށޭ ފެބްރުއަރީ މަހު ފަށަން ތައްޔާރުވަމުން އަންނަ ކަމަށް ހޮލީވުޑް ރިޕޯޓަ އިންޑިއާގައި ބުނެފައިވެއެވެ.
ވަރަށް ވަރުގަދަ އެކްޝަން ތުރިލާއެއް ކަމަށްވާ މި ފިލްމުގެ ނަމަކީ "އެންތޮނީ" ކަމަށް އިއުލާނުކުރި ނަމަވެސް އެއީ ފިލްމަށް ވަގުތީގޮތުން ދެވުނު ނަމެއް ކަމަށް ރިޕޯޓުތަކުން ބުނެއެވެ. އެހެންކަމުން މި ފިލްމުގެ ނަން ބަދަލުވުމުގެ ފުރުސަތު ބޮޑު ކަމަށް ވެސް މީޑިއާތަކުން ވަނީ ބުނެފައެވެ.
ސަނީ އާއި ޖޯތިކާ ފިލްމު "އެންތޮނީ"ގެ ޓީމާ އެކު--ފޮޓޯ/ޓެލެގްރާފްއިންޑިއާ
އެކްސެލް އެންޓަޓެއިންމަންޓްގެ ފިލްމަކަށް ޖޯތިކާ ސޮއިކޮށްފައިވާއިރު އޭނާ ވަނީ އެ ސްޓޫޑިއޯއިން މިދިޔަ އަހަރު ގެނެސްދިން ނެޓްފްލިކްސް ޑްރާމާ ސީރީސް "ޑައްބާ ކާޓެލް"ގެ ރޯލެއް ވެސް ކުޅެފައެވެ.
ބޮލީވުޑްގެ އެންމެ ކާމިޔާބު އަދި ތަޖުރިބާހުރި އެކްޓަރުންގެތެރޭ ހިމެނޭ ސަނީ ޑިއޯލް އާ ފިލްމެއް އިއުލާނުކުރިއިރު އެކްޓަރުގެ އެންމެފަހުން ރިލީޒްވި ފިލްމަކީ މިދިޔަ ހުކުރު ދުވަހު ސިނަމާތަކުގައި އެޅުވި ފިލްމު "ބޯޑާ 2"އެވެ. މި ފިލްމަށް ބޮޑު ތަރުހީބެއް ލިބެމުން އަންނައިރު ސަނީގެ ކުރިއަށްހުރި އިތުރު ފިލްމުތަކުގެތެރޭ "ލާހޯރު 1947" އަދި "އިއްކާ"ގެ އިތުރުން "ގަބްރޫ" އަދި "ޖާޓް 2" ހިމެނެއެވެ.