އެކޮމޮޑޭޝަނާއި ކާބޯތަކެތީގެ ހިދުމަތްތަކުގެ ދާއިރާގެ އިގުތިސާދީ ކުރިއެރުން މިދިޔަ ސެޕްޓެންބަރު މަހު ކުޑަކޮށް ދަށްވެއްޖެއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން ނެރުނު މަންތުލީ އިންޑިކޭޓާސް އޮފް އިކޮނޮމިކް ގްރޯތު (އެމްއައިއީޖީ) ރިޕޯޓުގައި ބުނެފައިވާ ގޮތުގައި، މި ދާއިރާގެ ކުރިއެރުން އަހަރުން އަހަރަށް ދަށްވެފައިވަނީ މައިގަނޑު ގޮތެއްގައި ފަތުރުވެރިން ރާއްޖޭގައި ހޭދަކުރި ރޭގެ އަދަދު ނުވަތަ ބެޑް ނައިޓްސް މަދުވުމާ ގުޅިގެންނެވެ.
އެމްބީއެސްގެ ތަފާސްހިސާބުތަކުން ދައްކާ ގޮތުގައި، މިދިޔަ ސެޕްޓެންބަރު މަހު އެކޮމޮޑޭޝަނާއި ކާބޯތަކެތީގެ ހިދުމަތްތަކުގެ ދާއިރާގެ އެމްއައިއީޖީ ހުރީ 1،571 މިލިއަން ރުފިޔާގައެވެ. މިއީ މިދިޔަ އަހަރުގެ ސެޕްޓެންބަރު މަހާ އަޅައިބަލާއިރު 0.4 އިންސައްތަ ދަށް އަދަދެކެވެ. އަދި މިދިޔަ އޮގަސްޓު މަހާ އަޅައިބަލާއިރު މިއީ 29.5 އިންސައްތައިގެ ދަށްވުމެއް ކަމަށް އެ ރިޕޯޓުގައި ބުނެފައިވެއެވެ.
މި ދަށްވުމާއެކުވެސް، ސެޕްޓެންބަރު މަހުގެ ޖުމުލަ އެމްއައިއީޖީގެ އެންމެ ބޮޑު ހިއްސާއެއް އޮތީ މި ދާއިރާގައެވެ. އެއީ 18.5 އިންސައްތައެވެ. ދެވަނައަށް އެންމެ ބޮޑު ހިއްސާއެއް އޮތް ދަތުރުފަތުރާއި މުވާސަލާތީ ދާއިރާގެ ހިއްސާއަކީ 12.0 އިންސައްތައެވެ.
ދިވެހިރާއްޖޭގެ މުޅި އިގުތިސާދީ އުފެއްދުންތެރިކަމަށް ބަލާއިރު، މިދިޔަ ސެޕްޓެންބަރު މަހު ޖުމުލަ އެމްއައިއީޖީ ހުރީ 8،512 މިލިއަން ރުފިޔާގައި ކަމަށް އެމްބީއެސްއިން ބުނެއެވެ. މިއީ މިދިޔަ އަހަރުގެ ސެޕްޓެންބަރު މަހަށް ވުރެ 4.0 އިންސައްތަ (330 މިލިއަން ރުފިޔާ) އިތުރު އަދަދެކެވެ. ނަމަވެސް މިދިޔަ އޮގަސްޓު މަހާ އަޅައިބަލާއިރު މިއީ 11.6 އިންސައްތަ (1،120 މިލިއަން ރުފިޔާ) ދަށް އަދަދެކެވެ. ސެޕްޓެންބަރު މަހުގެ އިގުތިސާދީ ކުރިއެރުމަށް އެންމެ ބޮޑު އެދެވޭ ހިއްސާއެއް ކޮށްފައިވަނީ 0.9 އިންސައްތައާއެކު ރިއަލް އެސްޓޭޓް ދާއިރާއިންނެވެ. އަދި ހޯލްސޭލް އަދި ރީޓެއިލް ވިޔަފާރީގެ ދާއިރާއާއި އިމާރާތްކުރުމުގެ ދާއިރާއިން، މިއިން ކޮންމެ ދާއިރާއަކުން 0.8 އިންސައްތައިގެ ކުރިއެރުމެއް ހިއްސާކޮށްފައިވެއެވެ.
އެ މަހު ކުރިއެރުމަށް އެންމެ ބޮޑު ނޭދެވޭ އަސަރެއް ކޮށްފައިވާ މަސްވެރިކަމުގެ ދާއިރާއިން 1.5 އިންސައްތަ ދަށަށް އަދި އެކޮމޮޑޭޝަނާއި ކާބޯތަކެތީގެ ދާއިރާއިން 0.1 އިންސައްތަ ދަށްވި ކަމަށް އެ އިދާރާއިން ފާހަގަކުރެއެވެ.
އެމްބީއެސްއިން ބުނި ގޮތުގައި، އެމްއައިއީޖީގެ ހިސާބުތައް ތައްޔާރުކޮށްފައިވަނީ 2019 ވަނަ އަހަރުގެ ސާބިތު އަގުތަކަށް ބިނާކޮށްގެންނެވެ.