އިންޑޮނޭޝިއާގެ ކޮޕީރައިޓް ގާނޫނަށް އިސްލާހު ގެނެސް، އާޓިފިޝަލް އިންޓެލިޖެންސް (އޭއައި) އާއި ނޫސްތަކުގެ ޚަބަރުތައް ދެއްކުމުން ޑިޖިޓަލް ޕްލެޓްފޯމްތަކުން ފައިސާ ދައްކަންޖެހޭ ގޮތަށް ހެދުމަށް ރޭވި ގާނޫނާ ދެކޮޅަށް ގޫގުލްއާއެކު މެޓާ އަދި ޓިކްޓޮކުން ނުކުމެއްޖެއެވެ.
މި ބިލް ފާސްވެއްޖެނަމަ، އިންޑޮނޭޝިއާ ވެގެންދާނީ އޭއައިގެ ކޮޕީރައިޓް ގާނޫނެއް އެކުލަވާލާ ދެކުނުއިރުމަތީ އޭޝިއާ ސަރަހައްދުގެ ފުރަތަމަ ގައުމަށެވެ.
އިންޑޮނޭޝިއާގެ ގާނޫނުހަދާ މަޖިލީހުގައި ބޭއްވި އަޑުއެހުމެއްގައި ގޫގުލްގެ އިންޑޮނޭޝިއާ ސަރުކާރުގެ ކަންކަމާ ބެހޭ މެނޭޖަރު އަގުންގް ޕާމުންގްކާސް ވިދާޅުވީ، ނޫސްތަކުގެ ލިންކުތައް ދައްކާތީ ޑިޖިޓަލް ޕްލެޓްފޯމްތަކުން ފައިސާ ދައްކަން މަޖުބޫރުކުރުމަކީ އާންމުންނަށް ޚަބަރުތަކަށް ވާސިލުވުމަށް އޮތް ފުރުސަތު ހަނިވެގެންދާނެ ކަމެއް ކަމަށެވެ.
މެޓާއިން އިންޑޮނޭޝިއާގައި ކަނޑައަޅާފައިވާ ޕަބްލިކް ޕޮލިސީގެ ވެރިޔާ ބާނީ މުސްތަފާ ވިދާޅުވީ ޕްލެޓްފޯމްތަކުން ފައިސާ ދައްކަންޖެހުމުން ނޫސް ޝާއިއުކުރާ ފަރާތްތަކަށް ލިބޭ ޓްރެފިކާއި، އިޝްތިހާރާއި ސަބްސްކްރިޕްޝަން އާމްދަނީ ދަށްވުމުގެ ފުރުސަތު ބޮޑު ކަމަށެވެ. އަދި ކިޔުންތެރިން ޚަބަރެއްގެ އަސްލު މުގައްރަރަށް ފޮނުވައިދިނުމާއި، އެ ޚަބަރެއް އަލުން ކޮޕީކޮށްގެން ޝާއިއުކުރުމާ ދެމެދު ބޮޑު ތަފާތެއް އޮންނާނެކަން އޭނާ ފާހަގަކުރެއްވިއެވެ.
ޓިކްޓޮކްގެ އިންޑޮނޭޝިއާ ޕަބްލިކް ޕޮލިސީގެ ވެރިޔާ ނޫދީ ވަލްޑްރީނޯ ވިދާޅުވީ، މުޅިން އާ އުފެއްދުމެއް އުފެއްދުމުގެ ބަދަލުގައި އެހީތެރިވުމުގެ ގޮތުން އޭއައި ބޭނުންކުރާ ހާލަތްތަކުގައި މައުލޫމާތު ހާމަކުރުމުގެ ގަވާއިދުތައް ހިންގައިގެން ނުވާނެ ކަމަށެވެ. އަދި ކޮޕީރައިޓްގެ މިލްކުވެރިކަން ނުވަތަ ލައިސަންސް އޮތްގޮތް ޕްލެޓްފޯމްތަކަށް ކަށަވަރުކޮށްދިނުމަކީ ކުރެވޭނެ ކަމެއް ނޫންކަމަށްވާތީ، ޕްލެޓްފޯމްތަކަށް ލިބިދޭ "ސޭފް-ހާބާ" ރައްކާތެރިކަން ދެމެހެއްޓުމަށް އޭނާ އެދިވަޑައިގަތެވެ.
މިއީ ބައިނަލްއަގުވާމީ ފެންވަރުގައި އާޓިފިޝަލް އިންޓެލިޖެންސް (އޭއައި) މޮޑެލްތައް ތަމްރީނުކުރުމަށް އިންސާނުންގެ އުފެއްދުންތައް ބޭނުންކުރުމާއި، ކޮޕީރައިޓް ގާނޫނުތަކަށް އެކަމުގެ އަސަރުކުރާ ގޮތާމެދު ދުނިޔޭގެ ގައުމުތަކުން ބަހުސްކުރަމުންދާ ދަނޑިވަޅެކެވެ.
އިންޑޮނޭޝިއާ ސަރުކާރުން އިސްނަގައިގެން ކޮޕީރައިޓް ގާނޫނަށް ގެންނަން އުޅޭ މި އިސްލާހުތަކުގެ ތަފްސީލު އެންމެ ފުރަތަމަ ތިލަވެފައިވަނީ މިއަހަރުގެ ޖުލައި މަހު ރޮއިޓާސްއިން އާންމުކުރި ރިޕޯޓަކުންނެވެ.
މި ބިލް ފާސްވެއްޖެނަމަ، އިންޑޮނޭޝިއާ ވެގެންދާނީ އޭއައި އާއި ޑިޖިޓަލް ޕްލެޓްފޯމްތަކުން ޚަބަރު ފެތުރުމާ ގުޅޭ ކޮޕީރައިޓް ގަވާއިދުތައް ގާނޫނެއްގެ ތެރެއިން ހަމަޖައްސާ ދެކުނުއިރުމަތީ އޭޝިއާގެ ފުރަތަމަ ގައުމަށެވެ.