އިސްލާމްދީނާ ދެކޮޅަށް ކެމްޕޭން ކުރި، އިސްރާއީލުގެ ސޯޝަލް މީޑިއާ 'އިންފްލުއެންސަރެއް'ގެ ވިސާ އޮސްޓްރޭލިއާއިން ކެންސަލްކޮށްފިއެވެ.
އިސްރާއީލުގެ ސޯޝަލް މީޑިއާގައި މަޝްހޫރުކަން ހޯދައިފައިވާ، ސަމީ ޔަހޫދު ވަނީ، އޭނާ އިސްރާއީލުން އޮސްޓްރޭލިއާއަށް ފުރަން ތިން ގަޑިއިރަށް ވެފައި ވަނިކޮށް، އޮސްޓްރޭލިއާއިން އޭނާގެ ވިސާ ކެންސަލްކޮށްފައިވާ ކަމަށް ބުނެފައެވެ.
އެ މައްސަލައާ ގުޅޭ ގޮތުން އޮސްޓްރޭލިއާގެ މިނިސްޓަރު ފޯ ހޯމް އެފެއާޒް ޓޯނީ ބާކް އަންގާރަ ދުވަހު ނެރުއްވި ބަޔާނެއްގައި ވިދާޅުވީ، ނަފުރަތު އުފެއްދުމަށް އޮސްޓްރޭލިއާއަށް ޒިޔާރަތްކުރުމަކީ ބަލައިގަންނާނެ ކަމެއް ނޫން ކަމަށެވެ. އަދި އޮސްޓްރޭލިއާއަށް ޒިޔާރަތް ކުރަން ބޭނުންވާ މީހުން އަންނަން ވާނީ ރަނގަޅު ސަބަބުތަކާ ހުރެ ކަމަށްވެސް ބާކް ވިދާޅުވިއެވެ.
އެ ވިސާ ކެންސަލް ކުރުމުގެ ކުރިން ޔަހޫދު ވަނީ އިސްލާމް ދީނުގައި ކާފަރުންނާއި، މުރުތައްދުވެފައިވާ މީހުންނާއި، އަންހެނުންގެ ހައްގުތަކާއި، ކުޑަކުދިންގެ ހައްގުތަކާއި، އެއްޖިންސުން ގުޅުން ހިންގާ މީހުންގެ ހައްގުތައް ބަލައިނުގަންނަ ކަމަށް ބުނެ އެކްސްގައި ޕޯސްޓެއްކޮށްފައެވެ. އަދި އިސްލާމްދީނަކީ ނަފްރަތު އުފައްދާ ފިކުރެއް ކަމަށްވެސް ޔަހޫދު ބުނެފައިވެއެވެ.
އިނގިރޭސިވިލާތަށް އުފަން އަދި ދާދި ފަހުން އިސްރާއީލުގެ ރައްޔިތަކަށް ވި ޔަހޫދު މީގެކުރިން ކުރިން ވަނީ މުސްލިމެއް ކަމަށްވާ، އެެމެރިކާގެ ގާނޫނު ހަދާ މަޖިލީހުގެ މެންބަރު އިލްހާން އުމަރު ޑީޕޯޓް ކުރުމަށް ވެސް ގޮވާލާފައެވެ.
އޭގެއިތުުރުން އޭނާ ވަނީ ފަލަސްތީނު މީހުންނަށް އެހީ ދިނުމުގެ މަސައްކަތް ކުރާ އދ.ގެ އިދާރާ އަންރުވާއަށް މަލާމާތްކޮށް ވާހަކަ ދައްކާފައެވެ.
ޔަހޫދު ވަނީ އޭނާގެ ވިސާ ކެންސަލްކުރީ ގަވާއިދާ ޚިލާފަށް ކަމަށް ބުނެ، އެ މައްސަލަ ކަމާ ބެހޭ އިދާރާތަކަށް ހުށަހަޅާނެ ކަމަށް ބުނެފައެވެ.