މިއަދު، ސަރުކާރު ހިންގަމުން އަންނަނީ ރަނގަޅު ސިޔާސަތުތަކެއްގެ މަތީގައިކަން ރައްޔިތުން ގަބޫލުކުރާކަމަށް، ރައީސްގެ އަނބިކަނބަލުން ސާޖިދާ މުޙައްމަދު ރޭ ވިދާޅުވެއްޖެއެވެ.
މާފަންނު ދެކުނު ދާއިރާގައި ކެމްޕޭން ޖަގަހަ ހުޅުވުމުގެ ހަފްލާގައި ވާހަކަފުޅުދައްކަވަމުން ސާޖިދާ ވިދާޅުވީ، މިއަދު ސަރުކާރު ހިނގަމުން އަންނަނީ ރަނގަޅު ސިޔާސަތުތަކެއްގެ މަތީގައިކަން ކޮންމެ ދިވެހި ރައްޔިތަކަށް ވެސް އެނގޭ ކަމަށެވެ.
ދީނީ ގޮތުން ސަރުކާރުން ގެންގުޅޭ އުސޫލުތައް ވެސް ހުރިހާ ރައްޔިތުން ގަބޫލުކުރާނެ ކަމަށް ދެކެވަޑައިގަންނަވާ ކަމަށާއި، ވޭޕާއި ދުންފަތުގެ އިސްތިއުމާލުކުރުން ފަދަ އިޖްތިމާއީ ގޮތުން ހުރި ގޮންޖެހުންތައް ހައްލުކުރުމަށް ވަރަށް އުނދަގޫ ނިންމެވުންތަކެއް ރައީސް ޑރ. މުޙައްމަދު މުއިއްޒު ނިންމެވިކަމަށް ސާޖިދާ ވިދާޅުވިއެވެ.
ރައީސްގެ އަނބިކަނބަލުން ސާޖިދާ މުޙައްމަދު ލޯކަލް ކައުންސިލްގެ ކެމްޕޭން ހަރަކާތެއްގައި -- ފޮޓޯ: ޕީއެންސީ
އެހެންކަމުން މި ފަދަ ސަރުކާރަކަށް އެއްބާރުލުންދޭނެ ބަޔަކު ނުހޮވައިފިނަމަ އެ ކަމުގެ ގެއްލުން ހުރިހާ ރައްޔިތުންނަށް ކުރާނެ ކަމަށް ސާޖިދާ ވިދާޅުވިއެވެ.
"[ގެއްލުންކުރާނެކަން] އެއީ ހަމަ ޔަގީން ވެސް ކަމެއް. އެއީ އަޅުގަނޑުމެންނަށް މިހާތަނަށް ފެނިފައި އޮތީ މިފަދަ ކައުންސިލްތަކުން، ހަގީގަތުގައި ކައުންސިލަކީ ސަރުކާރުގެ ސިޔާސަތުތައް ތަންފީޒުކުރުމުގައި ރައްޔިތުންނާ އެންމެ ގާތުން މަސައްކަތްކުރާނެ ފަރާތް،" ސާޖިދާ ވިދާޅުވިއެވެ.
އެހެންކަމުން ރައްޔިތުން ބޭނުންވާ ކަންކަން ސަރުކާރާ ހަމައަށް ގެނެސްދެވޭނެ ބަޔަކު ކައުންސިލްގައި ތިބުމަކީ ރައްޔިތުންނަށް ޔަގީނުން ވެސް ފައިދާކުރާނެ ކަމެއް ކަމަށް ސާޖިދާ ވިދާޅުވިއެވެ.
މާލޭގެ މޭޔަރުކަމަށް ޕީއެންސީގެ ފަރާތުން ވާދަކުރައްވަނީ ކުރީގެ ޗީފް އޮފް ޑިފެންސް ފޯސް މޭޖާ ޖެނެރަލް ރިޓަޔާޑް މޫސާ އަލީ ޖަލީލެވެ. ޖަލީލާއި އޭނާއާއެކު މާލޭ ސިޓީ ކައުންސިލަށް ވާދަކުރައްވާ ބޭފުޅުންގެ ކެމްޕޭން ޖަގަހަތައް ހުޅުވައި، ކެމްޕޭން މަސައްކަތް މިހާރު މާލޭގައި އަންނަނީ ކުރަމުންނެވެ.