އަންހެނަކު ރޭޕްކުރުމާއި އިތުރު ތިން އަންހެނަކަށް ޖިންސީ ގޯނާކުރިކަން ސާބިތުވެ، އިނގިރޭސިވިލާތުގެ ކުރީގެ މަޝްހޫރު ކޮމެޑިއަން އަދި އެކްޓަރު ރަސަލް ބްރޭންޑް 10 އަހަރާއި ހަމަސް ދުވަހުގެ މުއްދަތަކަށް ޖަލަށްލުމަށް ލަންޑަނުގެ ސައުތުވަކް ކްރައުން ކޯޓުން ހުކުމްކޮށްފިއެވެ.
އެމެރިކާގެ މަޝްހޫރު ލަވަކިޔުންތެރިޔާ ކޭޓީ ޕެރީގެ ކުރީގެ ފިރިމީހާ، އުމުރުން 51 އަހަރުގެ ބްރޭންޑްގެ މައްޗަށް މި ހުކުމް އައީ، މީގެ 20 އަހަރު ކުރިން، އެއީ 2004 އާއި 2009އާ ދެމެދު އޭނާ ހިންގާފައިވާ ކަމަށް ބުނާ ސީރިއަސް ޖިންސީ ކުށްތަކަކާ ގުޅިގެންނެވެ.
ހުކުމް އިއްވަވަމުން ފަނޑިޔާރު ޖޯއެލް ބެނަތަން ވިދާޅުވީ، ބްރޭންޑަކީ މަޝްހޫރުކަމުގެ ބާރުގައި ތަހުޒީބީ މުޖުތަމައުތަކުގެ ހަމަތަކުން ބޭރުވެ، ހިތުހުރި ގޮތަކަށް އުޅެވިދާނެ ކަމަށް ދެކުނު މީހެއް ކަމަށެވެ. އަދި އަންހެނަކު ބޭނުންކުރާ ހެދުމަކަށް ނުވަތަ އުޅޭ ތަނަކަށް ބެލުމެއް ނެތި، ރުހުމަކާ ނުލައި ހިންގާ ކޮންމެ އަމަލަކަށް ކޯޓުތަކުން އިންސާފު ހޯދުމުގެ ފުރިހަމަ ހައްގު ކޮންމެ އަންހެނަކަށްމެ ލިބިގެންވާކަން ފަނޑިޔާރު ފާހަގަކުރެއްވިއެވެ. މި ހުކުމާ އެކު، ބްރޭންޑް އޭނާގެ އަދަބުގެ ތިންބައިކުޅަ ދެބައި ބަންދުގައި ހޭދަކުރަން ޖެހޭނެއެވެ.
ރަސަލް ބްރޭންޑް ކުރީގެ އަންހެނުން، ލަވަކިޔުންތެރިޔާ ކޭޓީ ޕެރީއާ އެކު-- ފޮޓޯ/ޓެލެގްރާފްއިންޑިއާމި ހުކުމާ ގުޅިގެން ވާހަކަދައްކަވަމުން ލަންޑަން މެޓްރޮޕޮލިޓަން ޕޮލިހުން ވަނީ، އަނިޔާ ލިބުނު ފަރާތްތަކުން ދެއްކި ކެތްތެރިކަމަށާއި އިންސާފު ހޯދުމަށް ކުރި ހިތްވަރަށް އިންތިހާއަށް ތައުރީފުކޮށްފައެވެ. ފުލުހުން ފާހަގަކުރި ގޮތުގައި އެ ފަރާތްތަކުން ކުރިއަށް ނުކުތުމަކީ، މިފަދަ އަނިޔާތަކުގެ ޝިކާރައަކަށްވެ ބަސްބުނަން ނުކެރި ތިބި އެހެން ފަރާތްތަކަށްވެސް އިންސާފު ހޯދަން މަގުފަހިވާނެ ކަމެކެވެ. މީގެއިތުރުން، އޭރު އުމުރުން އެންމެ 16 އަހަރުގެ އަންހެން ކުއްޖަކު ހިމެނޭހެން، ބްރޭންޑާ ދެކޮޅަށް ހުށަހެޅިފައިވާ ރޭޕްގެ އިތުރު ދެ މައްސަލައެއް ވެސް ފުލުހުން އަދިވެސް ދަނީ ތަހުގީގުކުރަމުންނެވެ.
ހަތަރު ހަފުތާގެ ދިގު ޝަރީއަތަށްފަހު ބްރޭންޑްގެ މައްޗަށް އެއް ރޭޕްގެ ކުށާއި ޖިންސީ ގޯނާގެ ތިން ކުށެއް ސާބިތުވިއިރު، އަނިޔާ ލިބުނު ފަރާތްތަކުން ކޯޓުގައި ދިން ބަޔާންތަކުން ފެނިގެންދިޔައީ ފުން ހިތާމައެކެވެ. އެގޮތުން، 2004 ވަނަ އަހަރު އަނިޔާ ލިބުނު އަންހެން މީހާ ވޭތުވެދިޔަ 20 އަހަރު ހޭދަކުރީ އިންތިހާ ލަދުވެތިކަމާއި ނަފްސާނީ ވޭނުގައި ކަމަށް ބުނެފައިވާއިރު، 2009 ވަނަ އަހަރު ޝިކާރައަކަށްވި އަންހެން މީހާ ބުނީ އެ ދުވަސްވަރު މައްސަލަ ރިޕޯޓްނުކުރެވުނީ ބްރޭންޑްގެ މުއްސަނދިކަމާއި މަޝްހޫރުކަމުގެ ސަބަބުން އޭނާގެ އަޑު އެއްވެސް މީހަކު އަހައިނުގަންނާނެ ކަމުގެ ބިރު އޮތުމުން ކަމަށެވެ.
"ފޮގެޓިންގް ސާރާ މާޝަލް" އަދި "ގެޓް ހިމް ޓު ދަ ގްރީކް" ފަދަ ހޮލީވުޑްގެ ފިލްމުތަކުން ވިދާލި ބްރޭންޑް ޝަރީއަތުގައި ބުނެފައިވަނީ، އޭނާގެ ޒުވާން ދުވަސްވަރު ބޭކާރު ގޮތުގައި އުޅެވުނު ނަމަވެސް، ރުހުމަކާ ނުލައި އެއްވެސް ޖިންސީ ގުޅުމެއް ހިންގާފައި ނުވާނެ ކަމަށެވެ. އެހެންނަމަވެސް، ޕްރޮސެކިއުޝަނުން ކޯޓުގައި ސާބިތުކޮށްދިނީ އޭނާ އަމިއްލަ މަޝްހޫރުކަމާއި ނުފޫޒު ނަހަމަ ގޮތުގައި ބޭނުންކޮށްގެން އަނިޔާވެރި އަމަލުތައް ހިންގާފައިވާ ކަމެވެ.
މި މައްސަލައިގެ ސަބަބުން އިނގިރޭސިވިލާތުގެ މުނިފޫހިފިލުވުމުގެ ސިނާއަތުގައި މަޝްހޫރު މީހުން ނުފޫޒު ބޭނުންކޮށްގެން ހިންގާ ޖިންސީ ގޯނާތަކުގެ ބަހުސް އަނެއްކާވެސް ވަނީ ހޫނުވެފައެވެ. އިނގިރޭސި ސަރުކާރުގެ ކަލްޗަ މިނިސްޓަރު ލީސާ ނެންޑީވެސް ވަނީ މީޑިއާގެ ދާއިރާގައި އަދިވެސް މިފަދަ މައްސަލަތައް އޮތްކަން ފާހަގަކުރައްވައި ކަންބޮޑުވުން ފާޅުކުރައްވާފައެވެ. އެހެންނަމަވެސް، ކުށްވެރިޔާގެ ހައިސިއްޔަތަކަށް ނުވަތަ ހާދިސާ ހިނގިތާ ވޭތުވެދިޔަ މުއްދަތަކަށް ބެލުމެއް ނެތި، ޖިންސީ ކުށްތަކުގެ މައްސަލަތަކުގައި ފަސްޖެހުމެއް ނެތި އިންސާފު ގާއިމުކުރާނެ ކަމުގެ ފުރިހަމަ ޔަޤީންކަން ޕްރޮސެކިއުޝަނުން ވަނީ ދީފައެވެ.