ސައުދީ އަރަބިއާގެ މަސްރަހު ގޯސްވެފައިވުމުން، އޭޝިއަން ކަޕް ފަސްކޮށްފިއެވެ.
ކުރިން ރާވާފައި އޮތް ގޮތުން މުބާރާތް ފަށަން އޮތީ އަންނަ ޖެނުއަރީ މަހު ހަތެއްގައެވެ. އަދި ފައިނަލް މެޗު ކުޅޭ ގޮތަށް ހަމަޖައްސާފައި އޮތީ ފެބްރުއަރީ ފަހެއްގައެވެ.
ނަމަވެސް މުބާރާތަށް މިހާރު ގެނެސްފައިވާ ބަދަލާއެކު މުބާރާތް ފަށަން ނިންމާފައިވަނީ އަންނަ އަހަރު ޑިސެމްބަރު 23 ގައެވެ. އަދި ފައިނަލު މެޗު ކުޅޭނީ 2028 ވަނަ އަހަރުގެ ޖަނަވަރީ މަހުއެވެ.
އޭއެފްސީ މުބާރާތް ފަސްކުރީ، ޔަމަނުގެ ހޫޘީން ސައުދީގެ އެކި ސަރަހައްދުތަކަށް ދޭތެރެދޭތެރެއިން ދެމުންދާ ހަމަލާތަކުގެ ސަބަބުންނެވެ.
އޭއެފްސީން ބުނީ މިހާރު ކުރިމަތިވެފައި ވަނީ އިސްތިސްނާ ހާލަތެއް ކަމުން މުބާރާތް ފަސްކުރުމަކީ ޝާމިލުވާ ހުރިހާ ފަރާތްތަކަށްވެސް އެންމެ މަސްލަހަތު ހުރި ގޮތްކަމަށެވެ.
ސައުދީ އިސްވެ އޮންނަ އަސްކަރީ ކޯލިޝަނާއި ޔަމަންގެ ހޫޘީންނާ ދެމެދު ބަދަލުކުރަމުންދާ ހަމަލާތައް ވަނީ ވަރުގަދަ ވެފައެވެ. ހޫޘީން ދިން މިސައިލް އަދި ޑްރޯން ހަމަލާތަކުގައި ރިޔާޟްގެ ކިންގް ހާލިދު އިންޓަނޭޝަނަލް އެއާޕޯޓަށް 11 ދުވަސް ތެރޭ 20 އަށްވުރެ ގިނަ ހަމަލާ އަމާޒުވެ، 17 މީހުން މަރުވެފައިވެއެވެ. އަދި 300 އަށްވުރެ ގިނަ މީހުން މި ހަމަލާތަކުގައި ޒަޚަމްވެފައިވެއެވެ.