ސެޕްޓެންބަރު މަހު އޯޕެކް ޕްލަސްގެ ތެލުގެ އުފެއްދުންތެރިކަން ވަރަށް ބޮޑަށް އިތުރުވެއްޖެއެވެ.
އޯޕެކްއިން އަންގާރަ ދުވަހު ނެރުނު އޮކްޓޯބަރު މަހުގެ ރިޕޯޓުގައިވާ ގޮތުން، އީރާނުގެ ހަނގުރާމައާ ގުޅިގެން ހޮރުމުޒް ކަނޑުއޮޅިން ތެޔޮ އެކްސްޕޯޓުކުރުމަށް ދަތިތަކެއް ކުރިމަތިވެފައިވީ ނަމަވެސް، އޯޕެކް ޕްލަސްއިން ސެޕްޓެންބަރު މަހު ދުވާލެއްގެ މައްޗަށް އެވްރެޖްކޮށް 39.07 މިލިއަން ފީފާގެ ތެޔޮ އުފައްދާފައިވެއެވެ. މިއީ އޮގަސްޓު މަހާ އަޅައި ބަލާއިރު ދުވާލަކު 900،000 ފީފާގެ ކުރިއެރުމެކެވެ. އޯޕެކް ޕްލަސްގައި ހިމެނެނީ ތެޔޮ އެކްސްޕޯޓުކުރާ ގައުމުތަކުގެ ޖަމިއްޔާ (އޯޕެކް) އާއި ރަޝިޔާ ފަދަ އެކުވެރި ގައުމުތަކެވެ. މި ކުރިއެރުމުގެ އެންމެ ބޮޑު ހިއްސާއެއް އަދާކޮށްފައިވަނީ ސައުދީ އަރަބިއްޔާއިންނެވެ.
ސައުދީ އަރަބިއްޔާގެ ދައުލަތުގެ ތެޔޮ ކުންފުނި ކަމަށްވާ އަރާމްކޯއިން ވަނީ ގަލްފުގެ އެކްސްޕޯޓު ޓާމިނަލްތަކުން ތެޔޮ ބަރުކުރާ މިންވަރު ސެޕްޓެންބަރު މަހު ވަރަށް ބޮޑަށް އިތުރުކޮށްފައެވެ. ރޮއިޓާސްއިން ރިޕޯޓުކޮށްފައިވާ ގޮތުގައި، މިކަން މިގޮތަށް ކޮށްފައިވަނީ އީސްޓް-ވެސްޓް ހޮޅިލައިނަށް ދިން ހަމަލާއަކާ ގުޅިގެން ރަތް ކަނޑު މެދުވެރިކޮށް ކުރަމުންދިޔަ އެކްސްޕޯޓުތަކަށް ބުރޫއެރުމާ ގުޅިގެންނެވެ. އޯޕެކްގެ ރިޕޯޓުގައިވާ ގޮތުން، އޯޕެކްގެ އެންމެ ބޮޑު އުފެއްދުންތެރިޔާ ކަމަށްވާ ސައުދީ އަރަބިއްޔާއިން ސެޕްޓެންބަރު މަހު ދުވާލަކު 8.372 މިލިއަން ފީފާގެ ތެޔޮ އުފައްދާފައިވެއެވެ. މިއީ އޮގަސްޓު މަހާ އަޅައި ބަލާއިރު ދުވާލަކު 2 މިލިއަނަށް ވުރެ ގިނަ ފީފާގެ އިތުރުވުމެކެވެ. މިއާއެކު، މެދުއިރުމަތީގެ ގަލްފުން ތެޔޮ ސަޕްލައިކުރާ މިންވަރު ރަނގަޅުވަމުން އަންނަ ކަމުގެ ނިޝާންތައް ފެންނަން ފަށާފައިވާ ކަމަށް އޯޕެކްއިން ބުނެފައިވެއެވެ.
ސައުދީ އަރަބިއްޔާގެ އުފެއްދުންތެރިކަން އިތުރުވި ނަމަވެސް، ރަޝިޔާގެ ތެލުގެ އުފެއްދުންތެރިކަން ވަނީ ދަށަށް ގޮސްފައެވެ. އޯޕެކްގެ ރިޕޯޓުގައި ފާހަގަކޮށްފައިވާ ގޮތުގައި، ފާއިތުވި މަހު ރަޝިޔާގެ އުފެއްދުންތެރިކަން ވަނީ ދުވާލަކު 38،000 ފީފާއިން ދަށަށް ގޮސްފައެވެ. މިކަން މިގޮތަށް ދިމާވެފައިވަނީ ޔޫކްރެއިނުން ރަޝިޔާގެ ހަކަތައިގެ އުމްރާނީ ވަސީލަތްތަކަށާއި ތެޔޮ ސާފުކުރާ ކާރުޚާނާތަކަށް ދެމުންދާ ހަމަލާތަކާ ގުޅިގެންނެވެ. މީގެ އިތުރުން، 2026 ވަނަ އަހަރުގެ ފެބްރުއަރީ މަހުގެ ފަހުކޮޅު ފެށުނު އީރާން ހަނގުރާމައާ ގުޅިގެން މެދުއިރުމަތީގެ ގަލްފުން ތެޔޮ ސަޕްލައިކުރާ މިންވަރު އަދިވެސް ހުރީ ހަނގުރާމައިގެ ކުރިން ހުރި މިންވަރަށް ވުރެ ދަށްކޮށެވެ.
ދުނިޔޭގެ ބާޒާރުގައި ތެލަށް އޮތް ޑިމާންޑާ ގުޅޭގޮތުން އޯޕެކްއިން ވަނީ 2026 ވަނަ އަހަރަށް ލަފާކުރާ މިންވަރު ވިދިވިދިގެން ހަވަނަ މަހަށް ދަށްކޮށްފައެވެ. ނަމަވެސް، އީރާން ހަނގުރާމައާ ގުޅިގެން މަދުވެފައިވާ ތެލުގެ ރިޒާވްތައް އަލުން ބިނާކުރަން ޖެހިފައިވާތީ، 2027 ވަނަ އަހަރަށް ލަފާކުރާ މިންވަރު ވަނީ މަތިކޮށްފައެވެ. އޯޕެކްއިން ލަފާކުރާ ގޮތުގައި، އަންނަ އަހަރު ދުނިޔޭގެ ތެލުގެ ޑިމާންޑު ދުވާލަކު 2.55 މިލިއަން ފީފާއިން އިތުރުވެ، އެވްރެޖްކޮށް ދުވާލަކު 108.3 މިލިއަން ފީފާއަށް އަރާނެއެވެ. އަދި 2026 ވަނަ އަހަރު ޑިމާންޑު އިތުރުވާނީ ދުވާލަކު 180،000 ފީފާއިން ކަމަށް އެ ޖަމިއްޔާއިން ލަފާކުރެއެވެ. އޯޕެކްއިން ބުނި ގޮތުގައި، މެދުއިރުމައްޗާއި ޔޫކްރެއިންގެ ހަނގުރާމަތަކާ ގުޅިގެން ސަޕްލައިއަށް ބުރޫއަރާފައިވާތީ، ސަރުކާރުތަކާއި ހަކަތަ ކުންފުނިތަކުން ދަނީ ރައްކާކޮށްފައިވާ ތެޔޮ ބޭނުންކުރަމުންނެވެ.